[the rock]

السلام عليكم ورحمة الله وبركاته …







ان شاء الله في هذا الموضوع راح اشرح لكم بالتفصيل الممل (بس المفيد :) ) كل شي عن جير الأوريون ذو السرعات الستة… وهذا الشرح من واقع الخبرة بالاضافة للكاتالوج ... يعني الشرح فيه معلومات ماتحصلها في الكاتالوج ... ... ويمكن أول مرة تسمعها ... :)


وأتمنى ان الموضوع يكبر بردودكم وتعليقاتكم حتى نغطي الموضوع بالكامل … ويكون شامل لكل الجوانب من مشاكل وحلول وغيرها … ويصير مرجع لنا …



بسم الله نبدأ

يعتبر جير الأوريون من أهم المميزات اللي تميز الأوريون عن غيرها من سيارات التويوتا أو حتى عن الأنواع الثانية من فئتها … حيث انها التويوتا الوحيدة عندنا اللي بست سرعات …




وبالاضافة إن الجير أوتوماتيك إلا أنه يمكن تحويله إلى عادي مع نظام يسمى … SMT اختصار Sequential Manual Transmission (ناقل الحركة العادي التتابعي) ..
وهو يختلف عن نظام التريبترونيك Triptronic الموجود في أغلب السيارات الثانية مثل النيسان والأودي والبي ام ... بس ظاهريا كلهم لهم نفس الفكرة...




... معلومات عامة عن الجير...

*) الجير له الوضعيات P و R و N و D و S و + و –



*) ما تقدر تحرك الجير عن وضعية الـ P إلا اذا كان محرك السيارة شغال و ايضا الضغط على دواسة البريك ...




*) في حالات الطوارئ لا سمح الله ... اذا السيارة ما اشتغلت ... ولازم تنسحب ... الجير يجب أن يكون على الـ N ...

انزين كيف تحرك الجير إذا السيارة ما تشتغل ؟؟!!
هذي وظيفة زر الـ Shift Lock الموجود جنب الجير ... خليك ضاغط على الزر وحرك الجير ... حتى بدون بريك ...



*) السيارة ما تشتغل إلا إذا كان الجير عند الـ P أو N بس تقدر تطفي محرك السيارة على أي وضعية للجير ...


*) سؤال : في السيارات ذات المفتاح العادي ... ممكن تطفي محرك السيارة بدون ما تطفي الراديو ... يعني تحرك المفتاح حركة وحدة إلى وضع الـ ON .... لكن الأوريون بالمفتاح الذكي إذا ضغطت على الزر كل شي ينطفي ولازم تضغط عليه مرة ثانية عشان تشغل الراديو ... شلون تطفي المحرك بدون ما تطفي الراديو ؟؟!!

جواب: الفكرة كلها في الجير ...... إذا طفيت السيارة والجير على الـ P السيارة تطفي بالكامل... لكن إذا كان الجير على الـ N المحرك فقط يطفي ... والراديو يتم شغال ... وما تقدر تطفي السيارة بالكامل إلا إذا رجعت الجير على الـ P.



*) يا ويلك ويلاه إذا فتحت باب السائق وكان المحرك شغّال والجير على غير الـP .... ازعاج لأخر حدود ... حتى لو كان على الـ N ... يعطيك صوت تحذير مزعج داخل السيارة ويكتب لك داخل شاشة الطبلون " حرك الجير إلى P" ... أما إذا طلعت خارج السيارة والمفتاح معاك والجير ماهو على الـ P ... يتحول الصوت إلى صوت التحذير الخارجي العالي .... يا إنه ازعاج !!!... ما يسوى عليك ... تعود دايما إن الجير يكون على الـ P اذا وقفت ...




*) الستارة الكهربائية الخلفية تنزل إذا حركت الجير على الـ Rوزر الستارة في هذي الحالة ما يكون له تأثير ... وبعدين لازم ترفع الستارة إذا شلته عن الـ R ...


