[abu eessa]

شليويح

سلام إسلام واكرر سلام إسلام فى الاسلام
على آل سعود والحفل الكريم اللي نغنيبه
حضرنا في مـقـر الجامعه للمجـتمـع خـدام
وسعي الجامـعه مشكور والطيب نماريــبه

خلف

هـلا يامـرحـبـا وأهـلـيـن والـتقديـر للحكام
وأبـثـنـيـها ورحب بالجميع ألـفـيـن ترحيبه
ترى الليله علينا أغلى الليالي وأبرك الأيام
نبي نحيي التراث الشعبي اللي طول الغيبه

شليويح

عسى فيك البقى ياللي نظر عينك إلى قدام
تحكم واطرق الطاروق حتى الناس تمشيبه
أنا الليله بشيرك والغريب أفطر بعد ماصام
ترى شـايبك يـطريله شبابه واختـلف شيبه

خلف
أنا مبطي عن الطاروق منكف من زمان العام
لكـن الـيـوم أبـاخذ مـعـك تـشريقه وتغريبه
أبـعطـيك الـبـشـاره كـان عادله الـشـبـاب وقام
وش تسوي فرحه اللي جت جمال عقيل توميبه

شليويح
أبضرب لك ثلاث أرقام وأنته تعرف الارقام
ولا أنـغـريـت مـنـهـا عـدها غلطه وتجريبه
تحـيـزم بالحـزام وحـطـلك فوق الحزام حزام
سـريـت أمع الـطـريـق اللي يـخيم بالعشا ذيبه

خلف
ترى الرقم الثلاثي لو كتب يطلع ثلاث ارقام
علـيـه مـاتـطـوف وخل عـنك الشك والريبه
تـحـدى واحـدٍ ماجـض جـنـبه مـن قنابل سام
لاكـنـك لاتـشـب الـنار بين أمـطير وعـتيـبه

شليويح
أنـا مـانـي بـعـارف يوم تلحمها بدون ألحام
تنـزل لك سـنـونٍ صـاحـيـه وتـحط تركيبه
أنا خصمك ليا من دروا فوق الحياض حيام
لـيـا مـن بـلاك الله بـمثلـي وش تـسـويـبـه

الموضوع الأصلي: خلف ابن هذال وشليويح | | الكاتب: abu eessa | | المصدر: شبكة بني عبس