[العريض]

السلام عليكم ورحمة الله وبركاته :
وبعد
اعزائي الكرام , الجيب كثيره القصائد به وتوصيفه كثير ولكن هذه القصيده لها رونق خاص وجمال غير طبيعي وتوصيف دقيق للغايه وهي للشاعر / حمود بن نايف الغضوري العنزي

واليكم هذه النادره

يالعن ابوه الشاص الالفين واثنيـن=عـز الله إن المبدعيـن أبدعوبـه
تساعدوا في صنعه أطلق خبيريـن=باشـراف عالـم مبتـداه ابتدوبـه
برافسـورٍ مختـرع لـه براهيـن=فعله حصانه عن خطـاه ورسوبـه
حصل شهادة علم مع خبرة سنيـن=وله جايزة نوبل زمـان محسوبـه
مـن عائلـه بالعلـم دايـم ملميـن=تاريخـهـم بالعـلـم توارثـوبـه
أبـوه يابانـي سياسـي قوانـيـن=في دولته يصـدر نظـام العقوبـه
والأم نـازيـة موالـيـد برلـيـن=وخوال خاله مـن مواريـث كوبـه
صحيح ناقص لأن ماهو على الدين=عالـم وعلمـه مـا يكفـر ذنوبـه
أما اختراعاته على الراس والعيـن=يشكر على أفكـاره ودقـة أسلوبـه
اصخر بصنع الجيب من قبل عامين=بالسر حتـى دولتـه مـا دروبـه
لين انتجه وانتاجه أزين من الزيـن=رغـم اختـراع الغـرب تفاجؤبـه
من جودته له بالصحافـة عناويـن=بالسوق ربح كـل مـن تاجروبـه
رجـح موازيـنٍ وهبـط موازيـن=كل الـدول بالبورصـة ساهموبـه
نزل من الـدولار بالسعـر ثلثيـن=ودعم رصيد اليـن نوبـه ونوبـه
لاندالكروز اللـي تعشقـه ملاييـن=قبـل يجـي للشـرق تباشـروبـه
من دولتـه جابـه وكيلـه بتأميـن=لدولـة آل سعـود ملفـاه دوبــه
أسعد نفوس الـي لرؤيـاه شفقيـن=وكـلٍ دعالـه بالجـزا والمثوبـه
آباصفه كلـه مـن يسـار ويميـن=لو إن في وصفـه عليـه صعوبـه
بين كما ابو الهول مبنى الفراعيـن=كله حجـر مابـه حديـده وطوبـه
وبين المواتر سكبته تجلـي البيـن=سكبة زعيم ومحتفل فـي خطوبـه
واللون بيج وبويتـه مـن بلاتيـن=ضد الحرارة والهـواء والرطوبـه
وحمار خطه مثل سيـل البراكيـن=والا حمار الشمس حـزة غروبـه
وكبوته أنحف من حجم بديه شويـن=ورفارفـه متناسقـة مـع جنوبـه
ونظام دفع الحركـة دفـع تربيـن=فريد مـن نوعـه وهـم طوروبـه
وماطور صماماته أربع وعشريـن=وبخاخ مصروفـه يقنـن شروبـه
وتحضيرتين أمام وخلاف عكسيـن=وستة عشر جنطه على قـد هوبـه
ومساعـدات أربـع وقـدام ياييـن=ودفرنس وفريـول يحـرك كعوبـه
وكوابح أي بي اس تعمل نظاميـن=وبكـل هـوبٍ للكوابـح انبـوبـه
وونشين سحب ويسحبن وزن طنين=وهزاز يمنع بالصحـاري نشوبـه
وحمولتـه بالكيلـو الفيـن والفيـن=على الشدايد فيـه عـزم وصلوبـه
من قوته يصبر على الزين والشين=الطقـس ماهمـه جليـده وشوبـه
متعـدد الأغـراض للاتجاهـيـن=مافيه عيب أقـول ذا مـن عيوبـه
لاقفى مكوكٍ كـل طقمـه مفاديـن=علم الكواكـب والفضـاء كلفوبـه
ولا أقبل كما الجاكوار والا السقستين=في وقت غـارة والعـدو ولعوبـه
ولا اعرض شهابٍ مرسلٍ للشياطين=ضرب غلاف الجو واحدث شبوبـه
منوة غريبٍ شـف بالـه بعيديـن=الدرب لو طـول بسرعـه يلوبـه
ما يمنعه لا رمل لا احجار لا طين=غريب ما تمشي المواتـر دروبـه
وان قلت للسواق يالاخو من ويـن=يعطيك علم أرضٍ قفر مـا وطوبـه
ما هو زمالة عايـلات ووراعيـن=ولا هو زمالـة للعفـون وجلوبـه
سلعـة ثمينـة للرجـال الثمينيـن=راع الولع يشريه لـو بـاع ثوبـه
لو أملكـه لـو قيمتـه كلهـا ديـن=أهديـه للـي بالكـرم مجـدوبـه
لو إن ما هـو بحاجـةٍ للمعاويـن=لا شك من قدره لا أعنيـه صوبـه
يستاهله سلطان نسـل السلاطيـن=شيـخٍ رجـال العـرف تشرفوبـه
سلطان سلطـان السخـاء للملفيـن=سلطان سلطان السعد لا اعتزوبـه
له هيبةٍ تخلـف عقـول المعاديـن=وله سمعةٍ لأغلى المعانـي جذوبـه
يمناه غيـثٍ للضعـوف المساكيـن=غيثٍ حقـوقٍ مـا تحـرك هبوبـه
شهـمٍ كريـمٍ وافــيٍ للوفيـيـن=قـدوة وكـل الطيبيـن اقتـدوبـه
محصنٍ بالساس والطيب تحصيـن=مصيون عن درب الردى ما حكوبه
يحمل شعار العز بـأول وهالحيـن=من شجرة آل سعود رمز العروبـه
شقران أبوه أللي على العسر واللين=سـمٍ جميـع الشعـب تفاخـروبـه
شمـر خوالـه ملحقيـن المخليـن=يوم الحرايـب خصمهـم ضيقوبـه
سلطان بن محمد ونعـم المسميـن=ومرقاه مـا كـل النشامـا رقوبـه
سلطان ابو نايف سلالـة كريميـن=حرٍ ما خيـب هقـوة الـي هقوبـه
للمجد في حضرة سمـوه نياشيـن=وللشعر في مدحه مـذاق وعذوبـه
حافظ على تراث الرجال القديميـن=لاحياه ينفق سيـدي مـن جيوبـه
للجيش شخصه من أشـد المحبيـن=من الأصايل كسبه أغلـى ركوبـه
واسطبله الأزرق علـم بالمياديـن=ما قيـل خيلـه بالسبـاق مغلوبـه
اعجاز بالانجاز حسـب القوانيـن=احرازه لسـت الجوايـز اعجوبـه
اهذي طموحات الرجال الشريفيـن=للـي سنـام العاليـات اعتلـوبـه
والجيب سلـع للرجـال الثمينيـن=ولو هو معي والله لا اعنيه صوبـه
وختامها يعيـش نسـل السلاطيـن=سلطان سلطان السعد لا اعتزوبـه
وصلوا على محمـد نبـي الثقليـن=اللـي هـداه المومنيـن اهتدوبـه

