[سعد بن عادي]

أنا تعودت أداوي جرحي النازف
وأسامح الناس وألقى الهمّ وآطيقه

ياللي تعذّر وجاي تقول لي آسف
آسف على الجرح ولاّ آسف على الضيقة ؟

[سعد بن عادي]

هو ليه أول حبيب تصير له ذكرى ؟
وإن جيت بعده تحبّ تصير ماتقدَر ..!

هو ليه جرحه هو اللي بس مايبرى ؟
وجروح غيره تجي وتروح ماتذكَر ..!

[سعد بن عادي]

الحزن طوّل وأنا اللي كنت ماطيقه
أصبحت أحبّه وطاح الصبر من عيني

خذني كرهت التعب والهمّ والضيقة
خذني على وين مدري بس ودّيني ..!

[سعد بن عادي]

يضيق صدر الغريب إليا فقد داره
ويضيق صدر الحبيب إليا فقد غالي

ياليت بين البشر والخافق ستارة
وماتقدر تشوف هذا الحزن عذالي

لو أمسح الدمع تارة وأتركه تارة
من يمسح الذكريات اللي على بالي ..!

[سعد بن عادي]

ليتني قبل أجازف وأعشقك مستخير
كان نبقى على طول الزمان أصدقاء ..!

[سعد بن عادي]

غيّرت دنياي صرت أوله وصرت أسهر
صرت أنتظر شوفتك وأكلمك وأشكي

علّمتني كل حاجة بس ابي أكثر
علّمني شلون لافارقتني ماابكي ..!

[سعد بن عادي]

اللي سألني عن أحوالك وأنا ساهي
كنّه ينبّش عن الأحزان في صدري

حاولت أدوّر عذر لو هو عذر واهي
وطاحت دموعي عليه وقلت له مدري ..!

[سعد بن عادي]

الهمّ قصيّت له قصة قصيرة ونام
يافرحة الخافق اللي منتظرك ارجعي

بردان أنا والشتاء ماهو مثل كل عام
العام كنتي معي والحين منتي معي ..!