[الاكاديمي]

روائع الشاعر الكبير عيد بن مربح الرشيدي

بديت=
بديت بآسم مكون الأنـس والجـان=بأسمه يعاهـد كـل جـنٍ مـرودي
وردٍ علـى ماقالـه فـلان وفـلان=ضعوف النفوس اللي تغث الكبـودي
تاريـخ متجـرد وتأليـف عميـان=كنه علـى ظلـم العبـاد محـدودي
أخص من سطر بالاحقـاد ديـوان=حقـود والمصـدر كتابـة حقـودي
اليا أنعدم مبدى العقيـده بالانسـان=يقـدر يسـوي مايسـوي اليهـودي
ولأهل الوفا والصدق شكراٍ وعرفان=وتحيـةٍ عـطـره وبـاقـة ورودي
نعم رشيدي من بني عبس غطفـان=من قيس ابن عيلان شجرة جـدودي
تحت مسمى عبس واشجع وذبيـان=تلقى عنا وينـي ومجـدي وجـودي
هرجٍ على صدق وحقايق وبرهـان=حقايـقٍ تدمـغ دمـاغ الجحـودي
حقايقٍ تروي معانـي خبـر كـان=بخطـوط كوفيـه بصـم الحيـودي
حصل المنافس والسبب سبة حصان=سبة فرس وحصان راحت فهـودي
وجانا بغا التركـي ودارن الاكـوان=دون الكرامـه والوطـن والعـدودي
ومر الجفاف وراحوا البـدو فرقـان=كل ٍ طوى بيتـه بظهـر القعـودي
وزاحوا لنا من غبر الايام فرسـان=احدٍ حـدر وأحـدٍ توجـه سنـودي
شالوا على فلك البحـر لأم درمـان=يبـون وديـانٍ سقتهـا الرعـودي
ثم استقـروا بيـن كسـلا وحلفـان=يتلـون شـف مطيـرات البـدودي
ونزلٍ نزح للسيف راضي وقنعـان=مـن البحـر للدبـدبـه للنـفـودي
قوم ٍ لهم في ساحـة المجـد ميـدان=يـوم ان كـلٍ دون حـده يـذودي
صالوا وجالـوا واستقـروا بهـدلان=دار الصبـاح اللـي تلـم الوفـودي
ونزلٍ تورث منزلـة عبـس بأبـان=ونزلٍ بوادي السر سوى السـدودي
وفي كل دار ألنا مـوارد وعربـان=وتاريخنا بارض العرب له وجـودي
وحنا بقينـا بالمنـازل والاوطـان=بأقسى الظروف مواصلين الصمودي
ترمز لنـا الكفـه هويـه وعنـوان=الناس تعـرف والعوانـي تـرودي
يوم الجزيره بين تسعيـن شيطـان=نطعن ونطعن دون هاك الحـدودي
من المدينـه حدنـا ضلـع حبـران=مايمرها الا مـن خضـع للقيـودي
ومن حرة الكوره لشرقـي مرغـان=بعد امرنا يردون ماهـا الـورودي
ومن ذاق ضرب سهومنا راح ندمـان=يمـوت مافكـر بلـم الـجـرودي
اسلاحنـا قـو العزيمـه والايمـان=والا عددنـا بالحسـاب مـعـدودي
ودخيلنا ممن عن الضيم مـا يهـان=وسلامته نبـذل وراهـا الجهـودي
وخوينا مايكظـم الغيـض زعـلان=وقصيرنـا نعطيـه حـقـه وزودي
حنا هل المعروف ورجال الاحسـان=قومٍ نجود اليا أنعـدم كـل جـودي
وأمجادنا غصبٍ على كل مرضـان=شعاع ذري في عيـون الحسـودي
ويوم ارسل الله مسلما لـم الاخـوان=سرنا ورى صقر الجزيره جنـودي
من ضمن جيش الفيصلي نسل عدنان=والله يشهـد والخلايـق شـهـودي
وننعم بحكم محاسبـة كـل غلطـان=ولا عاش من يجرح كرامة سعودي

