[سهم عبس]

كتير منا بيسأل وبيتسأل عن عمليات تصحيح الابصار



وللأسف معظمنا بيبقي مش عارف عنها حاجه



وبعد ما بيتسأل بيبقي عنده حل من اتنين



الاول انه يفتي



والتاني انه وشه يحمر ويقول مش عارف بصراحه


علشان كده في التوبيك ده هتكلم ان شاء الله عن الموضوع ده بشئ من التفصيل الغير ممل



نبدأ ان شاء الله



الاول........



الاسم الشائع لعمليات تصحيح الابصار هو الليزيك lasik وده اللي كل الناس عرفاه



لكن هل فعلا مفيش غير الليزيك



يعني اي حد عنده ضعف نظر ممكن يعمل ليزيك؟؟؟



وايه هو الليزيك؟؟؟



وايه البدائل؟؟؟



وايه المشاكل؟؟؟



وامتي ينفع ؟؟؟



وامتي ماينفعش؟؟؟



ومين يعملهولك؟؟؟



وتعمله فين؟؟؟



وبكام؟؟؟؟


و... و ... و....


اسئله كتير هيتم الرد عليها ان شاء الله في التوبيك دا

الاول يا جماعه لازم نعرف ان في مجموعه كبيره
من العمليات الليزيك بيقع تحتها
المجموعه اسمها
Refractive surgery
من قديم الأزل والعلماء عمالين يدوروا علي اي ظريقه يتم تصحيح بيها
ضعف النظر

وطلعت عمليات كتير منها الحلو ومنها الوحش
طيب؟؟؟
الفكره بدأت منين ؟؟؟
قوة الابصار بيتحكم فيها عاملين
الاول طول العين axial length

وده بيسبب ال (axial myopia&axial hypermetropia)
والثاني ال refractive power of the eye
والجزء ده بيتحكم فيه اجزاء العين
بداية من القرنيه ثم العدسه (أهم جزئين)

وده بيسبب(refractive myopia&refractive hypermetropia)
فالناس بتوع العيون قالوا لو عرفنا نغير في الحاجات دي يبقي ممكن نغير من قوة العين ونرجعها طبيعيه
ومن هنا بدأت العمليات
النوع الاول وده كان بيحصل زمااااااااان واتلغي دلوقتي انه يتم تغيير طول العين
بطرق قديمه وصعبه جدا ومفيش داعي اننا نتكلم عنها
النوع التاني وهو المهم
وهو تغيير قوة القرنيه أو العدسه
ومن كده بقا في تقسيمه للعمليات دي
الجزء الأول
ال
Corneal surgery
والتاني
ال
Lens surgery
والليزيك ده واحد من العمليات اللي تتبع عمليات القرنيه


بعد ما عرفنا الفكره اللي عليها اتبني عمليات تصحيح الابصار


نبدأ ان شاء الله في عرض الطرق


وان شاء الله الطرق اللي مش مشهوره او مش بتتعمل


هقتصر بذكر نبذه مختصره عنها


والطرق المهمه هزود شويه في الشرح


::::::::::::::::::::::::


Lens surgery


وده الجزء المخصوص بتغيير قوة عدسة العين


وفي طريقتين للموضوع ده


1.clear lens extraction


في العمليه دي بنشيل العدسه الاصليه للعين ونحط مكانها عدسه صناعيه بالpower اللي احنا عايزينه


وده بيصحح ال spherical refractive errors


بس اليومين دول طلع نوع جديد من العدسات اسمها


Torric intraocular lens


وده بيصلح الاستيجماتيزم


المهم العمليات دي غير شائعه وليها حالات خاصه زي ال


High myopia & hypermetropia with presbyopia


والنوع ده ليه مشاكل كتير اهمها الانفصال الشبكي اللي ممكن يحصل اثناء العمليه لاني بشد عدسه سليمه ماسكه في مكانها فممكن وانا بشدها تشد معاها الشبكيه


