[عبدالسلام المهيمزي]

في ليل موته جيت انا بيوم ميلاد = طفل يتيم والبكى في عيونه
صدر عن الدنيا وانا جيت وراد = لاشك نجمه لامع وسط كونه
كني انا والحزن في وقت ميعاد = فقدت فيها غالي يذكرونه
لو يسألوني يوم انا كنت بمهاد = افز بسمه كل ماينطقونه
ياقبر وش ضميت من ذيك الاجساد = الله ياضمت ابوي الحنونه
محتاج له وادري انا عنه ببعاد = النفس بعده بالحياة مغبونه
ادوره باعايده في يوم الاعياد= لاكن تذكرت البشر يدفنونه
كان الألم في داخل الصدر يزداد =وقلبي على الوالد تصافق شجونه
اعاني الحرمان في صبر وجهاد =وانا أحمد الله والملا يشكرونه
اعاند الدنيا وانا بيتم بعناد =نفس العزيز اللي يدوس المهونه
كثر البكا بفقد العزيزين مافاد =ودمعي على خدي تسايل مزونه
ابوي ملفى للأكاريم الاجواد =الطيب ساسه كلهم يمدحونه
بالطيب ماخذها على روس الاشهاد =حر ولد حر طوال ردونه
عساه بالجنه على انهار ووراد =مقره الفردوس والله يصونه

الشاعر عايد المسيلم

الموضوع الأصلي: قصيدة ابوي للشاعر عايد المسيلم | | الكاتب: عبدالسلام المهيمزي | | المصدر: شبكة بني عبس

[سعد الشقل]

صح اللسان الشاعر عايد المسيلم علىى القصيده الرائعه

[عبدالسلام المهيمزي]

صح بدنك ياسعد

ولاهنت علي المرور