يالمور=
يالمور خذ نمرة الخامس من اليمنا=تحتر تبرد تـرا الاخـلاق خربانـة
والله لتنـدم وحـنـا ماتفاهمـنـا=مـادام ميقـوع ماعقبـت قلبانـه
ولاتشكي الظلم حنا الوقت ظالمنـا=دليل ظلمي تراك تشـوف برهانـه
البارحه مع ثلاث اوجـاب مانمنـا=مكينتك تشتغـل والعيـن سهرانـه
ان دبرت شدنـا يرخـى محازمنـا=نروى بدلون يضيّـع مـاه شقانـه
وان اقبلت خصمنا يقضي لوازمنـا=صداقتة تستحـل بيـوت عدوانـه
عـزالله انـا مـن الدنيـا تعلمنـا=درسن صعيبن على التلميذ نسيانه
الله يجيب الصديـق اللـي يعلمنـا=ابنشده عن غريب وحـال عربانـه
لولاه في بيـت جدانـه محطمنـا=ياوسع صدري عليه و بيت جدانـه
لو قصدنا البعـد مرينـا وسلمنـا=مير البلا شوفـت الديـان ديانـه
ياتـل قلبـي=
ياتـل قلبـي تلـة الجمـس بثنيـن=في يد عديم وشاحـن لـه زقايـر
وقف يشيل الحمل من بيـن حديـن=وقبل غروب الشمس والعج طايـر
بنشر مابين المركزييـن الغريريـن=وركب اسبيره كن ماهـوب ذايـر
وقامو عليه اللي على الموت جسرين=مسلحـيـن ومـدديّـن ذخـايـر
سبعة جموس موديل سبعه وسبعيـن=ومن فوقهن تقريب سبعـة حظايـر
قام وركب من فوق صافي البليتيـن=اللي حساسه مثـل حـس النذايـر
قال انتهض لعيون مريوشة العيـن=امـا طلعنـا بربـح والا خسايـر
عامين وانا اخـذ مقاضـي بالديـن=واليوم في تسديـدة الديـن حايـر
مع الوعـر ممشـاه ميـه وستيـن=ومع السهل طبلونه اللي انت خابـر
لقيت للقرحة=
لقيت للقرحة علاجن طبيعي =فرقى ختوش الربع وأنذال الأصحاب
قلبي ليا مني نزرته يطيعي =يضغط على نفسي وترتاح الأعصاب
وأنا مع أهل العرف راسي رفيعي= والوقت عادي فيه حساد وأذناب
يابن خلف يانسل عوداً شجيعي =يالنادر اللي من هقى فيك ماخاب
تعال أبيك وخل صدرك وسيعي =نبي نتناقش بالقضية والأسباب
قضية عنها الدلايل تضيعي = ماني غني عن رأي عكفان الأشناب
وإفهم عليٌه قدر ماتستطيعي=وتراي ماسندت لك لولا الإعجاب
وعطني مرادك بالقطار السريعي=وعساك تلقى لي عن الريع مجناب