وطبعا العمليه فيها فتح عين فبالتالي كل مشاكل ال open surgery ممكن تحصل


2. Phakic Intraocular Lenses


وفي النوع ده بنسيب العدسه الاصليه للعين مكانها وبنحط عليها عدسه تانيه


اما في ال


anterior chamber


or posterior chamber



يعني من الاخر بدل ما نلبس نظاره هنحط عدسات النظاره جوا العين اما امام القزحيه او خلفها


والعمليه دي مشاكلها بالعبيط(ههههههه) ابتداء من التهاب بالقرنيه والقزحيه و .و و و الخ


وبكده يكون عمليات العدسه خلصت




Corneal surgery


اتكلمنا عن العمليات الخاصه بالعدسه


وهي كانت قليله واستخدامها بسيط


ان شاء الله هنتكلم عن العمليات الخاصه بالقرنيه


ودي الاكثر انتشارا والاقل مشاكل


لكن الاول لازم نفهم فكرة عمليات القرنيه


وقبل ما نفهم فكرة عمليات القرنيه


في شوية معلومات كده


انا عارف انها صعبه


بس مفيده جدا


الاول ..سؤال ؟؟؟


ايه اللي بيتحكم في قوة العين ؟؟؟


بمعني تاني ايه اللي بيسبب طول أو قصر النظر أو الاستيجماتيزم؟؟؟


يا تري الكومبيوتر والتليفزيون والقرائه في الاماكن المظلمه زي ما أهالينا عرفونا ولا في حاجات تانيه ؟؟؟


بصراحه يا جماعه كل دي خرافات اتربينا ومازلنا بنتربي وبنربي عيالنا عليها


والصحيح ان الاشياء دي ليس لها علاقه بالمره بالنظر


في ثلاث عوامل هما المسئولين اساسا عن قوة الابصار


the shape of the cornea,


the power of the lens,


and the length of the eye.


قوة العين حوالي 60 ديوبتر ...45 منهم المسئول عنهم القرنيه


والباقي العدسه...


وعلشان كده كان من العقل ان عمليات القرنيه هي اللي تبقي اوسع انتشارا من غيرها


بس في شوية مفاهيم كده عايزين نتذكرهم مع بعض


الاول..


يعني ايه قصر نظر أو طول نظر أو استيجماتيزم ؟؟


Myopia,hyperopia&astigmatism



المفروض لما شعاع الضوء يدخل العين


بواسطة قوة القرنيه والعدسه


اللي اتكلمنا عليهم


يتجمع في نقطه واحده علي الشبكيه ...


**طيب لما الضوء يتجمع قدام الشبكيه
يعني في نقطه بداخل السائل الزجاجيvitrous
دا هيسبب قصر النظر أو ال myopia
وده معناه ان العين قوتها كبيره
(اما قوة العدسه أو القرنيه)
علشان تجمع الضوء في نقطه قريبه
(refractive myopia)
أو ممكن القوه تبقي عاديه
لكن العين اللي طويله شويه فالضوء يتجمع في مكانه
لكن الشبكيه هي اللي راجعه ورا وده بيسمي ال axial myopia



**لكن اذا كانت العين قوتها قليله
( اما العدسه أو القرنيه)
فالضوء هيتجمع خلف الشبكيه في نقطه وهميه وده بيسم ال
(refractive hyperopia)


أو العين طولها قليل عن الطبيعي
فالضوء يتجمع في مكانه لكن الشبكيه هي اللي طلعت قدام وده بيسمي ال
axial hyperopia



**والنوع التالت
ان في myredian معين من العين
اللي فيه ضعف نظر
وده هو اللا نقطيه أو الاستيجماتيزم
فالصوره بدل ما تتجمع علي نقطه واحده علي الشبكيه هتتجمع علي كذا نقطه



