[العالم الفلكي]

بسم الله الرحمن الرحيم

السلام عليكم ورحمة الله وبركاته

هذه المحاورة بين الشاعر الحر النداوي والشاعر هويدي بن صبح

الحر النداوي

ياسلام الله برخصة سـلام=يتعب الذيب ويضيق فمه
ياشعيل ان ماحفظت الخطام=مابلش بشعيل من يخطمه

هويدي بن صبح

مرحبا ترحيبت أهل المقام=وكل شاعر حازمن محزمه
ياجملنا اللي نبالـك سنـام=سيفنا ياذا الجمل يقسمه

الحر النداوي

ياهويدي وش حصل في جهام=يوم براق المزن مرزمه
لو نعرضها القديمـي شمـام=مات عنتر وان بقى مسيلمه

هويدي بن صبح

يالنداوي صلو الناس شام=من يعدلهم يضيع انسمه
جعلها فاللي يبيع الكـلام=وين علمن من قبل يزعمه

الحر النداوي

الرجل يثبت بصلـب العظـام=وان بدى الازم يرز اعلمه
شفت من دونه عجاج وعسام=مير حنا غاربه نوسمه

هويدي بن صبح

يالـنـداوي كـيـف راح الـحـمـام=عقب مرك يم واد الرمه
كـان بيـض الديـك كـبـر النـعـام=استعد لموجة العولمه

الحر النداوي

مابغيته عقب مالخرب حـام=وان لقيت الخرب لا ترجمه
كيف صفرك ثار وسط الحزام=لن بنيت الجدر لاتهدمه

هويدي بن صبح

من رقد من تحت غصن البشام=الجذيبه خوفنا تردمه
مايفيد الطق فوق اللحام=كود باللي لاسطت تقطمه

الحر النداوي

ياخوي الجنب جلا الظـلام=باسبورتك خلنا نختمه
أشهدنك شاعر أهل المقام=من سلايل صبح بن عجرمه

الموضوع الأصلي: الحر النداوي + هويدي بن صبح | | الكاتب: العالم الفلكي | | المصدر: شبكة بني عبس

[القنبله]

بيض الله وجهك
يالعالم الفلكي
علا التنسيق
وشعار عمالقه مافيهم كلام
وتقبل تحياتي

[العالم الفلكي]

وجهك ابيض يالقنبله ومشكور على المرور والتعليق

[بندر بن صبح]

محاوره اكثر من رائعه من شعار حزب الشباب


صح لسان الحر النداوي




صح لسان هويدي بن صبح


محاوره نقض وفتل ومعنى

ومشكور يامشرفنا الغالي على التنسيق


والله لايخيب لك تعب



تقبلوا مروري

[المبتدي]

الله يعطيكم العافية يا شعارنا
والله يبارك في جهود مشفنا الغالي
وتقلو تحياتي

[الحر النداوي]

اقتباس من مشاركة القنبله بيض الله وجهك يالعالم الفلكي علا التنسيق وشعار عمالقه مافيهم كلام وتقبل تحياتي

ماعليك زود تلميذيك الحر النداوي يشكرك على المرور وشرفته طال عمرك

[الحر النداوي]

اقتباس من مشاركة الجدي محاوره اكثر من رائعه من شعار حزب الشباب صح لسان الحر النداوي صح لسان هويدي بن صبح محاوره نقض وفتل ومعنى ومشكور يامشرفنا الغالي على التنسيق والله لايخيب لك تعب تقبلوا مروري

بيض الله وجهك يالجدي على مرورك والكلام الطيب

صح بدنك شرفتني بمرورك

[الحر النداوي]

اقتباس من مشاركة المبتدي الله يعطيكم العافية يا شعارنا والله يبارك في جهود مشفنا الغالي وتقلو تحياتي

الله يعافيك يالمبتدي

شرفت بمرورك طال عمرك