[*العبسي*]

السلام عليكم ورحمة الله وبركاته

الكل يبي يستغرب من عنوان الموضوع أكيد ويقول ياولد خوينا وش فيه

فعلاً حبايبي الكرام فيه ناس مثل الزيت الذي يتكون من مغلي الزيت والبصل

وهذا ذكرني مره من المرات كنا جالسين على الفطور اثناء الدوام وذلك بوجود

المدير المباشر وقد تم تقديم الفطور ومن ضمن الفطور الفول القلابة وكان في

علبه بلاستيكة وكان ثلثين العلبه فول والثلث الآخر زيت حتى أتذكر لونه أحمر غامق

وبعد فصل الزيت عن الفول في علبة ثانية وكان المقدار كما هو معروف ثلث العلبة

قام واحد من الشباب يتحدى وآراه الآن في مخيلتي وهو يقلب علبة الزيت بيده اليمنى

لابارك الله فيه ويتحدى من يقوم بشربه وقام واحد من مقاريد الموجودين واللي هو أنا

محدثكم وقلت أنا بشربه بدون تحديك بس خلني أفطر وبالحاح من المدير ومحاوله من البقيه

بثنيي عن قراري وتوضيح مدى الخطورة أصريت على شربه وبعد الفطور تم ماتم واخذت العلبة

وبجرعة واحدة وكأنني بهذهـ الجرعة قد حررت فلسطين من براثن الاحتلال وبعد شربها والموت

جالس قبالي يناظر فيني بدأت بسرد الأكاذيب بأن له طعم خاص ولذيذ حيث انه يسهل حركة المرئ

وخذ من كلام المدح والتمجيد حتى أن البعض منهم يقول ليتك تركت لي ولو القليل ودي أستمتع بما

وجدته من لذهـ وبعد مضي ساعة تقريباً مر من عند مكتبي المدير وقد رآى مابي من بؤس وقد أصفر

وجهي وكان يكلمني وأنا بلشان في نفسي وقال ياولد انت أكيد مرضان لكن ياتروح للمستشفى والا

ريح بالبيت الى أن تتضح الرؤيا وننتظر ماتسفر عنه هذهـ الجرعة اللذيذهـ قلت بس وخر عني أنا

أتصرف وشوي والموت يخاليني يقول هاهـ هالحين والا شوي قلت ( ولد ياولد ) تكفي خلني اشوف عيالي

وبعدين لكل حادثاً حديث وعلى البيت بسرعة فائقة تكفين يا ام فلان شوفي لي حل قالت وش بلاك

عاد أنا ماعلمتها بالتحدي والجولات والصولات مع علبة الزيت قلت كان فطورنا زايد شوي فيه الزيت

وهات هذا شاهي مر وهذا عنزروت وهذا ليمون وهذي نونخه وكانت هذي الأشياء بإعاز من الطبيبة

الوالدهـ رعاها الله وخذ عندك اسهال ليس له نظير حرقه في المرئ عزوف عن الطعام حتى الماء كان

يجرحني وأنا أشربه وبعد يومين متتابعين حمدت الله تعالى على تقبل دعواتي بالنجاة من الموت

وخذ عندك زملاء العمل بعد التطمين من قبلنا وتتبع حالتي الصحيه هالحكاوي اللي غطت على ليلة

وألف ليله وأنواع الضحك والسخرية اللهم لاشماته وكل هذا فعلي بيدي ما احد غصبني على هالفعله

الشينه عاد ما أبي ولا واحد يتشمت فيني تكفون خلوها صن مغطى

وكل هذا اللي جرالي جرالي بعد مدة وبنفس الصيغة ولكن بطريقة مختلفة وهي أنه فيه واحد من البشر

أعرفه عز المعرفه وأكثر ولكن فشلني لابارك الله فيه وهو أني كنت ودي أصلح موضوع له مع ناس بعد

ماحطوني بالواجهه وقالوا ما أحد يقدر عليه غير هاك الرجال اللي هو أنا وبعد تخطيط وأخذ وعطا من الربع

لكي أتبين الحقيقة وجمع بعض الحجج والبراهين رحت لهذا الصديق الذي أشبهه بزيت الفول سابق الذكر ولكن

لاحياة لمن تنادي ووالله العلي العظيم إن قصدي كان أصلاح الله يهدي الجميع ولكن خاب أملي بذلك الزيت

قصدي بذلك الصديق بعد أن كنت أمون عليه

وبعد هذهـ الحادثة رجعت الى البيت وقد هالني ذلك الصديق وسبب لي ماسببه لي الزيت وقلت تكفين يا أم فلان

انا رجع لي ما أصابني من ذلك الفطور عاد أنا ماعلمتها إن لي صديق أمون عليه كذا وكذا قلت عشانا اليوم فيه

شحم كثير واللي طبخها سواها بخاري وحاط زيت معها ويرجع نفس المنوال بعد أخذ المشورة مع الطبيبة آدامها

الله ذخراً لي ويجعلني من أبر أولادها بها آمين

الموضوع الأصلي: صديق غطى على الزيت المغلي مع البصل !!!! | | الكاتب: *العبسي* | | المصدر: شبكة بني عبس