لسه التقيل جاي ورا صحصحوااا



نرجع تاني لفكرة عمل عمليات القرنيه


القرنيه عباره عن جزء من كره ... صح؟؟؟


لو أنا اخدت الجزء ده وفردته قوته هتقل ...تمام؟؟؟


والدليل لو تفتكروا من الفيزياء زمان
ان لو الضوء وقع عمودي علي سطح مستوي هيخرج زي ما دخل بدون اي انحرافات


كل ما تحدب السطح دا بيزيد كل ما قوته بتزيد والعكس صحيح


ومن هنا جاااااااااااااائت الفكره


العلماء( اللي زيي ههههه)
زمان فكروا قالوا
لو قدرنا نخلي القرنيه flat أكتر يبقي كده هنقلل قوتها
وبالتالي الضوء اللي كان بيتجمع قدام الشبكيه في عيان ال myopia هنقدر نخليه يتجمع علي الشبكيه


والعكس لو قدرنا نزود من تحدب القرنيه
يبقي هتزيد قوتها
وبالتالي الضوء اللي كان بيتجمع خلف الشبكيه
في عيان ال hyperopia
هيطلع قدام ويتجمع علي الشبكيه


تمااااااااااااااااااااااام...



باختصار شديد هي دي فكرة عمليات القرنيه اللي طلع منها الليزيك وما شابه



بعد ما عرفنا ان الاساس في عمليات القرنيه هو التحكم في تحدب القرنيه أو ال

Steepness

كل ما تصبح القرنيه steep
كل ما البور بتاعها بيزيد
وكل ما تصبح القرنيه flat
كل ما البور بتاعها بيقل

نبدأ ان شاء الله
في شرح العمليات الخاصه بالقرنيه

بس خليكوا فاكرين معايا

ان علشان اصلح ال myopia عايز أعمل اييه ؟؟


عايز أقلل قوة القرنيه
لإن الضوء بيتجمع قدام الشبكيه
وبالتالي عايزه يرجع وره


وعلشان أصلح ال hyperopia
عايز أزود تحدب القرنيه
علشان أخلي الضوء اللي بيتجمع ورا الشبكيه يطلع قدام ويتجمع عليها

تماااااااااااااااااام


العمليه الأولي


Radial keratotomy


ودي كانت بتتعمل زماااان
ودلوقتي خلاص انتهت


العلماء فكرواااا


قالوا


إزاي نخلي القرنيه flat علشان نصلح ال myopia


قالوا لو عملنا


partial thickness radial incision


علي أطراف القرنيه بعيد عن ال center
بتاع القرنيه (لإن ده اللي بنشوف منه)
بحيث ال incisions دي يبقي ليها level معين في القرنيه


يعني مثلا علشان اوضحهالكم


لو قولنا القرنيه سمكها 100 سم


هنعمل ال incision 80 سم ونسيب 20 سم


تماااااااااام


وطبعا العين جواها ضغط اللي بيسببه
ال aques (سائل العين)


فلما القرنيه تبقي week بعد ال incision دي



ضغط العين هيزق القرنيه من ورا وبالتالي القرنيه من الاطراف هتبقي flat

وبالتالي قوتها هتقل

والعمليه دي كانت بتعالج
الدرجات القليله من ال myopia


وأحسن نتائج كانت بتبقي لحد -5 ديوبتر


وطبعا ال incision دي مش كانت شغل جزارين


دي كانت عمليات حسابيه معقده
علشان تحسب طول وسمك ال incision


دي كانت العمليه الأولي


لكن بعد ما ظهر الليزر في العمليات
أختفت تماما


وظهرت العمليات التاليه


::::::::::::::::::::::::::::::


العمليه التانيه


وهي ال


Photorefractive keratectomy


والمشهوره باسم


P.R.K


وفي العمليه دي بيتم استخدام اشعة الليزر


(excimelr laser)


