[العالم الفلكي]

بسم الله الرحمن الرحيم

السلام عليكم ورحمة الله وبركاته
اليكم هذه المحاوره بين

الشاعر المعزب والشاعر سرحان


بيت المعنى لشاعر الكبير ناصر صويان الشويلعي

مايغط النور ياغير مكثرة النياح=ناس مبليه وكم ناس فيهم مبتلي

المعزب

عد ماحنت رعود الحيا والبرق لاح=ياسلام الله سلاماً عساه ايجملي
قوم ياسرحان هبت ذعاذيع الرياح=الصدور من الخفايا تغوص وتمتلي

سرحان

عادتي كلمة وفاء باالمساء ولا الصباح=مرحبا ترحيبتً مثل نجمً معتلي
انت مثل الطير والطير خفاق الجناح=مير حذرا لا توقع بغير المنزلي

المعزب

الله أنه يصلح الحال ويدوم النجاح=الليالي المقبله بالتفوال حملي
مايبل عروق كبد العطاشا الا القراح=قلت لك من شان متقول لا ماقلتلي

سرحان

من يكافح تالي الوقت يبشر باالفلاح=وانت قلبك فيه نارً علينا تسطلي
من تعدى الحد نسقيه من سمً ذحاح=وانت في وسط البلد مالقينا لك حلي

المعزب

ياوسيع العرف دنياك محتاجه كفاح=ميتهاون فالمواجيب غير العزلي
من بلاد خوان نوره ليا دار الصباح=كل ابوها ربع ياذيب وخوان وهلي

سرحان

لو درى المرضان في علم دكتور الجراح=كان بفراش المرض ياالمعزب مابلي
الحصان اللي تعثر ترى راعيه طاح=ماحسب للناس حسبه وطاح مسلسلي

المعزب

ودنا نلعبها مثل لعب مظيمظاح=لجل مايشره عليها عليان وعلي
المعاني يشهب اللون طعناً بالرماح=وأنت لو ننقض لها جيت معها تفتلي

سرحان

كيف راع الذود ذوده يرده للمـراح=قبل نور الشمس عنا يغيب ونجلي
المذاهب اربعه كل واحد لي مبـاح=مير خل الشافعي مع طريق الحنبلي

المعزب

مانوردها سواتك على شوف الضحاح=الزوامل عند عد المعزب عقلي
المذاهب خلها واخذ من عندي وشاح=لجل عن ممشى البسيطه واهلها تعتلي

سرحان

موردي من عين هـداج وارد باالسـلاح=والمحاله تضرس اضراس من جذب الدلي
المعزب صاح صيحه عقب سمع الصياح=والمعزب ياهل العرف عارف منزلي

المعزب

ليت سرحان المسمى عن اللعب أستراح=والله الوالي ولا غيره الوالي ولي
انتهى طرق المعاني ولا فيها اقتراح=بس نبغى عقب هذا الكلام نهللي

سرحان

ياالمعزب جبتلي امر مدري اقتـراح=انت ضنك ياعميلي من الحجه خلي
ياجماعه ودي ادعي عساكم للصلاح=كل واحد منكم باالحجول محجلي

الموضوع الأصلي: المعزب××سرحان | | الكاتب: العالم الفلكي | | المصدر: شبكة بني عبس

[خاتم الرشيدي]

اشكرك على التنسيق
وصح الله السنت الشعار

[الشبح]

الله نقض وفتل رائع

بيض الله وجهه الشعراء على هذا الاداء الطيب وصح اللسان الشاعرين

[العالم الفلكي]

اقتباس من مشاركة خاتم الرشيدي اشكرك على التنسيق وصح الله السنت الشعار

العفو يابوعبدالرحمن ومشكور على المرور والتعليق

[العقاد]

تثبيت محاورة المعزب لمدة اسبوعين من تاريخه حيث يعتبر من الخمسه الاوائل والف مبروووك

[سهــــــــــيل]

صحت ألسنت الشاعر ين المعزب و سرحان ومبرووووووووووووك لهم الفوووووووووووز ،،،،،،،،

[(ابوعواض)]

صح الله لسانهم وبيض الله وجيهكم جميع محاوره من العيار الثقيل

[الحر النداوي]

ياسلام محاوره ممتعه

يسلم شعارها
ومنسقها
ومثبتها
والحاضرين هههههههههههههه