[نوماس5]

ماعرفتك !! والعذر اقبح من ذنوب الخطيّه
حتى شكلك صدقيني ان قلت لك : بعضه نسيته

اذكر اعيونك حورها من الخجل زايد شويّه
بس هذا اذكره وغيره من الذكرى محيته

لابعد اذكر .. شعرك اللي يحب لعبة يديّه
سالفه شعرك لحاله لو ابشرح ماوفيته

واذكر ان فمك حضن جمرن ٍ حمر فوق ابرديّه
لابتسم لي رحت له كلي من اللهفه وجيته

واذكر ان غمازة اخدودك عذاب ومهمهيّه
وردتني لطريق اللي ابتدى يوم انتهيته

واذكر ان اطعونك اللي بالظهر كانت قويّه
ايه اعرفك بس اخاف الجرح يكبر لا طريته

انتي كنتي شي ثاني .. كنتي شي مني وفيّه
اقرب انسانه لقلبي حطمت قلبي في بيته

تذكرين .. الورد الاحمر يوم جبتي لي هديّه
قلتي : تكفا لايموت الورد لك غالي شريته

مات قلبي قبل يموت الورد وجروحه نديّه
في يديني جبت دم القلب للورد وسقيته

كنت احسب اني اضحي .. مادريت اني ضحيّه
كنت احسب ان العطى يثمر بعين اللي عطيته

راحت احلام العمر .. روحه كذا من غير جيّه
حتى زرعي اللي زرعته .. ماتوفقت وجنيته

من عقب ماكان ليّه .. صار له ماهو بليّه
من خذاه !! وقلبي يسئل عنه لكن مالقيته

دايم اسمع عن خوي ٍ خان في خوة خويّه
موقف ٍ يمكن كتبته بالشعر قبل وقريته

المهم .. ماكنت احسه لين ماجتني بليّه
من يديك وحسستني وخاب كل اللي هقيته

يابدويّه مو كذا رد الجمايل يابدويّه
البداوه علمتني كيف ارد اللي خذيته

في الزمن هذا .. محال الوافي يلقى له وفيّه
الزمن هذا خذلني في محبتك وبكيته

كنت اقول : الطيّبه احسن من علوم الرديّه
كنت اقول وكنت اقول ولانفعني ماحكيته

مابقا عندي كلام ولا بقا بصدري بقيّه
من تفارقنا بصدري هالعتاب ولاشكيته

هذا كله اللي عليك .. وقولي انتي ماعليّه
بسمعك للصبح يمكن منك اسمع مابغيته

اما شكلك اعرفه عرف الموصى للوصيّه
قلت : ماعرفه .. وفي قلبي اقول: اني فديته

ايه اعرفك والعذر اقبح من ذنوب الخطيّه
انتي شكلك صدقيني راح اموت ولانسيته

الموضوع الأصلي: ماعرفتك !! والعذر اقبح من ذنوب الخطيّه | | الكاتب: نوماس5 | | المصدر: شبكة بني عبس

[مذكر الرشيدي]

لاهنت على النقل

وقصيده جزله وتستاهل النقل

مشكوووووور والله يعطيك الف عافيه

وصح لسان قائلها

[راسبه بالحب]

سلمت الايادي

[el3nod-al]

اختيار رائع قمــة فالذوق


تقبل مروري

[نوماس5]

منوورين لا عدمتكم

[رسام الغروب]

صح السانك اختيار موفق لاهنت

[نوماس5]

منوور يا الغلااا