[العدالروي]

يالعين لدي ونضري للمراقيب

شوفي خرايمها خليّاً تهاوى

تفجا القلوب مقفلات الدواليب

الي على صكات بقعاء تقاوى

دار الصباء قدام لايضهر الشيب

وتفرّق العربان بعض الفتاوى

داراً علاج اهل القلوب المعاطيب

من دون شوف اجبالها ماتشاوى

صارت علينا مثل حب الرعابيب

لفحة هواها مع هواهن تساوى

فيها رعينا الذود حرش العراقيب

واحيان مع راع الفريق انتخاوى

اهل البيوت مكثرين التراحيب

مقدمة للضيف هبر العداوى

ناساً بطيب قلوبها تملك الطيب

لاجاهم القلب العليل ايتداوى

حيّاً عليهم تطلع الشمس وتغيب

ماوى لمن ضاقت به السبل ماوى

من عقب راحو ماتشوف المعازيب

كم ليلتاً فيها رقدنا مقاوى

على مراح ضعونهم يقنب الذيب

وانا ضلوعي مع قنيبه تعاوى

عليهم عروق الضماير محاطيب

والله مالوم العود راع (الحشاوى)

......................
المعزب صح السانك مدد بلا عدد قصيده شامخه وتصوير ثلاثي الابعاد يعلم الله اني كانني اشاهدها على شاشة خيال الفكر(تمثيل واقع)
مع قراءة هذا النص الواقعي والفريد والمميز
وماتم تلوينه يامعزبنا اقول:بوجودك وجود الطيبين شرواك مازلنا بخير
والحشاوى بخير وكل الله وتقبل اعجابي ةتحياتي

[العميل السري]

اقتباس من مشاركة المعزب مرحبا تراحيب السحاب ياشيخنا وعمدتنا المعتمد والله يابوتركي يابعض المواقف انها تخليك تغني غصب مريت ديرتاً الي عنها اكثر من 25 عام ولقيت شايب اهله نازلين بالهجره وهو يدوج على ديرانه يومنه ابدوي وشباب ويقول مافيه مكان بهالحزوم الا تلقالي دار عشت فيها اكثر من70 سنه واهم شي عندي (الحشاوى) حليّه لونها اسود تقل عليها غيم ههههه يقول كنت اول اعديها يوم ادربل على نياقي واليوم ماقدر اعديها ياالله المستعان رحت صوب اهله ونشدتهم عنه قالو من يوم نزلنا بالهجره وهو ضايقاً باله يقعد يوم ويغيب عنا يومين غير مانروح اندوره وانجيبه ياعزتيلك يابو تركي كان صرت مثله بكره ههههههه

المعزب والله انه ملابط السبب الخوف عليك انت وربعٍ شرواك
بكره يغطي النت الحره..تبثوا اموركم للمنتدى مباشر
والا العمده ماعليه خوف ..من الدائري السابع وردي ههه

صح الله السانك ابدعت وامتعتنا نص فيه خصوصيه وابتكار

وسلوب خاص بشاعر الطبيعه
لك كل الشكر من العميل السري

[وحاه]

على مراح ضعونهم يقنب الذيب

وانا ضلوعي مع قنيبه تعاوى