ياعلاوي=
ياعلاوي نجـد علك مراديـم السحـاب=ديرةٍ فيهـا تربيـت من يومي صغيـر
ياطبيب النفـس وشهـو عـلاج الأكتئـاب=أعطني وصفة علاجه ترى وضعي خطيـر
عشت في غربة حقايق وفي وضع اغتراب=والتجارب عرفتنـي علـى الشـي الكثيـر
شفت ناسٍ ترسم الورده ابصدر الغراب=والغراب أليا بغيت ألمـس الـورده يطيـر
أستفدت من الذيابـة ومـن نبـح الكـلاب=وأستفدت من الرغا وأستفدت مـن الهديـر
ولاكسبت إلا معرفـة عزيزيـن الجنـاب=ولاخسرت إلا معرفـة عديميـن الضميـر
أقترب لامقترب شيـن بعـض الأقتـراب=أبتعـد لامبتعـد شيـئ فـي حقـي كبيـر
ياسؤالي كل ماطرحـك ماألقالـك جـواب=مالي إلا الصبر وأهل الصبر توعد بخيـر
وصف خبلان الرخا مثل ضحضاح السراب=يفرح العطشان شوفه يحسـب انـه غديـر
للردي لو هو ولد عم لاتحسب لـه حسـاب=كم عزيـزٍ ذلـه الوقـت بضيافـة حقيـر
الـدروس أنـواع تطبيـق والا بنتـسـاب=بس أنا اللي طبـق الـدرس قـدام المديـر
يا (غريب )أن مت شلني اليا هاك الهضاب=حط قبري بين عنتر وأبـن عمـه زهيـر
حطني في مقبرة (( عبس)) مروين الحراب=حطني بأعلى علم (( عبس)) مروين الشطير
وان عسرك الوقت نطلع ونرجـع للتـراب=ويـارث الأرواح الألاه الأول والأخـيـر
اول الدنيا طـرب ووسـط الدنيـا عـذاب=وأخرتها الموت والقبـر وحسـابٍ عسيـر
ياجزيـل الملـك ياكافـل رزق الذباب=ياإلاهي مـن عذابـك برحمتـك أستجيـر

هبت عواصيف=
هبت عواصيف الظلوع الهدافي =وإخترت من وزن المعاني ثقيلة
وأبدأ باسم ربي وأكمل مطافي=وأعوذبه وألوذبه وألتجي له
ياعالم الأسرار ماعنك خافي=لجيت لك ياعز من نلتجي له
أسئلك سترك والعفا والعوافي=أسئلك بأسماك الكبار الجليلة
الصبح أبا اواجهك عريان حافي= دخيل وجهك يامنجي دخيله
في ليلة فيها فراشي لحافي=في منزلاً سقفه حمار النثيلة
ياواحداً فضلك على الكون ضافي=يارب وسع فيه ليلة نزيله
أسئلك تمن روعتي وإرتجافي=أسئلك ما سال اليدين البخيلة

سر ياقلـم=
سر ياقلـم واكتـب بـذوق ولباقـة=ورحب وهـل وخـل للحبـر دوراق
رحـب بخـط مبرزيـن الصـداقـه=ماهي صداقة قوم ملحـق ولحـاق
لـوإن مالـك بالمشاكـل عـلاقـه=عيباً لياهش الخوي نهظـة السـاق
والبيت نفس البيت ستـره رواقـه=ودك يصير البيت مستـور بـرواق
وانا بلشـت بيـت صعـب الغماقـه=عجزت لاكشف مدخله باي الاشنـاق
ياليـت حامـد حـط للبيـت طاقـه=ان كان ريّح عيد من عشرة اطيـاق
لالا ماظنـة يعـتـرف بالعشـاقـه=لان المحبـة كلهـا هـم واقــلاق
قد درت في بكـرا سريعـن فواقـه=دقيقتـيـن وماتعـداهـن افــواق
الصبر جيش إعـداك يعـدم سباقـة=وبعد الظلام الشمس تبدا بالاشـراق
(يمكن عقيـد القـوم يلـغي اتفاقـه=ويرفع حضر منع التجول بالاسواق
يقوله الـي صبـرت الوقـت ذاقـه=تطعّم الحلتيـت فـي مـر الاريـاق
تعلمـو فينـي أصدقـاي الحـلاقـه=مغرور غافل وانتبه عقـب مافـاق
اغتر فـي بعـض العلـوم الرقاقـه=لينن راسـه صفـره مـوس حـلاق
والله ما انسى من لحقنـي طراقـه=الله يلعن نـوب تحسيـن الاخـلاق
ابعـد ليـاأذاك الرفـيـق بنفـاقـه=وشلون لو ماالله خلق( بعد وفراق)
كانـك معـزم =
كانـك معـزم للسفرقلـي قبـل تمشـي بيـوم = وكانك ماتكره خوتي يمكن تحصـل لـك خـوي
ياحبني للبـر والمجـلاس فـي عـال الرجـوم = وان حدني وقتي صبرت وقلت حيـل الله قـوي
ياكثرماجمع نصيبي مـن رجـال ومـن رخـوم = وماعندي الا طـب بدواشـب نـاري واكتـوي
صبري على نفسي الحالي تحت سرب من التجوم = في لابةً طرماء والااسمـع غيرسرحـان يعـوي
اخير مـن هرجـة مقلبـة الحقائـق والعلـوم = الحاسديـن الحاقديـن اهـل الحنيـك الملتـوي
لاعل نفسً عن كـلام الهـزل ماتقـدر تشـوم = يـارب تكتمهـا كتـم يـارب تزويـهـا زوي
نفسي معودهاعلـى بـرد العقـارب والسمـوم = مولود بالحـره مجـرب بـرد راس المقـروي
حرة غطفـان الحصينـه بالدفـاع وباالهجـوم = يجـل الجـراد الياسمـع بركانهـا يـدوي دوي
لاطالت الشطه ترى قلبي على الفرجـه عـزوم = اجنب الراس الـردي وارد علـى العـد الـروي
وامشي على حسب العقيده والمبـادي والسلـوم = وارد على وضح النقاء وصل دلـوي ورتـوي
لاتحسبوني نمت يخصامـي تـرى مافـي نـوم = لو تنظرونـي ملتحـف تـراي صـلاً منطـوي

