[الاجهر]

وقفة مع شاعر

الشاعر ليلان الرشيدي شاعر جيد له العديد من القصائد المتنوعة لنا وقفة مع بعض قصائد شاعرنا:

فمن قصيدة قالها يصف التفاف الشعب حول قيادته الحكيمة وكذلك يصف مكارم مولاي خادم الحرمين الشريفين الملك عبدالله بن عبدالعزيز حفظه الله. نختار منها قول:

يا سيدي لك ولانا واصل بيعتنا

على الكتاب وعلى السنة صفينالك

حنا بصفك يابو متعب بوقفتنا

ونقول راسك يدوم وسامح بالك

شعبك عليك التفافه هي شهادتنا

واكبر شهادة وكلٍ قام وأثنى لك

الكل يدري عنك فرحتك فرحتنا

الله يكثر يابو متعب من أمثالك

وأكبر دليل المكارم منك وصلتنا

من طيب نفسٍ تجود وجودها نالك

المكرمة منك يا قايد مسيرتنا

لعلها في موازين أطيب أعمالك

ومن قصيدة (حاسب ضميرك) نختار قوله:

كثر الكلام وقلته لا يغرك

مالك وراء كثر الكلام وقليله

سوالف منها المشاعر تحرك

لا تستفزك خل نفسك ثقيله

بعض من التفكير يمكن يغرك

يحط حملك واحدٍ ما يشيله

خلك من اللي تحسب انه يبرك

انت اقتنع بالراي والله وكيله

قدام يوم يحزنك ما يسرك

ابعد عنه واهجر طريق يجي له

اسمع كلامي دون خيرك وشرك

انا غني لا صار ما فيك حيله

ولا طريق مر غيرك يمرك

ما ظن بعده رجعتك مستحيله

حاسب ضميرك لا تمادى يجرك

في يد عدوك بين يوم وليله

وعن عشقه للصحراء يقول شاعرنا من قصيدة طويلة نختار منها قوله:

أنا أعشق الصحراء بنفس صغيره

وأحب وديان تشكل بها زهور

وارتاح لفياضه وصافي غديره

على طرف روض من الوسم ممطور

واكثر غرامي بالجبال العسيره

أعلى جبل على معداه مامور

واعجب لبدوان اجموعه غفيره

حول الابار اللي لها اثار معمور

وشوف الإبل لو كان لحظه قصيره

تسعد بها نفس من إحساس وشعور

وبر نسيمه ينتعشني عبيره

اعلاج جرح القلب تشخيص دكتور

وسوالف بعد الصلاه الأخيرة

وتبهيرة الدله على شقت النور

ومن قصيدة أخرى يقول:

يا ليل وش عاد انتظر منك ياليل

الا السهر ومراقبي للنجومي

جددت في قلبي جروح مساميل

من بعدها ما تعرف العين نومي

ماله لزوم تحط ياليل وتشيل

انا بنفسي ما اعرف وش لزومي

كان السنين الماضيه ميلها ميل

اليوم هانت مع قوي العزومي

ومن طاول الغربه يشوف الغرابيل

ولولا العزيمه كان ضاعت علومي

ومن قصائد شاعرنا الغزلية نختار قوله:

محتاجني بس أنا أكثر واحد أحتاجك

جيتك بوقت تشاركني مع ظروفه

من حالتي لا تواخذني على إحراجك

ما جيتك إلا بحالٍ مثل ما تشوفه

لا تقول مزعج وأنا يعجبني إزعاجك

وإن قلت ملقوف ناس الحب ملقوفه

ومن قصيدة أخرى قوله:

ما يدري أني بعيد وشايل همومه

هو شغلي الشاغل اللي عطل أشغالي

يشهد علي القمر والليل ونجومه

ويشهد طريق الشمال أنه على بالي

وكذلك من قصيدة غزلية أخرى نختار قوله:

يا صاحبي جيت أعتذر لك وش الرأي

وماجا بقوه ما رجع بالسهوله

ماجيت اذكر راعي الناي بالنأي

جيت أحسم الموقف بموقف رجوله

لا تحسب ان أكثر من الرايح الجاي

العذر واحد وأنت حر بقبوله

وان كان ودك تسمع العذر بشفاي

هذا وان قدام عينك أقوله

اما تسامحني على جملة اخطاي

ولا نكف الهرج عرضه وطوله

نتمنى لشاعرنا دوام التوفيق.. وإلى اللقاء مع وقفة مع شاعر آخر. زاهر المطيري - بريدة

الموضوع الأصلي: وقفة مع شاعر- اعداد زاهر المطيري | | الكاتب: الاجهر | | المصدر: شبكة بني عبس