علشان تشيل جزء من القرنيه


لو سمحتوا تخيلوا معايا


لو عايز القرنيه تبقي flat


علشان اصلح ال myopia


هسلط الليزر علي القرنيه ازاي؟؟؟


أكيد علي الجزء الاوسط من القرنيه


ولو عايز القرنيه تبقي


more steeper


يعني بزود من قوتها


علشان ال


hyperopia


هسلط الليزر علي


اطراف القرنيه

والعمليه دي بتصلح ال


Myopia up to -6 diopter


Astigmatism up to 3 diopter


Low hypermetropia


واستخدام العمليه دي قل
بعد ظهور الليزيك


وأصبحت مقتصره علي الاشخاص


اللي سمك القرنيه بتاعهم قليل مش يسمح لعمل الليزيك


والعمليه دي استخدامها قل
نتيجه لمشاكلها الكتيره


وعدم قدرتها علي تصحيح الدرجات العاليه من الmyopia


وعدم قدرتها علي تصحيح ال hyperopia


الا بدرجات بسيطه جدا


بعد ما عرفنا طرق تصحيح الابصار
والشائع منها والغير شائع
وفكرة عمل العمليات
هنا ان شاء الله هنتكلم عن اشهر عمليه لتصحيح الابصار
ألا وهي
LASIK
أو
laser in-situ Keratomileusis

بعد ظهور النوع ده من عمليات تصحيح الابصار اصبح هوا اشهر وأحسن نوع في المجال ده
أولا لقدرته علي تصحيح الدرجات العاليه من ضعف الابصار ولقلة المضاعفات بعد العمليه
بكل بساطه فكرة عمله زي فكرة عمل ال PRK لكن الفرق ان اشعة الليزر بتتسلط علي ال CORNEAL STROMA

والعمليه دي لها لقدره لتصليح ال
Myopia up to -12D
Hyperopia up to +4D
Astigmatism up to 5D
دي معلومه بسيطه عن العمليه دي
لكن في اسئله كتيييييير في اذهان الناس عايزه تعرف اجابتها وبتكون محتاره جدا قبل العمليه يا تري تعملها ولا ماتعملهاش
فانا اتخيلت حوار مع مريضه ودكتور عيون
من مخيلتي طبعا
هي بتسأل وهو بيجاوب
الباب بيخبط
اتفضل
المريضه... ممكن أدخل
في سري(يا ساتر استر يارب) اتفضلي

حكيم عيون .. خير يا مدام
المريضه ... انسه لو سمحت .. اسمي باتعه وبيدلعوني بيقولولي يا عنايات اصل عيني حلوه صح ؟؟؟
حكيم عيون .. اسف يا انسه باتعه .. خير مال حضرتك
باتعه ... لو سمحت انا بحس بزغلله وبصداع ممكن تشوف نظري ضعيف ولا ايه
حكيم عيون... تحت أمرك اتفضلي بصي للعلامات دي

شايفه العلامه الكبيره مفتوحه منين
باتعه .... هي فين العلامه الكبيره دي يا دكتور
حكيم عيون... وبيدلعوكي بعنايات (في سري طبعا)
حكيم عيون.. طيب تعرفي تعدي صوابعي دول كام (وانا واقف علي 5 متر)
باتعه ...اه طبعا خمسه في عين العدو
حكيم عيون .... تمام
حكيم عيون ...ممكن تقومي علشان اخدلك مقاس كومبيوتر
باتعه .... اضحك يعني ؟؟؟؟
حكيم عيون... ياااااااااارب لا يا ستي بصي في الجهاز بس
المهم بعد محاولات عديده وشنيعه تم عمل المهمه بسلام وأخذت مقاس الكومبيوتر
وبعد التجربه علي ال trial frame
وجدت المقاس كالتالي
العين اليمني sphere ….-11 cylender….-3 axis…180
العين الشمال sphere ….-5 cylender …-1 axis …180
حكيم عيون..... بصراحه يا انسه باتعه نظرك ضعيف أوي
باتعه .... يعني كام يعني يا سي الدكتور
حكيم عيون ..... شيش بيش (في سري طبعا ) العين اليمين ضعيفه أوي والشمال أحسن شويه
باتعه ....... خلاص يا دكتور أعملي نظاره
حكيم عيون ....... للاسف يا انسه مش ينفع نظاره
باتعه ...... ليه ياعني هوا انا مش عندي ودان يعني ولا ايه

