[خالد الذيابي]

فوضته أمري وإرتضيت أمره وهايضت وهتفت=الله ولي أمري ولا غير الله الوالي ولي
سبحان من تقوا عزومي فيه لامني ضعفت=وأنا وربي ماضعفت إلا لجبارن علي
روضت نفسي للخيار الصعب لين إني ولفت=والموت يقفي بي لعثراتي وعثرات زملي
ماني مضريها على الهيبات لا مني وقفت=ولاني مجنبها عن المشراف والمخرج ملي
نثر سحابك شرق يابرقن على الخفجي رعفت=إليا إرتوت منك الكويت ونجد فأنت مجملي
وعلى لحونك ياصدوق الوسم غنيت وصرفت =نفايس الدر الثمين من الجواهر والحلي
سندت لعلو الخيال ودست بحماه وقطفت=من كل شمس وكل نجم وكل وضاحن جلي
رشفت شعري من زهر نحت من صخر وغرفت=من ماردن جم فراتن ماتغثربه الدلي
أفردت للشعر الجحا وسبوق لين إني ولفت=وحشة مصافقت الهبوب براس رجمن معتلي
قد قال أبوي اللي على دربه مشيت ولا أنحرفت=كن أولا وإترك مكان اللي يلي للي يلي
على مهب العز في حضرت بني عمي هتفت=والدم بعروفي يفوح من الحميا ويغلي
أنا رشيدي لا أعتزوبي عبس شرفت وشرفت=لعيون بنت الطيبين أم الثمان الذبلي
ليا إعتزوبي والمواكر عبس خايلت وعسفت=جلمود صخرن حطه السيل على أمرن من علي
وأنا سعودي والسعوديه هي أغلا من عرفت=إن القبيله والحموله إلحواتي من هلي
هي مفخرة سرج الزمان أقسمت بالله وحلفت=ماطال حلياها وعلياها وزين ولا حلي
على لحونك ياصدوق الوسم خايلت وهتفت=الله ولي أمري ولا غير الله الوالي ولي

الموضوع الأصلي: قصيدة مساعد الرشيدي بحفل منظمة عبس | | الكاتب: خالد الذيابي | | المصدر: شبكة بني عبس

[خالد الذيابي]

كل الشكر واعذبه للشاعر سعود الذيابي

على ارسالها على جوالي

[تركي بن سعد]

صح لسان الزعيم ولاهنت اخوي على النقل

[محمد ابن سمره]

قصيده قرأتها وقرأتها واعيد وأقرأها شامخه من الطراز النادر



لله درك ياخالد ولله در مساعد


تحياتي

[خاتم الرشيدي]

كما عودنا مساعد شامخ وجزل بكل معنى لله دره
وأشكرك أخي خالد على نقل هذه القصيده الشامخه

وتقبل خالص الود والتقدير

[سالم الرشيدي]

صح السان الزعيم مساعد بن ربيع

وبيض الله وجهك

ياخالد الذيابي

على الموضوع الاكثر من الرااائع

وجه الشاعر سعود الذيابي

على ارسالها لك


ولاهنتم

[الشاامخ]

قد قال أبوي اللي على دربه مشيت ولا أنحرفت=كن أولا وإترك مكـان اللـي يلـي للـي يلـي

بيت رااااااااائع يكفي عن قصيده

لله درك الزعيم مساعد الرشيدي

كمااااااا عودنااااا ابو فيصل دائمأأأأ مبدع

ومشكور خالد على النقل

[ابوناصر]

كن أولا وإترك مكـان اللـي يلـي للـي يلـي كن أولا وإترك مكـان اللـي يلـي للـي يلـي
كن أولا وإترك مكـان اللـي يلـي للـي يلـي
اتمنى ان يكون هذا البيت شعار لكل شخص وأن يفكر في المستقبل الحافل ولا يرجع للورى وأن يكون دائماً بالمقدمة ويترك مكان اللي يلي للي يلي
ابوناصر المهيمزي