[ابو براك الرياض]

مــــحـــاورة مــطـــلــق الـــثـــبـــيـــتي مــــــــع عـــوض الله ابـــو مــــشـــعــــاب






مـــطـــــلـــق الـــثـــبـــيـــتـــي


مرحبا من عتيبيـن وربعـه عتيبـه
عد نون من المنشا تزاحـم مزونـه
احسبني غريبن في ديـارن غريبـه
واثرني جوف دارن حامياته حصونه







ابــــــــو مـــــــــشــــــعــــــاب


البقا بالعميل اللـي علومـه عجيبـه
يوم غنى بزين الصوت تعجب لحونه
انت مابين ربعن مثل نـارن لهيبـه
والدفا من ورى راسك وساعات دونه







مـــطـــــلـــق الـــثـــبـــيـــتـــي


انت يالشاعر اخو شقير والا صحيبه
يوم شفتك بكحل الشام تكحل عيونه
لا تهز الصميل ولا تخض الغبيبيـه
اللبن كلكـم يانـاس مـا تعرفونـه






ابــــــــو مـــــــــشــــــعــــــاب


اعرفه من قديم الوقت وانته قريبه
والدليله كساك بمشلحه من متونه
لا نخض الصميل ولا شربنا حليبه
مير كلف به العتبان ماني زبونـه






مـــطـــــلـــق الـــثـــبـــيـــتـــي


ضيق مني عسى تغدي ضلوعك حطيبه
والحسودي نطقه بالعصا فـي قرونـه
انت ياللي تودي العلم مـدري تجيبـه
لو كسيناك ثوب الطيب غيرت لونـه






ابــــــــو مـــــــــشــــــعــــــاب


الزعل والرضا ماهو علينـا غصيبـه
والحسودي حسودي والعرب يكرهونه
في ثيـاب المعـزه ماشكينـا غليبـه
مير ثوب تقولـه غامضاتـن ردونـه





مـــطـــــلـــق الـــثـــبـــيـــتـــي


لا تغني مع العشاق يا عـود شيبـه
ويش عذره ليا شافوه يعكز بشونـه
ان بكيتو مصيبه وان ضحكتو مصيبه
كيف يضحك غشيمن طايحاتن سنونه






ابــــــــو مـــــــــشــــــعــــــاب


خل عود الرضا يطرب ويلقى نصيبه
يقضي الوقت قبل انه تقفي ضعونـه
كل ماشفت شايب رحت دايم حريبه
من طبوع الشباب العود ما يرحمونه






مـــطـــــلـــق الـــثـــبـــيـــتـــي


الحرامي عرفته يـوم فتشـت جيبـه
وان سترته شكيل النـاس مايسترونـه
فيك ياراعي المشعاب شكـن وريبـه
جعل من خان بعض الناس حظه يخونه






ابــــــــو مـــــــــشــــــعــــــاب


الحرامي ليا شال السريقه تعيبه
مير لاتستمع في عالمن يضلمونه
الثبيتي سواة اللي يدور ذهيبـه
كل مافك باب اهل البلد يقفلونـه

الموضوع الأصلي: مــــحـــاورة مــطـــلــق الـــثـــبـــيـــتي مــــــــع عـــوض الله ابـــو مــــشـــ | | الكاتب: ابو براك الرياض | | المصدر: شبكة بني عبس

[عبس404]

محاوره رائعه ومشكور يا بو براك

[ابو براك الرياض]

اقتباس من مشاركة عبس404 محاوره رائعه ومشكور يا بو براك

مشكور على المرور

[فهد المويسه]

محاوره رائعه وممتازه

والله يعطيك العافيه

وتقبل سلامي

[ابو براك الرياض]

اقتباس من مشاركة فهد المويسه محاوره رائعه وممتازه والله يعطيك العافيه وتقبل سلامي

مشكور على المرور