*) في شغلة لاحظتها ... إذا جيت تحرك الجير من الـ P إلى الـ R أو بالعكس ... حرك الجير بسرعة معقولة ... إذا حركته بطيء تحس إنه يتحرك بصعوبه ... مادري ليش ...



نظام التحكم الذكي بالجير (AI)

الحين بشرح لكم عن نظام يتميز به جير الأوريون يسمى (AI) أو Artificial Intelligent (الذكاء الصناعي)

نظام الـ AI يعمل تلقائيا إذا كان الجير على الـ D ... ويقوم هذا النظام بتنظيم أوقات تبديلات الجير اوتوماتيكيا على حسب ظروف القيادة المختلفة من حالة الطريق إلى توقع نوايا السائق !!! ... (صدق أو لا تصدق)

يعني يتم ادخال عدة معلومات إلى كمبيوتر خاص في السيارة ... مثل سرعة السيارة وضغط المحرك ومقدار دعسة البنزين والبريك ... وعلى أساس هذي المعلومات يقوم الجير باختيار نمط تغيير معين للسرعات ...

مثلا ... إذا صعدت مكان مرتفع ... تقوم السيارة بالحفاظ على جير منخفض لإعطاء عزم جيد للسيارة ... ومنع تبديلات الجير اللي مالها داعي ...

كما يقوم نظام (AI) بدراسة سلوك السائق وقيادته وذلك لتنظيم تبديلات الجير لتناسب كل سائق ... حيث يكون هناك نمط خاص لكل سائق يختلف عن السائق الآخر !!!

الرسمة هذي توضح تبديلات الجير في حالة وجود النظام وعدمه... تقدر تلاحظ شلون ان السيارة مع نظام (AI) تحافظ على الجير الرابع فترة أطول ...

[IMG]http://www.toyota4arab.com/forum/uploaded/10063_1174419760.jpg[/IMG

الجير العادي التتابعي

الحين نجي إلى موضوع مهم جدا ... نظام الجير العادي التتابعي ...

حرف الـ S اختصار Sequential يعني تتابعي أو متعاقب ...


تقدر تحول الجير إلى الـ S عند أي سرعة ... وأول ما تحركه إلى الـ S يظهر لك رقم 4 (في الغالب)... ليش في الغالب ؟! لأن الجير ممكن يكون عند الخمسة أو الثلاثة ...على حسب الظروف ... يعني إذا السرعة كانت أكثر من 170كم/الساعة وحولت الجير من الـ D إلى الـ S يتحول على رقم 5 ... وإذا حولت الجير وكان نظام الـ AI اللي شرحته فوق شغال يحول الجير على رقم 3 ...




انزين شنو معنى هاللأرقام ؟؟!!

هذا من أهم الفروق بين نظام جير التويوتا والسيارات الثانية (التريبترونك) اللي تكلمت عنه فوق ...
في نظام التريبترونك مثل الأودي الشاشة تعرض لك الجير اللي انت عليه الحين وإذا دعست ووصل ضغط المكينة للأحمر يبدل الجير بروحه ...



لكن في التويوتا غير ... الرقم المعروض هو أعلى تبديلة للجير ... يعني مثلا رقم 4 ... معناه إن الجير يبدل تلقائيا من 1 إلى 4 حسب السرعة ... وما يروح للخامس حتى لو راح ضغط المكينة للخط الأحمر... (هذي نقطة مهمة خذوا بالكم منها)


ورقم 3 معناه ... إن الجير يبدل أوتوماتيكيا من 1 إلى 3 فقط ... فممكن يكون الجير عند 1 أو 2 أو 3 على حسب السرعة ...

ورقم 1 ... يعني إن الجير يتم عند التبديلة الأولى للجير على طول ... وهكذا ...



ممكن واحد يسأل سؤال ... عيل شالفرق إذا خليت الجير على الـ D أو إذا خليته على الـ S ورقم 6 ... اثنينتهم 6 تبديلات؟؟!!