حكيم عيون ....... لا مش قصدي بس حضرتك عندك عين ضعيفه أوي عن العين التانيه
وده بيمنع انك تلبسي نظاره وده بيسمي anisometropia
باتعه .... حواجبها اتقلبوا 7 بالانجليزي
حكيم عيون ... يا انسه باتعه حضرتك عندك مشكله ان الفرق بين العينين عند حضرتك كبير يعني اكتر من 4 درجات وفي الحالات اللي زي دي ماينفعش عمل نظاره
باتعه... طب والعمل يا دكتور
حكيم عيون... روحي ولعي في نفسك هههههههه ( في سري)
حكيم عيون....... الموضوع بسيط يا ست باتعه انتي عندك خيار من اتنين
باتعه .... مش بحبه
حكيم عيون... هو مين ؟؟؟
باتعه .... الخيار
حكيم عيون.... ركزي معايا قصدي حل من اتنين
يا اما تعملي عدسات لاصقه أو تعملي عملية تصحيح ابصار بالليزر
طبعا هيا سمعت الحلين دول كان هيغم عليها وبالذات لما سمعت سيرة الليزر
المهم بعد محاولات علشان اخليها تتماسك بدأت تستفسر عن العمليه
باتعه ....يعني ايه يا دكتور عملية تصحيح ابصار بالليزر
حكيم عيون .... هي عمليه بسيطه بتستخدم أشعة الليزر علشان تصلح قوة ابصار العين
باتعه ... ودي خطر يا دكتور ؟؟؟
حكيم عيون... يا انسه باتعه دي اسمها عمليه يعني جراحه وكل جراحه ليها نسبة نجاح ونسبة فشل
باتعه ... يعني يا دكتور لو فشلت هتعمي ؟؟؟ منك لله يا سنيه انتي اللي بصيتي لعيني بصه وحشه
حكيم عيون ... لا يا ست باتعه ان شاء الله مفيش عمي النوع ده من العمليات اتطور دلوقتي جدا ومشاكله أصبحت قليله
باتعه ... والعمليه دي بتاخد وقت كبير ؟؟
حكيم عيون .... وقت العمليه مش بيزيد عن 15 دقيقه
باتعه ... ودي بتتعمل فين يا دكتور
حكيم عيون ... النوع ده من العمليات بيتعمل في مراكز متخصصه لتصحيح الابصار ودي منتشره في انحاء مصر بس مش موجوده في القطاع الحكومي لان الدوله بتعتبر ده نوع من عمليات التجميل
باتعه .... طيب مين اللي هيعملهالي
حكيم عيون .... هو انتي قاعده قدام دكتور نسا ؟؟؟؟
( بالطبع يا جماعه اختيار الطبيب ليه عامل كبير جدا لازم يكون دكتور متمرس في عمليات تصحيح الابصار لكن بصراحه اللي اهم من الدكتور المركز اللي هيتعمل فيه العمليه لان العمليه دي معتمده في الاساس علي الاجهزه
لان العمليه دي شبه بتتعكل لوحدها ودور الجراح أصبح ضئيل جدا لا أنكر أهميته ولكن كلما زاد حداثة الجهاز المستخدم كلما زادت نسبة النتائج المرغوبه
باتعه ... والعمليه دي يا دكتور بتتكلف كام ؟؟؟؟
حكيم عيون ..... 35000 جنيه مصري يا ست باتعه
(طبعا اسعار العمليات بتختلف من دكتور لدكتور يعني الاخصائي غير الاستشاري غير استاذ الجامعه النسبه بتتفاوت لكن في المتوسط من 3500 الي 4000 حنيه مصري والعمليه دي غاليه شويه لان الجهاز المستخدم غالي جدا فبالتالي بيؤثر علي سعر العمليه )
