[صالح عسكر]

الخـــــــــــــــــوه

لف فكري لف مع عقرب الساعة

وآه من همن بروحي يصافقها

يا وجودي وجد من شانت اوضاعه

يخفي العبرة بعينه وتغرقها

او وجود اللي خفياتن اوجاعه

لو شرح هرجته محدن يصدقها

والله ان القلب ضيق على اضلاعه

لج واضلوعه خطيرن تمزقها

والصدر ما عاد يرتاح لو ساعه

خيم الهاجوس بالروح واحرقها

منك ياللي دون سبه طوى شراعه

ما عرفت السالفه وش حقايقها

رحت مع ضحكة عواذل وخداعه

حطتك بين الغروب ومشارقها

سقت لك رجلي ورجليك ضلاعه

يا رفيقي ليه الابواب تغلقها

ما دريت ان الرجاجيل بتاعه

انتهيت وخوتك منت صادقها

اعرف اللي خوته ذخر ووداعه

لو ظروف الوقت حاله تعانقها

رفقته ماهي زخاريف لماعه

بالمعزة رفقته حيل وثقها

خوة اللي يكسب الطيب بذراعه

للمراجل يرتقي ويتحققها

والختام اخضع وخلك على الطاعه

للولي اللي كفلها ورازقها

الشاعر/ عطاالله عمار الفريدسي الرشيدي

الموضوع الأصلي: الخــــــوة | | الكاتب: صالح عسكر | | المصدر: شبكة بني عبس

[عبدالله معزي]

قصيده جميله في منتهى الروعة والابداع
صح لسان الشاعر

[(ابوعواض)]

ماشاء الله


قصيده رائعه وصح لسانك مليون

تستاهل 5 نجوم

[عيد الداموك]

ما دريت ان الرجاجيل بتاعه && انتهيت وخوتك منت صادقها


خوة اللي يكسب الطيب بذراعه && للمراجل يرتقي ويتحققها

صح اللسانك يــ صالح عسكر لو ان لدي تحفظ على هذه الابيات من القصيده
واكرر تحياتي لكــ بقول صح اللسانك ؟
ومن يحط اذنه على كل سماعه & جاه فرقاء مابعدها تجماعي

[بن هادي الرشيدي]

صح الله لسانك يابن عمار شاعر جزل والجزاله ماهي
غريبه عليكم ياربعي الفرادسه لا بالشعر ولا بالفعل
والعلوم الغانمه.
لاهنت.

[شاعر ال عبس]

صح لسان عطا الله الرشيدي

[احمد سبيتان]

صح لسانك وبيض الله وجهك

[الشاعر المجهول]

صح لسانك
دمت بود