[علم شبكة عبس]

علم شبكة عبس

سلام تسليمة وفا للي لهم قدر ٍ وطيب=والطيبين اخوان واجب نبتدي باخبارها
العام الاول يالعميد اللي نزل رتبة رقيب=لو قيست البدله عليك اشلون صك ازرارها

قسورة الغاب

يا مرحبا ترحيبتن تفرق طليبن من طليب=ترحيبتن تاصل كبار القوم قبل اصغارها
العام الاول قمة النايف معداها صعيب=واليوم بقعا كل ما هب الهوا اطفاء نارها

علم شبكة عبس

انته تقوله والسوالف سم داب وناب ذيب=بندقك هالمره تخيب ولا وزنة عيارها
ايطيب جرحك من صدوف الوقت ولا ما يطيب=اجنازة الميت تبا تصعب على قبارها

قسورة الغاب

بعض الاوادم ما تروح بعيد نلقاها قريب=لو بحلقت حمر العيون وغيرت بشعارها
خل الجنازه بالقبر لا تنبش القبر وتشيب=رجل ٍ على درب السنع لا يختلف معبارها

علم شبكة عبس

دامك زعلت امن الحقيقه ما على الدنيا غريب=لا تنتحي دام الاوادم باقيه في دارها
الله يبارك فيك والاخبار بالصدر الرحيب=بعض المصايب للعرب ما نقصت مقدارها

قسورة الغاب

انته زبونن محترم حضر هنا وانا الطبيب=والمشكله لونها تكبر نفك صرارها
عطني علومك كلها عطني علومك يالحبيب=مدام صدرك كبر نجد وجردها وقفارها

علم شبكة عبس

انته طبيب ولا عرفت ادواك للجرح العطيب=بكره تموت الناقه اللي روحت بحوارها
اليا رقيت الرجم الاسود شب نارك يا شبيب=يمكن يجيك امن الطراقي والسبايب نارها

قسورة الغاب

انا دواي امفارق الانذال والوجه الكئيب=لو الذيابه في يمين القافله ويسارها
انته وراك تحرث المشهاب والمعنى نجيب=ياللي سكنت المقبره والعلم خلف اسوارها

علم شبكة عبس

ديس المنيحه صرها والطاس مليان ٍ حليب=مكه وطيبه ما بقا الا تعترض زوارها
لو هلت المزنه على الضلعان ما سال الشعيب=والمشكله بالجاره اللي ما تواطن جارها

قسورة الغاب

يا راعي الشنه لحونك ما يغنيها السبيب=ما تجذب الحجاج لو يمك تلد انظارها
حنا رجال العرف منواخذ رديين النصيب=لو تنكر الجيره وزا بقبالها وادبارها

الموضوع الأصلي: محاورة علم شبكة عبس والشاعر قسورة الغاب | | الكاتب: علم شبكة عبس | | المصدر: شبكة بني عبس

[مجرم زمانه]

مبدعين بما تعنيه الكلمه
شكراً لكم

[بروفسور الشعر]

بيض الله وجيهكم كلام من ذهب