[محمدالذيابي]

اللـي فقدنـا مـن نبـات ونواويـر= ماهو على المولى صعيـب رجوعـه

الله مـن قلـب هجوسـه طوابـيـر= ميعادهـن بيـن العتيـم وهجـوعـه

قالـوا تفكـر قلـت عنـدي تفاكيـر= أشوف شـئ مـن خطانـا وقوعـه

قلـت الحقيقـة يالوجيـه المسافيـر= قلبي ليـان وشـاف شـئ يروعـه

شفت الجفاف مكسر القشـع تكسيـر= والنفس ماهي من قضاء الله جزوعه

وادي الرمة جوه عجـاج ومعاصيـر= يبسـت جراجيبـه وماتـت قشوعـه

حمضه عليه من السوافـي عثاميـر= يا باعـث الأمـوات تبعـث جذوعـه

مدهـل مجاهيـم تــلاد ومغاتـيـر= وحمـر مرابيهـا هدايـد افـروعـه

يوم الوسـوم تنثـر الوسـم تنثيـر= والعشب ينبـت ماتكامـل اسبوعـه

ويوم القلوب نظاف مايقـف الخيـر= يطيـح وسـم ولا تقطـع تبـوعـه

واليوم وبل الغيـث مثـل الطباشيـر= قامـت تلـوث بالمناقـع انقـوعـه

الشكـوى لله صـار بالجـو تغييـر= دايـم كتـام وغيـر الجـو نـوعـه

واصل الخطا منـا تهـاون وتقصيـر= قليـل مـن يحسـن لربـه ركوعـه

نشقى ورى الدنيا وهي مابهـا خيـر= والموت يدنـي للنفـوس البشوعـه

وعنـد المحاسـب ماتفيـد المعاذيـر= ينشف جما العاصي وتطفي شموعـه

واللي غناته سحـت ومـوال تزويـر= لـه ساعـة مـاذاق حلـوه يزوعـه

يـدري بهـا لاودعـوه الحفافـيـر= والقبر ضكه مـع محانـي ضلوعـه

فـي ساعـة مابـه تقـدم وتأخيـر= يفقد بها الرجال مجالـس ربوعـه

وعن ماعمـل مالـه مفـر ومعابيـر= ما ينفعـه جمعـه وهيبـة جموعـه

قدامـه الجنـة وقـدمـه زمهـريـر= والله يعلـم ويـن يكتـب نجـوعـه

يارب تهدينـا علـى حسـن تدبيـر= نطلب عظيم الشان خوفـه وطوعـه

يالله يــارازق عــوج المناقـيـر= ياكافـل رزق النـفـوس القنـوعـه

يامـن بتقديـره تكـون المقـاديـر= ياسمـع الداعـي وخالـق سموعـه

تزيـل شـدات السنيـن المعاسيـر= يامن لـك المسلـم يوجـه خشوعـه

تمدنـا يـارب رحـمـه وتيسـيـر= غيـث يعـم المملكـة فـي نفوعـه

يارب من قل المطـر نشفـت البيـر= نشف الثرى والدرع ماتـت زروعـه

ومات الخشاش وضاق في عشه الطير= يشكي علـى رب السمـوات جوعـه

والبـل مصارفهـا نخالـه وشعـيـر= واحوارها بالشبـك تـذرف دموعـه

مثل السجين يلوح بيـن المواصيـر= والا البهايـم للمـقـدر خضـوعـه

حاطت عليه اذنوب نـاس مباصيـر= حاله صخيـف وحنـة أمـه تلوعـه

ذنـب الأوادم لـه عواقـب وتأثيـر= والعمـر فتـرة والحيـاة مخدوعـه

وحنـا بشـر مالله خلقنـا تصاويـر= واللي يخـاف الله يطبـق شروعـه

والله محذرنـا عـن الكـذب تحذيـر= والحسـد والغيبـة وكبـر وميوعـه

للشاعر/بدر الحويفي ...رحمه الله

الموضوع الأصلي: وادي الرمه جوه عجاج ومعاصير... | | الكاتب: محمدالذيابي | | المصدر: شبكة بني عبس

[ابن سعيد]

نقل رائع

وعسى الله يرحمنا

ويرزق وطنا

بيض الله وجك يالذيابي

[فلاح الرشيدي]

شكرآ لك أخي محمد الذيابي
ورحم الله بدر الحويفي
قصيده جزله ومعبره عن الواقع

[ناصر خنيفر]

احسنت ياذيابي الاختيار هو توفا حد علمي قبل سنه وهو حي الله يرحمه حي اوميت عز الله انه شاعرفحل

[ابو عبدالعزيز]

يالله يــارازق عــوج المناقـيـر= ياكافـل رزق النـفـوس القنـوعـه

يامـن بتقديـره تكـون المقـاديـر= ياسمـع الداعـي وخالـق سموعـه

تزيـل شـدات السنيـن المعاسيـر= يامن لـك المسلـم يوجـه خشوعـه

تمدنـا يـارب رحـمـه وتيسـيـر= غيـث يعـم المملكـة فـي نفوعـه

شكرا لك على نقل هذه القصيده للشاعرالكبير/بدر الحويفي المحمدي الحربي رحمه الله وسلمت يمينك أخي محمد على ذوقك الراقي

[نشمي الرشيدي]

قلـت الحقيقـة يالوجيـه المسافيـر= قلبي ليـان وشـاف شـئ يروعـه

شفت الجفاف مكسر القشـع تكسيـر= والنفس ماهي من قضاء الله جزوعه

وادي الرمة جوه عجـاج ومعاصيـر= يبسـت جراجيبـه وماتـت قشوعـه

حمضه عليه من السوافـي عثاميـر= يا باعـث الأمـوات تبعـث جذوعـه

صح لسان الشاعر
وتسلم على نقلك وذوقك الرائع
احترامى

[محمدالذيابي]

شاكر لكم مروركم جميعا


دمتم كما تحبون

[عايض بن صالح]

الاخ محمد الذيابي الله لايهينك

اختيار موفق اسالله العلي العضيم

ان يغيث بلادنا بالامطار وقلوبنا بالايمان

انه سميع مجيب الدعاء

رحمة الله على شاعرها