[رسام الغروب]

يامل قلب كل ما روح الليل
تسري عليه هموم وقت عديده

وتطري عليه هموم ويا غرابيل
مضت مع الأيام ذكرى زهيده

أبكي حياتي وألحق الويل بالويل
على زماني والليالي العنيده

على الحظوظ العاثرة والبهاذيل
وعلى جروح كل يوم جديدة

على حياه شفت منها التهاويل
فيها الفرح وايا السعادة فقيده

على حمول كلها تنهك الحيل
حملتها ضمن الظروف الشديده

على شباب راح كله غرابيل
مني رحل مثل الليالي السعيده

على الطعون اللي بقلبي مداهيل
من حرها قلبي تشكي وريده

على الوجية الغابرة والمظاليل
و على نوايا ترتوي بالمكيده

على رفيق صك باب المواصيل
سافر وخلاني بدار بعيده

على الزمان اللي بمداته بخيل
ياخذ ولا يعطيني اللي أريده

لاواعذابي من هموم المقابيل
يا خوفي الماضي علية تعيده

ورجواي في منزل تبارك مع الفيل
الواحد اللي كلنا من عبيده

يبدل الأحوال لي خير تبديل
ويجبر عزاء قلب همومه عتيده


الشاعره النادره الدوسريه

الموضوع الأصلي: العاثره | | الكاتب: رسام الغروب | | المصدر: شبكة بني عبس

[(فارس الرشيدي)]

صح لسانك ولسان شاعرتها وتسلم عالنقل

[احمد سبيتان]

صح لسان الشاعره والف شكر على النقل

[المداوي]

صح لسانك ولسان شاعرتها وتسلم عالنقل

[رسام الغروب]

صح أبدانكم ولاهنتم

فارس الرشيدي وأحمد سبيتان والمداوي

وشكرا على مروركم