[ابن صقعان]

قال المقوعي قدر الحرف تقدير= لاخير بالدنيا ولذة منامه
يامنيف عقب اربوعنا جت معاصير= الجو اشوفه قام يذري كتامه
يامنيف وين اللى يجونن مسايير= اهل الشرف والطيب واهل الشهامه
اهل البيوت اللى عمدها كواسير= ربعي لياصارت على الغرامه
ماتقل بارض الصور بنو دواوير= ولاتقل شفت ابيوتهم والجهامه
توادعوبالصور واقفوا مسافير = الله يوفقهم طريق السلامه
بس العجاج قفيهم له تثاوير = مرباعهم جو كثير رمامه
تلقى لهم بارض الموشم مقاطير= بهاك الديار اللى رفيع مقامه
مدهالهم يوم الليالي مخاضير= ليا اشتبك عشب السهل مع خزامه
اهل بيوتن مجمعن للخطاطير= والضيف عصبان المفطح يامه
ببيوتهم تلقى الوجيه المسافير= ودلالهم من حب صنعاء طعامه
ونجر يصوت بالليال المعاسير= ونار ينادي للطراقي شعامه
ادعي لهم بمكبرات المزابير= غر على صفر المخيط انهشامه
غر هللهن فوق لابة زبيعير= منه المخيط يشيل راس العدامه
وتضفي على نجد المزون الشخاتير= وراع الغنم والبل يطش المسامه
ياخذ سنه ماشد يجمع من الخير= يمضي زمانه مارحل عقب قامه
وتخضر ديار مدلهين المعاشير= بني رشيد لياحكوا بالقوامه
بني رشيد لياعتمن المشاوير= وصارت على بعض القبائل ملامه
وصاح الصياح وقيل مانتم على خير= مير افزعوا اخذ الدبش مع حيامه
وقالوا ترى قوم الدبش حرب ومطير= ربع على الردات يعجب نظامه
يبون اباعركم وخز المعاشير= ضارين لاخذ اللى ردوم سنامه
ولحقوا على شهب عليهن مناعير= وحمى الطراد وصار عند الجهامه
وتعاطيوا بالفعل عند المغاتير= وكل جرد سيف الفرح من الجامه
ولجن بنات البدوحدر المقاصير= وقبقب شراع العز عقب انهدامه
واقفت نحور الخيل عنهم مدابير= وكل ابلج ناخت هدفه ومرامه
هذي عوايدهم بتال المظاهير= ليا طار ستر اللى جداد وشامه
لياعزلوا قفوا المتلى صوابير= وصارت على من شارفيها ندامه
مركاضهم يشبع به السبع والطير= والضبعه العرجا تغز العلامه
صيارم يوم الملاقا سواعير= والعمر يهدونه لمن كان سامه
ربعي هل الردات مابه ذعاذير= بني رشيد عزاة من هم عمامه
ربعي لياناموا بحدب المناظير= كم واحد بلكون بتوا حزامه
راجن عليه معسكرات المسامير= بارض نهار الكون طير عسامه
خلي عشى لمعكفات الدناقير= عقب السعد ذكوه واهنوا مقامه
ومن قال حنا اطيب فهو ماعمل خير= يظلم نصيبه والقبائل حجامه
الناس مثل الناس مشاي ومغير= كل على حده وكل بزامه
الا الملوك الها جلال وتقدير= نور البلاد وسرجها عن ظلامه
والفعل ماخلاه عرار لعمير = وذياب ماقنعس لشلفا سلامه
هذا المثل والناس تمثيلهم غير= والعيب باللى مايثمن كلامه
ولا احط بالقيفان كذب ومعايير= الصدق صابون الفواد وختامه
وصلوا على اللى حج مكه بتكبير= نبينا اللى طاف وازكى حرامه

قصيده للشاعر الكبير معلث بن مصلح المقوعي الرشيدي

الموضوع الأصلي: ولجن بنات البدو حدر المقاصير - وقبقب شراع العز عقب انهدامه | | الكاتب: ابن صقعان | | المصدر: شبكة بني عبس

[شداد المظيبري]

صح لسان
الشاعر /معلث عالابيات الجزله
يعطيك العافية ابن صقعان عالنقل

[ذيب الوسعه]

صح لسان
الشاعر /معلث عالابيات الجزله
والله يعطيك العافية

[(ابوعواض)]

الله واكبر

قصيده جزله وافيه اشكرك جزيل الشكر يابن صقعان بيض الله جهك

وصح لسسان شاعرها

[المحيط]

ابن صقعان
مشكوراخوي ع النقل لاهنت وبيض الله وجهك ورحم الله الشاعر الامير معلث المقوعي
الرشيدي على هذه القصيده الذي اعتبرها شيخة القصايد وفق الله الجميع

[ابن صقعان]

شداد المظيبري
ذيب الوسعه
ابو عواض
المحيط

شاكرا لكم مروركم وبيض الله وجيهكم تحياتي للجميع