[الفجواني]

اليكم القصيدة....

فرحت لك .. وأنا معاليقي حطام

والصدر .. من ما فيه بيّح كنينه



فرحة يتيم ٍ .. ليلة العيد ما نام !

خالاته , وخواله .. مواعدينه



مواعدينه بشت .. وشماغ بسّام

ويلّعبونه .. في ملاهي المدينه
مانام .. واحلامه تحّراه قدام

كنه يطول أحلامه بـ( راحتينه ) !



صبحه تجّلا نوره بـ/ عيد الاسلام

وقبل يروح المسجد : ملّبسينه



جده ما بين العين والجيم واللام

خلّيه يافلانه .. ولا تأخرينه !



تراقبه بـ/ عيونها .. حب وهيام

وعيونها .. ممّا تكنّه / حزينه



"يعرض لها الماضي مثل عرض الافلام "

لـ.. ماضي ابوه وغلاه وحنينه



يرجيه لـ( سنين القسا ) درع وحزام

وجنب ٍ على صكات بقعا يعينه



ابو ثلاث أعوام .. والا 4 أعوام

يغار منه البدر .. من كثر زينه



صلّى وجاء وأمر الله اللي قضى تآم

ماهوب داري عنه .. زينه وشينه



بشته عليه .. مهندم ٍ خير هندام

واللي بـ/ عمره .. كلهم محترينه



يوم اطلعوا للشارع انقسموا أقسام

وأهم مافي القصه ؟ ملّعبينه



تداعب رموشه .. ذعاذيع الانسام

ويابردها .. يوم آيبست شفّتينه



وعلى تراب الأرض بأصبعه رسّام

أما رسم له طير .. والا سفينه



العيد طعمه كان في الشارع العّام

ماهوب عن رغباته .. مقيدينه



رجع ولكن فرحته ضايعه ( دام :

كل ٍ مشى ) وأخذ ولده بـ/ يمينه



صاروا خواله في نظر عينه اصنام

آحيوا بـ.. داخله الجروح الدفينه



ولا عنده الا أمه وناب القهر سّام

جاها يبي منها اليدين الأمينه



شعوره اللي حس به مثل الإلهام

وأول سؤال في باله : أبوي وينه ؟



سؤال : لكن كان مثل النبا الهّام

لازال باقي في المسامع .. رنينه



جته تعدي , ماهو تخّطي بالاقدام

وشالته بيديها .. وحبّت جبينه



أبوك : جاء البارح وقبل الفجر قام

وشرى لك ألعاب , وهدايا ً ثمينه



تراه حبّك وأنت غارق في الاحلام

وراح لـ.. دوامه , والشغل مرسلينه



لحظه .. وهو بين الحقايق والأوهام

والدمع الازرق حاير فـ.. مقلتينه



يمّه : ترى مانمت والعالم نيام

ماجاء .. ولا لمست يديني / يدينه



مدام رقمه معك من بين الارقام

بـ.. أكلمه , يوم إنك تكلمينه !



طاحت ما كن آلها من الصدمه عظام

ولاعاد فيها صبر .. ولا سكينه



قالت بدون شعور وإدراك وإلمام

أبوك ! في تراب القبر دافنينه



العام مات .. ومتّ من موته العام

وكني بعد مامات عني سجينه



أبوك جندي للوطن ضد الإجرام

عطاك عمره دون داره ودينه



تفجّرت من تحت رجلينه ألغام

ولاعاد لي بعده حصون ٍ حصينه



بكّت .. وطاح الدمع من حر الآلآم

وبكى وطاح الكون من موق عينه



كل ٍ عذلها .. بين عاتب ولوّام

تصّبري .. خلي ضلوعك متينه



ماهو صحيح ان الضروره لها احكام

اكبر خطاء يوم إنك تعلمينه



بكره تنسّيه الليالي والايام

هو فيه أحد ينسى حدا والدينه ؟



طير السعد في عالمه مابعد حام

والله يعلم وش تخبي سنينه



أنا كذا ! ساكت وصابر ومنضام

لكن كان الفرق بيني وبينه :



الدمع لـ.. عيون الأرامل والايتام

ودمع الرجل ذل وهوان وغبينه

مما راق لي
اخوكم : الفجواني

الموضوع الأصلي: قصيدة تحذف المدامع حذف< انصح بقرائتها | | الكاتب: الفجواني | | المصدر: شبكة بني عبس

[دانه]

الله يعطيك العافيه اخوي

والله يصبر قلوبهم ويرحم شهدائنا

وعزالله انها هلت دمعتي

[الفجواني]

مشكوره على المرور الرائع .... وعسى ماتهل على غالي

[رسام]

صح لسااانك بالبيخ قصيده روعــه

[غيوض الرشيدي]

راق لي التجوال بين ثنايا حرفك
دمتِ بكل خير

[الفجواني]

تدومين بكل صحه وعافيه .. كما راق لك وجودك شرفني ..

[عادل بن هون]

الدمع لـ.. عيون الأرامل والايتام

ودمع الرجل ذل وهوان وغبينه

[احمد منيف]

صح الله لسـانك ولسـان شاعرها قصيدة راقت لي بالحــــيل

وذكرتني بالقصيدة اللي تقول



او وجد عود يرتكي كل ماقام
على كفوف يديه من كبر سنه

الليا غفل بايامه الماضيه هام
والليا انتبه من غفلته ( جر ونّه )

من عقب ماهو للمغاوير مقدام
الليا غزا صم الرمك يتبعنه

ومروبع يزمي مثل عز لزام
الليا اقبلن شيب الغوارب نصنه

بظهورهن ربع كريمين وحشام
الليا جذبهم صوت نجر يدنه

نجرن مسمينه عوانيه عزام
من كثر مايجذب شراريب بنه

اليوم كل اللي بقي جلد وعظام
والمال خمس اشياه والبيت عنه

ولاله عيال ينصرونه الليا انظام
الا بنات ٍ بالهضاااايم شونه

ياقلب خلك للروابع والاوهام
رفيق درب وكل هم ٍ تبنه

والا انتفض واربط محقاك بحزام
وعن قوم وش سويت خافيك كنه

والشر عنك خلاف والخير قدام
والصبر في وقت المعاناة سنه


ع العموم تسلم يابعدي