[ابوبيادر]

اليكم هذه القصه منقوله

بنت الشبرمي وأسمها دوسة والشبرمي هذا يقاله محمد بن حمد بن سليمان الشبرمي زيزوم الشبارمه أي أميرهم رجال ٍ كريم ومشهور وعائلة الشبارمه مايحتاج من يمدحهم لأنهم على ماقيل " حربة ٍ شاقةٍ عن نفسها " .. من سكان سميره على حدود حايل الآن .

القصة وقعت بوقت حجيلان بن حمد أمير بريده هاك الحين بحدود 1200 وعليها زود , لأن حجيلان يوم جت الدوله العثمانية أو التركية و وصلت إلى الدرعية عام 1234 هـ ورجعت أخذت حجيلان معهم وكان حاكم بريده ذاك الوقت .

كان فيّه حنشل سطو على بعض البيوت وأستباحوا حلالهم , وذاك الوقت الأمن شبه معدوم ماهو مثل الحين أمن وأمان يالله من فضله .. الحنشل سطوا على حدى البيوت وسرقوا الغنم وساقوها لين وصلوا لبيت الشبرمي والرجال مثل ماقلنا كريم ومشهورٍ بالكرم وبابه دايماً مفتوح أستظافهم الشبرمي وقلطهم وأكرمهم .... أهل البيت المسروق راحوا للإمارة عند حجيلان وحجيلان كانت له سلطه وله هيبةٍ ماهي بسيطة أرسل حجيلان الخدّام وهم رجال الإمارة اللي يخدمون الناس ... أقتصوا الجرّه جرّة الغنم لين وصلوا عند بيت الشبرمي .

السلام عليكم وعليكم السلام .. من اللي عندك يالشبرمي ( يقولونه الخدّام )
قال ماعندي إلا ضيوفي حيّاكم الله أقلطوا .. قالوا لا هذولا ماهم ضيوف هذولا حنشل سارقين بيت فلان بن فلان وماخذين حلاله وقصّينا جرّة الغنم ولقيناهم عندك والحين لازم أنك تسلمهم لنا نشوف شغلنا معهم . قال الشبرمي مايخالف أنتم الحين أقلطوا وعيّنوا خير وما يصير إلا كل خير أن شاء الله .

بنت الشبرمي سمعت أبوها ومادار بينه وبين رجال الإمارة دقت الجدار وجاء أبوها وش السالفة يابنت قالت أنت وش ناوي تسوي .. قال والله يابنتي أبي أسلمهم لحجيلان . قالت أنت ماتدري لو سلمتهم لحجيلان يبى يقال اليوم وإلا بعد سنه أن محمد الشبرمي سلّم ضيفانه ويحكى به في المجالس ؟؟ قال وش السواة يابنت , قالت رح وسلّمهم الحلال وقل ضيّفاني عندي وأنا اللي أبي أسلمهم للإماره عقب باكر .

طلع الشبرمي وسلّم الحلال لخدّام الإمارة وقال ضيوفي أنا اللي أسلمهم عقب باكر لحجيلان بنفسي ولو ماسلمتهم تعالوا وأخذوني وأسجنوني بدالهم . أقتنعوا الخدّام وطلعوا من عنده .. ورجع الشبرمي لبنته وقال والحين وش السواة قالت أطلع لضيوفك وأخذ منهم عهد أنك لا طلبتهم يجونك .. رجعت الشبرمي لضيوفه وأخذ عهد منهم وقالوله عهدٍ علينا متى مابغيتنا لنجيك ولو حطك حجيلان في السجن لندخل بدالك ... طلعوا الضيوف ( الجنشل ) من عند الشبرمي .