بسم الله=
بسم الله الرحمـن سبحانـه عليـه الأتكـال = عـلام ماتخفيـه نظـرات العيـون الخينـة
عزالله أني مابغيت الشرح لين الهـذر طـال = وياجب علـي المنطمـس للمسلميـن أبينـه
يابن مناحـي ماتغيبنـي حـرام ومستحـال = ارسل ندا عبسـي لـراع المشكلـه بمكينـه
عبس أبريا من هفوة الهافي وعذرالأحتيـال = ان خاف ربه وأن دفن حظه بوسـط دفينـه
حطيت للجهل أحتمال وظفت للخبـث أحتمـال = وطلع بريصيـن يطقطـق بالصفـا بلسينـه
البن يطلع له حثل والمجتمـع يفـرز أحثـال = واللي يبي راس الجبـل ماينسـدح ببطينـه
مالي علاقه يأزرق النيـه بتحريـف التـلال = نفس المسمـى دوره فـي ديرتـك وتعينـه
خلك معايه واقعي وأضرب على نفسك مثـال = وأذا بغيـت البينـه بابـن الوسيـط البينـة
وأذا أنها خدشة نسب حنـا نسبنـا بالعـلال = جيناتنا ماهـي علـى قلـة سنـع متجينـه
الثار والفتنه تطاردنـا علـى طـول الليـال = وحنا جبل لـو الصواعـق تظربـه ماتلينـه
وأذا أنهـا سرقـة وطنيـة وتعقيـدة حبـال = حنـا سعودييـن يـوم أن الزهـاب طحينـه
سبع بيارق كبرن يمشـن وخطاهـن ثقـال = مـع الأمـام الفيصلـي والأمـة المتديـنـة
ياقلعة الأسلام هل ياجد بـك المسلـم ظـلال = الكذب كيف نحاربه والصـدق ويـن نعينـه
رغم الظروف القاسيه نصبر مثل صبر الجمال = نموت تحيـا المملكـه فـي تاجهـا متزينـة
بقيادة الحر الأبي رمـز العروبـة والنضـال = كل المشاكل قدم أبو متعـب تصيـر هوينـه
وقـت راسٍ=
وقـت راسٍ فـي طـرف برقـا بطينـه مــواط ذيـابـه = أبيـضٍ ملـمـوم مقـلـوز مرتـكـز مرتـفـع متعـلـي
مدهلٍ للذيب سرحـان ليـا راد العشـا قبـل العشـا عدابـه = يقشعر الراس من جيلانـه اللـي بعضهـا للوطـا منهلي
يبتدي واد الرمه ليا انحدر واصتفـق مـن مفيـض شعابـه =وجنبه الغربي ليا سال سيله وانحدر والتـوى للثمـد ينحلـي
قلت أبلقى بالجبل لأهله وسم والا رسم وألقـى عليـه كتابـه = مادرست الفيزيا والكيميا لاشـك عقلـي قبـل أعـدي قلـي
شفت للكفـه بقايـا مرمسه عـن سؤالـي تـرد الجابـه = تقـل تعطينـي تحـيـه وفـيـة يــوم جـيـت تهـلـي
قلت عبسي قـال عبسـي جبـل غطفـان هـو وأصحابـه = خـذ كـلامٍ مـن هـرج فيـه قــدام الـعـرب مـازلـي
قلـت أبـي برهـان قـال أنحـدر للـقـور والا الـلابـة = والرمـوز اللـي تحـصـل تـراهـا تستحـيـج الحـلـي
قلـت تستاهـل لحـن مهجـور مبـطـي مـحـد غنـابـه = الرعيـل اللـي يغنـى علـى البـحـر الطـويـل مـولـي
ياوجودي وجد من ضايقـه بالطلب قـدم العـرب طلابـه = فـي زمـانٍ شيـن وابـن الحـلال مـن الظـروف مقلـي
أووجودي وجد من شاف غبنه وأحتزم واعتزا واخذلوه اقرابه = ياحيـاةٍ فيـك يـا هالظلـع ليـن الـروح مـن هالجسد تنسلـي
ابغى افارق ضجة المدن والعالم النصابة الكذابة = وارفع الاذان بارضٍ خلية خالية بالدجا وأصلي
واطلب اللي ماخبرته عن اضيوفه يسكر بابه = والله اعلم قبل نمشي كم خوياً بيمهلي