الفرق أخي العزيز إن نظام التحكم الذكي بتبديلات الجير (AI) اللي شرحته فوق يشتغل فقط في حالة الـ D ... وما يشتغل مع الـ S ...
باختصار في الـ D يكون الجير أوتوماتيك ذكي .... وفي حالة الـ S على 6 يكون أوتوماتيك غبي ... خخخخخخخخ



في عدة نقاط مهمة لازم اذكرها ...

أولا : لا تخلى ضغط المكينة يعدي الخط الأحمر ... ترى هذا يدمر المكينة ...




ثانيا : لكل جير سرعة معينة لا تعديها ... ولا ترجع الجير لرقم أقل إذا كانت سرعتك أعلى من سرعة الجير ...

الجير 1 : السرعة القصوى 60 كم/س
الجير 2 : السرعة القصوى 100 كم/س
الجير 3 : السرعة القصوى 140 كم/س
الجير 4 : السرعة القصوى 200 كم/س
الجير 5 : مفتوح
الجير 6 : مفتوح

...

اذا كنت تبي أقوى تسارع للسيارة ... ابتدي من واحد (1) ... وبعدين زيد الجير كل ما يوصل ضغط المكينة إلى خمسة ( 5000 rpm)...





اذا كنت حاط الجير على الـ D وتمشي مثلا بسرعة 60 كم/س ... وتبغي تسارع محصلش ( صدقوني جربوها ... شي خيالي ... ما شاءالله) ... خليك بسرعة ثابتة وبعدين حرك الجير إلى الـ S واختار رقم 2 ... ودوووووس ...

فرملة المحرك


آخر موضوع بتكلم عنه هو نظام كبح أو فرملة المحرك ...

هو نظام لخفض سرعة السيارة بقوة بدون استعمال البريك ... تستخدم غالبا في حالات الطوارئ أو عند النزول في المنحدرات ... وفعاليته أقوى من البريك العادي...

كيف يعمل ؟

إذا كان الجير على الـ D وتمشي مثلا 200 كم/س ... حرك الجير إلى الـ S ... (الجير بيكون على 5)

نزل الجير إلى 4 ... بتنزل سرعة السيارة إلى 170 ... طبعا لا تستخدم البريك ولا الريس ...

نزل الجير إلى 3 ... تنخفض السرعة إلى أقل من 120 كم/س...

نزل الجير إلى 2 ... تنخفض السرعة أقل من 90 كم/س ...

أخر شي نزل الجير إلى 1 ... تنزل سرعة السيار إلى أقل من 40 كم/س ...





تنبيه : لا تستخدم هذي الطريقة إذا كان الشارع في ماي لووووولز ... ممكن انك تفقد السيطرة على السيارة لا سمح الله ...عاد تصير علوم لوولز




اي انتقادات اي شي وان شاء الله عجبكم

الموضوع الأصلي: كل شيء عن ( جيــــــــر الأوريــــــــون) + معلومات جديدة وحصرية !!! | | الكاتب: the rock | | المصدر: شبكة بني عبس

[سالم الرشيدي]

هـــلا حمني
موضوع رائع ومعلومات مفيده
تسلم على هيك موضوع وتحياتي لك

[the rock]

الله يسلمك ويعافيك



شــــــــ ـ ــــ ـ ـ ــ ــ ـاكر لــــ ـ ــــ ـــكــ


حـــْ~~ْــبيب قلبي

[الغريبة]

مشكوور حمنيييووووووه ..
ولو اني موفاهمه شي خخخخخ ..
بس حسيته موضوع مفيييييد للشبآآآآآب ..
تقبل مرورررري ..

[the rock]

شــــــــــــاكر لمرورج

[الهنوف]

كشخه والله
مشكوور اخوى

[ولد الشرقية]

مشكور يالغالي ويعطيك العافيه .

[شهاليل]

والله انا مش ولابد بالسيارات
خخخخخخخخ
لاهنت اخوي