[يوسف الصامل]

محمد:

مرحبا في محل الطيب والإحترام

أدعي القوم وأوفيهـا مواجيبهـا

العتيبي يخيل الشرق ويلد شـام

من علو الجبال اللي عوى ذيبها

حبيب:

والبقا يارفيعين البخت والمقـام

كل قومٍ تبى تقضـي مطاليبهـا

والعتيبي ماشال البندق بلا حزام

وإن رمى بندقه يعرف مضاريبها

محمد:

إنتعلّـم وتآتينـا كثيـر العـلام

تطلع الطيبيـن وينذكـر طيبهـا

مابقي مع نصايب جدّك الاّ العظام

مار لاتنقل البندق وترمـي بهـا

حبيب:

هبت النود فوق الناس والطير حام

يوم بعض الطيور اخطت مخاليبها

جدكم يا هذيل أهل الجبل للرحـام

مابقى الاّ ضيوفٍ مع معازيبهـا

محمد:

مايحرّك جناح الصقر صوت الحمام

مـار نيتـك لاتخلـف هناديبهـا

جدنا حافظٍ عهده وصـان النظـام

وأنت وين الصلاه اللي تصلي بهـا

حبيب:

هيضتني لحونك يا حمام السـلام

تزعج الصوت والجنحان تومي بها

مايجيه الملام ولا يجينـا المـلام

وأكثر الناس تدري محد يدري بها

محمد:

عشت ماحسن كلامك يا حَسِين الكلام

يدك يطلع لها ميسمك مـن جيبهـا

والله إنه سرى في ليل كلـه ظـلام

لو هواجيسـك العذبـه تغنـي بهـا

حبيب:

وقّعت فالكتوف و وقّعت فالسنام

وأنت عينك تحيمرها وتغضي بها

فيه نص حلال وفيه نص حـرام

وأصبح الشك داير ودها جيبهـا

محمد:

ملْحَمه فيك وموثّق علاها اللحام

روس شابت وروسٍ ماطلع شيبها

أدري إنك على جور الدهر ماتنام

مابقي من سنتـك إلاّ عراقيبهـا

حبيب:

لو تخوض المعارك ما عطوك الوسام

لحيتـك ماتعـدّى روس اشانيبـهـا

يوم نبني القصور أنته تبنـي الخيـام

العلوم الثقيله ماانـت ضـاري بهـا

محمد:

مااشري الباعه اللي حايره ماتسام

كل تاجر يبيع ابها ويشـري بهـا

يوم تبني قصورك يا عريب العمام

البيوت المشيّد ويـن اطانيبهـا .

\


وسلامتكم

الموضوع الأصلي: محمد المسعودي x حبيب العازمي | | الكاتب: يوسف الصامل | | المصدر: شبكة بني عبس

[المشعل]

محاوره وابيات رائعه لشعراء رائعين

لاهنت يوسف على النقل والاختيار الجميل

تحياتي لك

[ناصر الخياري]

تسلم رائع ....

[ابو بيان]

مشكور على نقل المحاوره بين شعراء غنين عن التعريف وتقبل تحياتي

[جراح الخياري]

راااائع .....................