[الاجهر]

من اختيار الاجهر اهدا الى كل رجاع شجاع شهم يحب معالي الامور

ود ياحرف القصيد وفكّك قْيود الحصار = وارو قفراً تشتكي للسحب شحّ امطارها
لاتخليني اعيش العمر قيد الانتظار = دام انا من روس قوم كبارها وصغارها
وقُمْ مِعِي قَوْمَة رفيقٍ يومن انّ الذّل عار = وِانْ غايات الرجال محقّقه باصرارها
وِانْ ماللسفْن مطمع غير في شق البحار = وِانْ ماللدلّه الا بنّها وبهارها
وقتها يطرد سواد الليل اشراق النّهار = واعرف ان زروع كفّي اينعت باثمارها
بعدها خُذ من كلامي شيّ قلته باختصار = فيه مايكشف خفايا ضيقتي واسرارها
كنت خايف شي واللي كنت خايف منه صار = والجروح اللي بصدري توّ شبّت نارها
كنت ذاك الحالم اللي خط ّله درب ومسار = حالمٍ بارض اتفيّا في ظلال اشجارها
أرض تربتها خصيبه واكتست بالاخضرار = لين صار اللون الاخضر رمزها وشعارها
ودّي اسكن في ثراها واتّخذ فيها قرار = مايجاورني بها من النّاس كود خيارها
ولجل حلمي سِقْت ركبي قاصد بعيد الديار = ماحسبت حساب خطوات القدم واخطارها
لين دنايايه بعد ماذقت طعم الانتصار = جَتْ تجرعني على غفله كؤوس امرارها
بعدها حسّيت ضيق ولا على الدنيا قرار = والهموم اركت عليّه واحْكمت بحصارها
وقمت احلّل وضعي اللي صايبه شبه انهيار = واستشير اهل المشوره واستنير بشارها
والخطا ماهو بشرهه تندمح بالاعتذار = ولاهو بزلّه واحاول شجبها وانكارها
الخطا انّ الشخص يقنع بالفشل والانكسار = والتجارب مايحاول جاهدٍ تكرارها
لكن اسمع مانويت بكل رغبه واختيار = دام عين الحر ماتهجع وتترك ثارها
والله انّي لاستمر بكل عزمٍ واقتدرا = والحلوم اللي تهاوت راح اعيد اعمارها
لين مايصبح لها في صحصح البيد اعتبار = واحتضنها واتذوّق من رحيق ازهارها
مَيْر قُمْ لي قومة اللي يومنِ انّ الذّل عار= وِانْ غايات الرجال محقّقه باصرارها
لاتخليني أعيش العمر قيد الانتظار = دام انا من روس قوم كبارها وصغارها

الاجهر يحييكم

الموضوع الأصلي: دام انا من روس قوم | | الكاتب: الاجهر | | المصدر: شبكة بني عبس

[سعد بن عادي]

كنت خايف شي واللي كنت خايف منه صار
والجروح اللي بصدري تـوّ شبّـت نارهـا
كنت ذاك الحالم اللي خط ّله درب ومسـار
حالمٍ بارض اتفيّـا فـي ظـلال اشجارهـا



مَيْر قُمْ لي قومة اللي يومنِ انّ الذّل عـار
وِانْ غايات الرجـال محقّقـه باصرارهـا
لاتخليني أعيـش العمـر قيـد الانتظـار
دام انا من روس قوم كبارهـا وصغارهـا

كذا الشعر والا بلاش ... رووح ياشيخ قلته لك قبل ماتجيب الا الابداع ... الاجهر سلم لي على رسائل أفكارك

عرفت تنتقي الشعر الحقيقي .., اتمنا بس أعرف قائل الابيات ؟؟
دمتم كما تحبون

[مسندالعويمري]

صح اللسانك قصيده وافيه من شاعر وافي

[الاجهر]

سعد بن عادي / يسلم راسك ياراعي العلوم الطيبة - من طيب ساسك يالذيب

[الاجهر]

مسند العويمري - مافيك حيلة
ههههههههه
بيض الله وجهك على المرور