[عيد بن عبيد]

السلام عليــكم ورحمة الله وبركاته.....,,


أمــا بعــد..,,


حبيـــت ان اضع بين ايديكم احد الرديات الجميــلة بين الشاعرين

عيد بن عوض بن مربــح الرشيدي

و

تركي بن عبدالله الشدادي



تركي بن عبدالله الحارثي

ياراكب اللي فوقـه الخـرج منشـور=يزهاه مـن شغـل العـذارى فنونـه
تشدي ظليـم مرتعـه نايـف القـور=متـذيـر ٍ قناصـتـه يخـبـرونـه
تجفل ليا اوحت فوقها يصـرخ الكـور=وان حسها الراكـب تفـرج حزونـه
من سيف جده سجهـا طلعـة النـور=واحفظ جوابـي ليـن تلفـي زبونـه
ملفاك من يروي شبـا كـل مشـذور=يـوم الملاقـا لابـتـه يشكـرونـه
تلقاه في بيت ٍ علـى العـز معمـور=على الكـرم والجـود شيـد ركونـه
الشاعر اللي هاجسـه يغـرق بحـور=بنـات فكـره لانـطـق ماتخـونـه
تنقاد له جزل المعانـي علـى الفـور=كن الجواهـر فـي حشـاه مخزونـه
كنـه علـى خيـرة قوافيـه مامـور=بالشعـر يامـا يطربـنـي لحـونـه
نخيـت قـرم ٍ بالمواجيـب مـذكـور=رايه نبـا عبـر الصحـف ينشرونـه
اشكي لابن مربح خلف كـل منعـور=الحال عقـب الزيـن قفـت ظعونـه
ياعيد قلبي من هوى البيض مسمـور=والدمع مثل الغيـث لاارهـت مزونـه
حالي بعد فرقا الغضي قايد الحور=حالة غريق ٍ يلعب الموج دونه
عليه جرحي داخـل القلـب محفـور=ماله عـلاج وشفـت منـه المهونـه
جرح ٍ علاجه حار بـه كـل دكتـور=عجـزوا دكاتـرت الهـوى ياجدونـه
قالو علامك قلـت يالربـع مسحـور=في حـب مـن ياعزوتـي تجهلونـه
راعي جبين ٍ في دجى الليل لـه نـور=تنكـب كيانـي نظـرة ٍ مـن عيونـه
رمشه ليا اغضى به على الخد مسطور=يتـل بـه قلبـي وتكثـر شطـونـه
ونهده كما التفـاح بالصـدر مزبـور=ومثل البرد بيـن الشفايـف سنونـه
يابـو جديـل ٍ كنـه الليـل منـثـور=ياعـود مـوز ٍ ناعمـات ٍ غصونـه
كانـت ليالينـا معـه كلهـا بــدور=واليـوم مافيهـا قـمـر يذكـرونـه
اربع سنيـن وفوقهـا عـدة شهـور=نسبـح بلـذات الـغـرام وجنـونـه
حب ٍ على وضح النقا فـوق مشهـور=على شرف وعـن الرذيلـه نصونـه
ايام كانـت لـي معـه ورد وزهـور=قبـل الـعـواذل حبـنـا يعرفـونـه
واليوم وقفوا دونهـا اعـداي طابـور=ولاانفـك بـاب لوصلنـا يغلقـونـه
من بعد ماكانت لنـا افـراح وسـرور=عجزوا مراسيـل الهـوى ياصلونـه
اقفى هوى بالي على البعـد مجبـور=عن وصلنا اشـرار المـلا يمنعونـه
بعد بنت في قلبـي ابـراااج وقصـور=ناويـن اهلهـا مابنـت يهدمـونـه
طاعوا بنـا نقالـة الحكـي والـزور=نـاس ٍ هدفهـم شملـنـا ينكبـونـه
واضحك وانا قلبي من الغيض مفجـور=واجحـد صوابـي واتحمـل طعونـه
واقول خلـو كـل ماصـار مستـور=وقولوا لها اني بخيـر ياللـي تجونـه
مابيييه يتكـدر ولـو عشـت مقهـو=عـن حالتـي تكفـون لاتخبـرونـه
قلب ٍ عجز في حبها يسمـع الشـور=ماطـاع فيهـا كـل مـن يعذلـونـه
امسى كما قصر ٍ من الناس مهجـور=العنكبـوت معشعـش ٍفـي ركـونـه
خافوا به الله ياهـل الظلـم والجـور=لـو هـم يهـود اظنهـم يرحمونـه