رجع الشبرمي لبنته دوسه قال والحين يابنت وش السواة قالت الحين أركب ذلولك وحطّ بريده كلها على بذراعك الإيمن وأنصى سعود بن عبدالعزيز حاكم الدرعيه آنذاك وأدخل عليه وعلّمه بالسالفه كلها .. قال وإذا طالبني وهاوشني وقال وقال .. قالت إذا شفته قال كذا قل هذا كلّه سبايب بنتي وقّل له هي اللي تقول :

بعذر السحاب لو ترزم ولا هل
..................... وبعذر والي العرش لو ماسقانا
أخذ الدخيل وداخل البيت ماحل
........................ لولاه يأمن جانبه ما نصانا
المرة الأخرى يجنب إيلا ذل
...................... ما ضاقت الدنيا عليهم حذانا
تحزموا ياالغوش لو ما لكم دل
....................... لـو مـرشد حـي بسيفه حمانا

طلع الشبرمي للدرعية ودخل على سعود بن عبدالعزيز ولقى عنده طلاب العلم والمشايخ وأهل الأدب وهو على كرسيه يقضي حوائج الناس .. سلّم عليه قال له الأمير وش عندك ؟ قال الشبرمي ياطويل العمر أنا ضيّفت لي ضيفان وبالأخير دريت أنهم حنشل والسالفة كذا وكذا وكذا والحين خايف ٍ من حجيلان لايسجني ... قال الأمير أجل أنت حاط لك ولايه هناك للحناشل والسرقان كل من سرق زبن عندك وضيفته .. قال الشبرمي ياطويل العمر والله أني ناوي أسلمهم مير هذي كله سبايب بنتي حسبي الله عليها .. قال أعوذ بالله وش دخل بنتك في السالفة ؟؟ قال بنتي هي اللي قالت لي كذا وكذا وهي اللي تقول :

بعذر السحاب لو ترزم ولا هل
..................... وبعذر والي العرش لو ماسقانا
أخذ الدخيل وداخل البيت ماحل
........................ لولاه يأمن جانبه ما نصانا
المرة الأخرى يجنب إيلا ذل
...................... ما ضاقت الدنيا عليهم حذانا
تحزموا ياالغوش لو ما لكم دل
....................... لـو مـرشد حـي بسيفه حمانا

قالوا الحاضرين والله هذي بنت ٍ سنافيه ياطويل العمر .. وصار كل واحد يرمي له كلمةٍ طيبه في حق بنت الشبرمي .. قال الأمير سعود بن عبدالعزيز بنتك هي متزوجة ؟ قال الشبرمي لا والله مابعد أعرست .. قال الأمير أجل رح وشاورها ...

وأعرس عليها الأمير سعود بن عبدالعزيز ذاك الوقت وانتهت السالفة على خير .. حسب ماسمعتها من الراوي اللي بدوره موثقها وسامعها من رواة قبله لأن السالفة هذي عمرها فوق الميتين سنه .

وشكرا

الموضوع الأصلي: بعذر السحاب لو ترزم ولا هل | | الكاتب: ابوبيادر | | المصدر: شبكة بني عبس

[عبد العزيز]

بيض الله وجهك على هالموضوع المتميز

[ابو محمد العريض]

بعذر السحاب لو ترزم ولا هل
..................... وبعذر والي العرش لو ماسقانا
أخذ الدخيل وداخل البيت ماحل
........................ لولاه يأمن جانبه ما نصانا
المرة الأخرى يجنب إيلا ذل
...................... ما ضاقت الدنيا عليهم حذانا
تحزموا ياالغوش لو ما لكم دل
....................... لـو مـرشد حـي بسيفه حمانا



مشكور ابو بيادر على القصة


والقصيدة



تحياتى

[ابوبيادر]

تحياتي لكل من
عبدالعزيز
ابو محمد العريض

[فهد المويسه]

قصيده رائعه

وتقبل سلامي

[ابو رائد]

بيض الله وجهك على القصه والقصيده الرائعه واتمنا لك التوفيق

[ابوبيادر]

مشكور اخوي فهد المويسه على المرور والرد

[ابوبيادر]

مشكور اخوي ابو رائد على المرور