هذي مداهل=
هذي مداهل صاحبي هـاك الايـام=سلم علـى ضلعـه قـدم لاتعـداه
ياقد قلبـي قـد ذرعٍ مـن الخـام=في كف بيـاع ٍ يقـده لمـن جـاه
وياونتـي ونـة يتيـم ٍ ومنـضـام=في حالة قشرا على الشين تقصـاه
مرجوجة من ساس عوبـا ونمـام=من بغضها لامـه تجـره بعلبـاه
محروم من كل الصلة جد واعمـام=وابـوه ثـور ٍ ماتفهـم لشـكـواه
اشاركـه نفـس المشاعـر والالام=اشاركه بالضبـط نفـس المعانـاة
على حبيبٍ شالتـه سـود الايـام=اقفـى وراح ولاتفاهمـت ويــاه
يزورني بالحلم تسعة عشـر عـام=حبٍ على وضح النقا كيف ابنسـاه
طيفه يقابلني على جسـر الاحـلام=وشاشة خيالي تلتقط بسمـة شفـاه
ادري المحبـة كله اوهـام بـاوهـام=نظرات عطف ٍ من سنا النار مسقاه
وبحر المحبة مااقطعه كـل عـوام=كم عاشق ٍ حصل بشاطيـه مثـواه
والله يالولا العيب ونصوص الاسلام=اني لاجهز عـدة الشـر وانصـاه
انصاه لو يحكـم عليّـه بالاعـدام=رب ٍ بلاني فيـه يدمـح خطايـاه
وياضلع انا سايلك بديـار الانسـام=حافظ على عهد ٍ بقربـك قضينـاه
سايلك باللي عالم ٍ غيب الارحـام=قدام يوم الحشر لاتجيـب طريـاه
والله ماتدري من قعد بك ومن قـام=اسرار غيرك في ركونـك مخبـاة
واحذر لاتاخذك الروابع والاوهـام=مايفضح العشـاق غيـر المبابـاه

الموضوع الأصلي: روائع الشاعر الكبير عيد بن مربح الرشيدي | | الكاتب: الاكاديمي | | المصدر: شبكة بني عبس

[الاكاديمي]

هناك مشكلة في خاصية تنسيق القصائد أتمنى من الدعم الفني معالجتها وشكرا للجميع
الموضوع منقول من موقع قبيلتي وتحت اشرافي وتنسيقي واختياري
على الرابط
http://www.alboshran.com/