باتعه ... يعني يا دكتور انا أكيد هتنفعي العمليه دي
حكيم عيون ... مش أقدر أجزم قبل ما تعملي اشعه علي العين تبين اذا كنتي تنفعي ولا لأ
( في نوعين من ال investigation لازم يتعملوا قبل العمليه
الاولي ال pachymetry ودي اشعه بتبين سمك القرنيه لان لازم يكون سمك القرنيه لا يقل عن 500 ميكرون لان في العمليه دي في flab بيتشال من القرنيه والليزر بيتسلط علي ال stroma فبالتالي لازم يكون سمك القرنيه يصلح للفيلم دا كله
والتانيه .. corneal topography ودي اشعه بتبين تجاعيد سطح القرنيه أو بمعني تاني ال steepness فاكرينه ؟؟؟
لان طبعا القرنيه هيتعمل فيها flab فلازم القرنيه تكون مستويه يعني لو فيها مثلا حته فيها ectazia مش هينفع
أو لو في keratoconus برده مش هينفع
)
المهم لازم يتعمل النوعين دول من الاشعه ...
باتعه ... طيب لو عملت العمليه دي خلاص مش هلبس نظاره ؟؟؟
حكيم عيون ... مش هقدر أقولك اه أو لا
لان ممكن النظر مش يتحسن بالدرجه المطلوبه ويبقي في فرق بسيط ممكن نصلحه بعدين بالنظاره بس بتبقي في الغالب نظاره مقاسها بسيط جدا
باتعه ... طيب لو عملت العمليه هبات في المستشفي
حكيم عيون ... لأ هتعمليها وتمشي علي طول بس في شوية تعليمات هتعمليها في البيت
يعني مثلا مش هتدعكي في غينك ومش هتجيبي ميه نحية عينك علي الاقل اسبوع
وهتستخدمي بعض القطرات كده
لان المشكله اللي لازم بتحصل بعد العمليه هي جفاف العين ودي تتستمر من شهر ل 3 شهور في الغالب وبتستخدمي في الفتره دي قطرات لترطيب العين
باتعه .... شكرا يا دكتره بس بصراحه انا مش معايا فلوس دلوقتي هعمل جمعيه وأجيلك هههههههه
طيب يعني ايه عدسات لازقه؟؟؟؟؟
حكيم عيون ..... كفايه أسئله بقي حرام عليكي فوتي عليا كمان سنه وانا ابقي اقولك يعني ايه عدسات ملزقه دي ؟؟
وانتهي الحوار بقيام الست باتعه زي ما قعدت وحكيم عيون اصاب الضغط والسكر وأصبح طريح الفراش مده من الزمن بسبب انسه عنايات أخذها الله

الموضوع الأصلي: ملف شامل عن عمليات تصحيح الابصار | | الكاتب: سهم عبس | | المصدر: شبكة بني عبس

[حنان الرشيدي]

أحلى شيء بالموضوع إنو باللهجه المصريه ههههه
لا بجد أخوي سهم موضوع قيم و معلومات مهمة
جزاك الله خير ع نقلها لنا ..
و يعطيك العافية .

[روز]

ملف قيّم

الله يعافيك سهم

[سهم عبس]

مشكورة حنو
على مروركي اللهجه المصريه زي العسسسسل

مشكورة روز على مروركي
ولاهنتم

[عايد2001]

ملف هام وقيم
يجمل بين سطورة القيمة والفائدة
والمعلومات الرائعة

شكراً لك بارك الله بك

[سهم عبس]

مشكور اخوي عااايد على مرورك الرااااااااائع