[دايم العز]

قال الرشيدي من بني عبس مجناه = والفارس اللي من بني عبس جده
عنتر اليا ولت على السيف يمناه = يمضي بدربه ما يجي من يرده
ياما زرع الرَّعب والخوف بعداه = وياما حرم خصمه عن الزاد لده
هذي أفعول الجد نذكر سواياه = وأفعالنا من منهجه مستمده
حنّا ترانا لابة اللي ذكرناه = غصبٍ على العدوان لو ما توده
عدونا في كل ميدان ننصاه = حتى الجبل من فوق راسه نهده
عدونا دايم بلاقدام ناطاه = وصدره بسيف الهند حنَّا نقده
نسقيه سم العلقم اللي طحناه = يشرب مرارتها ونوصله حده
ناسم على كبده من النار عرقاه = حتى يعاف النوم فوق المخده
يعاف حلو النوم لو كان يبغاه = يسهر طوال الليل ما نام خده
ودخيلنا لامن وصلنا حميناه = اللي يبيه بكل قوه نصده
والضيف نعرف واجبه ما نسيناه = له كل غالي بالكرامه نمده
والضيف له حشمه وتقدير يلقاه = حتى يروح بدربه اللي يوده
والجار محشومٍ ونرفع سجاياه = له عندنا قيمه وقدر وموده
نستر عيوب الجار بالعين نرفاه = وان غاب حنَّا باللوازم نسده
وخوينا لوزل ندمح خطاياه = خــوينــا منــا وفيـــنــا نــعــده
ولا نفتح الباب الذي فيه ماذاه = بابٍ فتح للشر نسعى لسده
ترى البحر غصناه والدر جبناه = البحر نعرف كل جزره ومده
وراع الفعول الطيبه ما جحدناه = الفارس المعروف حقن نعده
والعدل حكمه في طريق المساواه = ومن ما عدل مبناه بالظلم هده
وكل القبائل بالشجاعه مسماه = وكلٍ رجوعه يم ساسه وبده
واليوم ذئب الضان ما ياكل الشاه = خذ الخبر مني وهاته وده
الذئب هذا اليوم ما نسمع أعواه = كلٍ يفصل ثوبه اليوم قده
في حكم أبو فيصل عسى الرب يرعاه = العاهل اللي كلبونا نوده
حكم بشرع الله والحق مشاه = حلحيل ما ينحال والسيف حده
دستوره القرآن بإخلاص يقراه = وشريعة الاسلام له مجر هده
فهد إلى منه ومر ما عصيناه = تلقا القبيله بالأمر مستعده
لامن زعل نزعل ونرضا على ارضاه = ونمشي مطيعينه على كل شده
هذا كلام الصدق بأولـه وأتلاه = ماقول غير الصدق بأول مشده
والحمد للي تطلب الناس حسناه = الخالق الرازق جزيلٍ بمده
اللي خلق آدم من الطين سواه = جميع ما بالكون عارف بعده
اللي جعلنا أخوان والشكر لله = أخوان بالإسلام وضدٍ لضده

الشاعر/ عبيدالله دعيع الرشيدي

الموضوع الأصلي: قال الرشيدي.(للشاعرعبيدالله دعيع) | | الكاتب: دايم العز | | المصدر: شبكة بني عبس

[مسندالعويمري]

جزله من راس جزل

صح لسان شاعرها عبيدالله دعيع الرشيدي


ولاهان دايم العز



ننتظر الجديد الجزل



وتقبل فاااااااائق احترامي وتقديري

[عبيد الله دعيع]

بارك الله فيك يادايم العز: دايم مشاركاتك جزله أشكرك جزيل الشكر وصح لسان شاعرها والقبيلة تستاهل قبيلة التاريخ والمجد والمرؤة والشهامة العربية الأصيلة
لك مني خالص التقدير وأوفر الأحترام :p :p :p :p

[الولد العبسي]

صح لسانك على القصيده :p:p:p:p:pn2006 78:p:p:p:p:p

[عبدالعزيز بن شري]

جزله من راس جزل

صح لسان شاعرها عبيدالله دعيع الرشيدي


ولاهان دايم العز
ننتظر الجديد الجزل

[أبو فايز العويمري]

[القزم]