حمود نايف العنزي

الموضوع الأصلي: يالعن ابوه الشاص الالفين واثنيـن | | الكاتب: العريض | | المصدر: شبكة بني عبس

[مروان الرشيدي]

لاندالكروز اللـي تعشقـه ملاييـنقبـل يجـي للشـرق تباشـروبـه

من دولتـه جابـه وكيلـه بتأميـنلدولـة آل سعـود ملفـاه دوبــه

صح لسانك

[بنت الكويت]

يعطيكـ ألف عآآفيه اخوي ع القصيده الرائعه ,,,

تحياتي : بنت الكويت ,,

[العريض]

اقتباس من مشاركة مروان الرشيدي لاندالكروز اللـي تعشقـه ملاييـنقبـل يجـي للشـرق تباشـروبـه من دولتـه جابـه وكيلـه بتأميـنلدولـة آل سعـود ملفـاه دوبــه صح لسانك

صح بدنك يشرفني مرورك الكريم لاهنت

[العريض]

اقتباس من مشاركة بنت الكويت يعطيكـ ألف عآآفيه اخوي ع القصيده الرائعه ,,, تحياتي : بنت الكويت ,,

شاكر لك حضورك هلاوغلا

[حب الغموض]

مشكور وتقبل مروري

[بدر بن محمد]

صح اللساااااااااااااااااااااان شااااااعرها
ولاهنت على النقل....
ودمت بصحه وعااااااااااافيه....