[النمر1012]

للقرب جنّة في نفوس المحبين
وللبعد نار يحسّها من يطاها
لاتنشد الملتاع عن لوعة البين
لاجات له فرصة ثمينة / وجاها
يسقي ثراك الله / يايوم الاثنين
وليلة ثلوثك / يسعد الله مساها
ساعه / (تقابلنا) / بعد غيبة سنين
وغشى النفوس الضايقة / ماغشاها
في منظرٍ يجرح شعور الغيورين
سالت عْرقْة اهل الحيا . . مع لحاها
من عقب كنّا الصائمين / المصليّن
دنيا الشقا / دارت علينا رحاها
موتى غرام / نعيش فـ جلود حيّيّن
نفوسنا تمشي . . ونمشي وراها
متوّرطين /وعذرنا انّا / من الطين
ولاتنعذل طينة غلاي / وغلاها
والله . . يلولا انّا ربينا على الدين
ونحسب حساب بيوتنا / وقصراها
لنوقّف الدنيا واهلها مجانين
في قصةٍ عجز ألفها / يصل ياها
عنوانها / سِرّ إحترام القوانين
لعيونها / وعيون أيها / ولاها
تامر على بعدين / ويفّز بعدين
شيخة عرب / كلٍ يدوّر رضاها
معذور من هدّت عليه الحجاجين
لو يحذف التمرة / وياكل نواها !
الذنب ماهو ذنب من يتبع الزين
الذنب ذنب أمٍ تفاخِتْ مهاها
وانا مهاتي . . راجحة بالموازين
مخبيةٍ ماتعرف إلا خباها
الأرض من عقب المطر عاده تلين
وإن داجها عسّاس . . يجرح ثراها
لكن هذي قفرها يخزي العين
من جدّ / تحتاش الدموع بعصاها
أحلم بها / حلم العرب في فلسطين
وإن كان ضاعت /ضاع قلبي معاها
هذي وصيّة / للعيال الوصـيّـيّـن
إن متّ / نفسي لا يدوّر نقاها
سلمّتها بيدين من يقضي الدين
ولاظنّها متقدمه عن سراها



أحمد خليف الحربي

الموضوع الأصلي: يسقي ثراك الله / يايوم الاثنين | | الكاتب: النمر1012 | | المصدر: شبكة بني عبس

[بنت أبوهــا]

أبيات رائعة

صح لسان شاعرها
وصح ذوقك أخوي النمر

:)

[النمر1012]

صح بدنكم وبيض الله وجهكم اول الردود ويشرفني مروركم بنت ابوها اسم علي المسمى