[الـشـقـاوي]

آلصمت له عندي معزّه ومقدار
.................... في زحمة الافواه .. يا مزين الصمت !!


لا صار بعض البوح عند البشر عار
.................... لو يشتعل جوفي حشى ما تكلّمت


تعبت من قولة : (علامك) و (وش صار )
.................... وان طحت ما ألقى سوى كلمة (سلمت)


واعذار اخلقها ولو مالي اعذار
.................... مشّيتها مره .. ومرات ما رمت !!


كذبة صباح الخير/ يا صبح الانوار
.................... عذري ليا عدّت ... ليالي ولا نمت


اسهر طوال الليل وضْيوفي افكار
.................... واقول لاْصحابي : نعم توّني قمت !!


ما عاد فيني ألفت .. عْيون واْنظار
.................... يكفي بأني من زماني .. تعلّمت


ان الصدر بيت/ن .. وسكّانه اسرار
.................... نيّام .. بس يصحون لامن تألّمت


يصحون ويناظرهم الجار والمار
.................... وش عاد ينفع سترهم لو تكتّمت ؟!!


آقدّم اقدامي على درب الاصرار
.................... امشي ولكن للأسف ما تقدّمت


(النار قدامي .. ومن خلفي النار !!)
.................... والعمر يمضي بي وانا ... ما تولّمت


يا لين ذاك الحلم في ... لحظه انهار
.................... وانا مع لحظة سقوطه ... تحطّمت


اجروحي اكثار.. وتناهيدي اكثار
.................... لكن على كثر المواجع .. تبسّمت !!


ثم أْلتزمت الصمت .. وعزومي اكبار
.................... ولو يشتعل جوفي حشى .. ما تكلّمت

الموضوع الأصلي: ◊◊◊ آلصمت له عندي معزّه ومقدار ◊◊◊ | | الكاتب: الـشـقـاوي | | المصدر: شبكة بني عبس

[(ابوعواض)]

سلمت والله
بوح رائع
صح لسانها شاعرها ولاهان ناقلها

[الـشـقـاوي]

صح بدنكـ

ومنور يالغلا

[ابوديما]

الشقاوي
مشكور على النقل الجميل
سلمت يدينك

[مسندالعويمري]

ثم أْلتزمت الصمت .. وعزومي اكبار
.................... ولو يشتعل جوفي حشى .. ما تكلّمت

صح السانك قصيده تحمل روائع

[الشمال الشرقي]

صح لسان شاعرها وعاش نقلها

[الـشـقـاوي]

اشكركم ع الطله الحلوه

وربي لا يحرمني منكم

ومنورين يا بعد روحي انتم

[المشعل]

ثم أْلتزمت الصمت .. وعزومي اكبار
.................... ولو يشتعل جوفي حشى .. ما تكلّمت

الله الله على الابياااااااات الرااااااااااائعه
يعطيك العافيه الشقاوي

ذائقه شعريه راائعه
وصح الساااااان شاعرها ولاهنت على الاختيار والذوق الراائع

تحياتي لك