الرد


عيـــد بن مربــح الرشيدي

ياراكب اللي فوقه الخـرج منشـور=عليه مـن شغـل العـذارى فنونـه
اشعل شناح ايديه ماتلمـس الـزور=فـج العضـود موسعـاتٍ متـونـه
الفخـذ قطمـا والاذن راس كافـور=وعينه تقل جمـر ٍ هلـه ينفخونـه
ناب الفقار وذيله أشقـر ومحشـور=مايميزونـه غيـر مـن يقربـونـه
والبطن كنه مـن شوايـاه ممخـور=دايـم مهجنـة الهجـن يدرجـونـه
وحبل بطانه تسعة اشبـار مشبـور=مقلـوز ٍ يعجبـك شكلـه ولـونـه
يسرح من الخفجي زبد صدره يفـور=يشـدى غـزالٍ بالسلـق يطردونـه
وعليه عبسـي ٍ محنـك وممـرور=الـدرب مايحتـاج مـن ياصفونـه
زهيبـه بـر ٍ مطحـن ومـصـرور=ودهن وتمر مـن الفصـم ينظفونـه
والماء بشنه والعصا عـود باكـور=وكلاش فيـه المحرقـات مخزونـه
صبح اربع ٍ مقفن من الخبت بحـدور=قدمـه بجـده لابــة ٍ يحتـرونـه
عند الشدادي حط خرجـه ومشكـور=سلم على خشمـه بلطـف وليونـه
مد الجواب وقلـه الوضـع مقـدور=مـن ظـن فينـا مانخيـب ظنونـه
مـده لقـرم ٍ لاتكبـر ولا غــرور=ريف الضيوف اللي عشاهـم يبونـه
راعي صحون ٍ وسطها يصبح السور=يضحون تالي زادهم فـي صحونـة
تركي ليـا منـه هبـا كـل مثبـور=عز القصير وعـز مـن يزهمونـه
من لابة ٍ وسط الجزيـرة لهـا دور=الطيب في غالـي الثمـن يشترونـه
حـوارث ٍ وافيـن مافيهـم قصـور=المجـد يارثهـم وهـم يارثـونـه
واللي مثل شرواه ماعنـه مذخـور=حق ٍ علـي مشاركـه فـي غبونـه
ماجور ياريـف المساييـر ماجـور=ابشر بجاهـي والسلـف والمعونـه
ياعاشق ٍ في سكرة الحـب مغمـور=عضيض غلـث ٍ وافيـات ٍ حتونـه
يعول كما تعول خلوج ٍ مـن الخـور=شافـت ولدهـا قدمهـا يصلخونـه
عقب اروحت دمه على دمـه تـدور=مـا الله هداهـم بالزمـل يدفنونـه
ويقنب قنيب الذيب في راس عنقـور=ذيـب ٍ عيالـه بالعـوا يشحـذونـه
عدا وعود باشهـب الملـح منـزور=لولاه هـف مـع الشفـا يذبحونـه
الحب سهم ٍ يطعـن انـاث وذكـور=وتنتـج عنـه علـه بليـا سخونـه
ومع الغروب يصيب راعيه حاشـور=يقرا آية الكرسي وترقـص سكونـه
لاشك في سلم العرب شبه محظـور=راعيـه لـو انـه بـري يتهمونـه
ويصير في نظراتهـم تقـل مجـدور=ما تقل ذاقـوا مـن مذاقـه نمونـه
قالوا به العشـاق كلمـات وسطـور=صوارم ٍ حـوض الـدرك ياردونـه
والعرض مثل البنك يحتـاج ناطـور=ولا يحسبون رجـال مـن يهملونـه
وحنا بجكم وشرع والكـف مقصـور=ومن زل سلطـات البلـد يسجنونـه
اصبر وعادي يربض الحـظ ويثـور=وان ثار فـك القفـل لـو يقفلونـه
وعليك باللي يطلبـه كـل معسـور=ترى الأمـر بيديـه والكـون كونـه
ومعك اختصرت الرد من غير مقصور=ارجي عسى اهل المختلف يسمعونـه

بواسطة الشاعر عبدالله مزيد (الظامي )

تحياتي لكم

الموضوع الأصلي: الرشيدي والحارثي...رديه رائعه | | الكاتب: عيد بن عبيد | | المصدر: شبكة بني عبس

[ابواثنين]

مشكووووور ياعيد ابن عبيد
علي نقل الرديه التي
ابدع فيها
كلا الشاعرين

[ابوعبدالله الشويلعي]

مشكوووووور أخوي الغالي عيد على النقل للشاعرين












تقبلوا تحياتي أبو عبدالله الشويلعي

[سلطان العايضي]

مشكووووور أخوي عيد على هذا الموضوع الرائع والذي يحمل بين طياته قصيدتين من أجزل القصائد ...

لاتحرمنا من جديدك فنحن بإنتظارك دائماً ,,

[مبارك الشويلع]

الشاعر اللي هاجسـه يغـرق بحـور
..,,..بنـات فكـره لانـطـق ماتخـونـه





وعليـه عبسـي ٍ محنـك وممـرور
..,,..الـدرب مايحتـاج مـن ياصفـونـه




صح الله لسانك يالمبدع

ولسان شعرائهاا الزجلين


ولاهنت على النقل الجزل


وتقبل فااااااااااائق احترامي وتقديري

[عيد بن عبيد]

مشكووووور ياعيد ابن عبيد
علي نقل الرديه التي
ابدع فيها
كلا الشاعرين
ابو ثنين

تستاهل اخوي الغالي
تقبل خالص التحية

مشكوووووور أخوي الغالي عيد على النقل للشاعرين
ابو عبدالله

العفوا وتستاهل اكثر

مشكووووور أخوي عيد على هذا الموضوع الرائع والذي يحمل بين طياته قصيدتين من أجزل القصائد ...

لاتحرمنا من جديدك فنحن بإنتظارك دائماً ,, سلطان بن مخضر

كلك ذوقك ...نسعى لتقديم الافضل

الشاعر اللي هاجسـه يغـرق بحـور
..,,..بنـات فكـره لانـطـق ماتخـونـه





وعليـه عبسـي ٍ محنـك وممـرور
..,,..الـدرب مايحتـاج مـن ياصفـونـه




صح الله لسانك يالمبدع

ولسان شعرائهاا الزجلين


ولاهنت على النقل الجزل


وتقبل فااااااااااائق احترامي وتقديري


لا هنت ابو عبدالله
ونسعى لوضع المتميز لانك متميز

تحياتي لكم

[صادق الوعد]

تسلم اخوي
عيد بن عبيد
على نقل الرديه
لشاعرين

[عيد بن عبيد]

اقتباس من مشاركة صادق الوعد تسلم اخوي عيد بن عبيد على نقل الرديه لشاعرين

لا هنت اخوي صادق
وانت دائما صادق بوعدك
اهلا وسهلا بك
في كف صفحات موضوعي

مع التحية