[مرشدالمظيبري]

دحيم



سلمنا قدام عرف الضيف نبدا بالتحية
مرحبا ترحيبه تبدا السوالف من بعدها
افتتحنا الملعبة وصفوفها بالحيل حية
وانت يا صياف تنظر برقها وتسمع رعدها


صياف



سلمكم سلم العرب وصل العرب عرف وحميه
والعلوم اللي لها تاريخ ما نحصي عددها
لو فتحنا بابها دلحين نختمها شوية
والبيوت العامرة تبقى ولا نخلف عمدها


دحيم



ما عليكم زود يا صياف والنيه مطيه
من زرعها بر اكيد انه يابو مفلح حصدها
انتها وقت الجهل يا صاحبي والعنصرية
خوذها كلمة صريحة من عميلك واعتمدها


صياف



من عطاك كتاب حسنه ما عطاك كتاب سيئه
والسحاب من السما واللي وراتيما وردها
انتبه لشداد ابوك اللي بظهر العدمليه
لا تزرفل به تحت وبل المطر وتزل يدها


دحيم



لو جمال عقيل من وادي تبوك الياطميه
الهلالية تميز شوقها وتعرف ولدها
ماسك اشداد الاصيل وسيفي اجرد في يديه
والقلوب الحاسدة تموت مايبرا حسدها


صياف


الله أكبر يا ليال الخير مع ذيك الصبيه
يوم بعض الناس يضربها ويرضع من نهدها
لا تقول انك موكل لين تسرح بالرعية
ثم ضربها الطريق وخلها تمشي وحدها


دحيم



كان فيها مشكلة ما هي عليك ولا عليه
يعرفون الناس يا صياف مقرود قردها
لو عمرك طول عمر شعيب ولا ازود شويه
النجوم كثار يا صياف ما تحصي عددها

الموضوع الأصلي: محاورة النجم دحيم الخيـــــــــاري والعملاق صياف السحيمي | | الكاتب: مرشدالمظيبري | | المصدر: شبكة بني عبس

[ناصر الخياري]

لاهنت يابن مظبر.
نقل رووووعة..
صح لسان الشعراء..

[أبوحرب]

هذي المحاورة على مااظن قريبه يعني قبل وفاة أبومفلح لأنه في ذي المحاورة يلوم الشباب اللذين أساؤا للمحاورة في بيته هذا

الله أكبر يا ليال الخير مع ذيك الصبيه = يوم بعض الناس يضربها ويرضع من نهدها

ورد دحيم :


كان فيها مشكلة ما هي عليك ولا عليه = يعرفون الناس يا صياف مقرود قردها

يقول كان فيه إسائه للمحاورة ماهي منك ياصياف ولا مني الناس يعرفون الشعراء اللذين أساؤا للمحاورة


ومشكووووووووووووووور يامرشد

[هاوي شعر]

محاوره قويه بين شعراء كبار
اطال الله عمر الشاعر النجم المبدع دحيم الخياري
ورحمه الله شاعر الخليج صياف الحربي رحمه واسعه
مشكور مرشيد المظيبري على نقل المحاورات الطيبه والجزله وهذا يدل على طيبك ومعرفتك للشعر وتقبل تحياتي هاوي شعر

[ابو بيان]

بيض الله وجهك مرشد على نقل المحاورات الجزله
محاوره جزله وشعراء معروفين
رحم الله صياف الحربي وطال الله عمر ابو عبدالعزيز

[مرشدالمظيبري]

يعطيكم العافية على المرور