[ضيف الله المتعاني العبسي]

يالله يا معبود يا واحد احد=يا رافع السبع الطباق بلا عمد
يا مُنزل الهتان من غر السحاب=وفقني وجنبني أدروب النقد
سحابة الشعر استهلّت وأمطرت=البرق سابقها وقافيها رعد
يا جعلها يوم أمطرت شوق وحنين=يروا بها الضامي ليا منّه ورد
شرابها على معاطيش الكبود=أعذب من الكوثر وألذّ من الشهد
لا خير فالشّعر الذي ماله هدف=لو شاعره غنا لحونه وان قصد
من الشعر ما يشفي أسقام وجروح=ومن الشعر ما نقّض الجرح الهمِد
ومن الشعر ما أبعد وليفاً عن وليف=ومن الشعر ما ألّف وقرب من بعد
ومن الشعر ما بيّح أسرار وسدود=ومن الشعر ما دل إلى درب الرّشد
ومن الشعر ما اخلص عميلٍ من عميل=ومن الشعر ما أنشب وما كبّل عُقد
ومن الشعر ما دمّر أجيال وعقول=ومن الشعر ما فاد وأصلح ما فسد
ومن الشعر من كان فعيون البشر=راعيه ضحكه في المجالس ما يُعد
ومن الشعر من كان وقعه فالنفوس=من الحسام المشرقيّ أشبا واحد
ومن الشعر من مات واقفا للزوال=وشاعره ينعم بخير وفي سعد
ومن الشعر من شاعره مات وفنا=لكن شعره حي باقي للأبد
هذا وأنا ماني بمتنبي الزمان=أصيب واخطي مثل غيري واجتهد
قبلي وبعدي من هل الشعر الجزيل=شعار والله شعرهم ما يُنتقد
الفيصل والسامر وخالد بن سعود=وبن مساعد لا ذكرت اسمه يَسُد
والناصر الشايع وأبو متعب خلف=وفيصل وناصر وسلطان وسعد
وإلا الزلامي والرشيدي بن ربيع=وَمْحمد الخس وابن قضعان وفهد
ونايف اومدغم وبن حمري علي=وعائض القرني قصيده له سند
وبن مريبد وابن حوقان وفلاح=وتركي ألفين ونكمِّل فالعدد
فرعون شعر النّظم في العصر الحديث=ناصر سبيع اللي قصيده ما أنجّحد
وخالد محمد وبدر وبن بديع=والشيخي وابن سعود في بدعٍ ورد
وخَلفَ المشعان من روس عنزه=وبن جخير وعيضه أمثاله تَشُد
والعذر منكم يا جماهير القصيد=إذا نسيت أحداً بلا قصد وعمد
ذكرت من له في قصيد النظم باع=وإلا في العرضه نجوماً تتّقد
نهج الشعر معنى ومبنى ما اختلف=رثا وحكمه مدح حكام وبلد
ومن الغزل ما تستلذّ به ألهُواه=ومن الفكاهة ما جلا هم ونكد
وأنا قصيدي يوم أصوغه واكتبه=ما أتصنّع إحساسي وبالغ فيه ابد
أصوّر الواقع بعيد عن الخيال=حتى يعيشه من قراه ويستفِد
وأنا اشهد ان مدحي لربعي ما يعيب=قبايلي متعان موفين الوعد
الهمهمي والعبدلي والسالمي=وإلا الرياحين أهل ميثاق وعهد
وإلا المساعيد المطاليق القروم=والغَمَيات اللي ولدهُم ما ضُهد
منّا عواريف وشيوخ وروس قوم=ابن هليّل وابن صغوان وسعد
ثلاثة اورابعُهم سعيد الحصين=من بيت عرف ومشيخه عن بن وجد
بيوتنا قدر الضيوف مشرّعه=ما انحن من اللي لا لفا ضيفه شرد
ضيوفنا تقلط على سمن اوسمان=وإلا عدانا في جحيم وفي كبد
رجّالنا لو زاد فقره ما بَخُل=يذبح ويسلخ باب بيته ما وِصِد
وجارنا يلقى محبة واحترام=ونشاركه همه لو انه كبر أُحُد
واللي يخاوينا على عز وشرف=نغليه ما نلحقه ضن ولا نقد
من روس عبس أهل الشجاعة والفخر=متوارثين العز من جد لولد
من نسل عبسي بن بغيض بن اغطَفَان=بن سعد بن قيس ونزار ابن معد
منا زهير بن جذيمه والربيع=وخالد بن سنان مثله ما ولِد
وعنتر الفارس وقيس بن زهير=وأمين سر اللي رضا ربه سجد
صاحب رسول الله راعِ الخُلق النبيل=ابن اليمان حذيفة الشهم النّجِد
لنا (بِسلْبه) وبـ (ربوع العين) دار=ولنا في الصُدره منازل تنوجد
لنا مع عمرين وبجاله حدود=ومَعَ بني ذبيان حداً سد حد
ولنا مَعَ الجُبّر حدود ومَعْ ثقيف=وحدود مَعْ بنيوس والحُرّث تُعد
وحدودنا مَعَ فهم وبني يزيد=حدود والله ما عطيناها لحد
وسوقنا اللي يختلف عن كل سوق=سوق المراجل والشجاعة والسعد
والقول أمانه والقصايد ما تضيع=يُلحق بها الشاعر ولو جوف اللّحد
واليوم حنّا في أمان وفي نعيم=والله يكفينا شرور أهل الحسد
في هيبة الله ثم هيبة بن سعود=خيّالة العوجا ليا قدح الزند
في حكم أبو متعب عسى عمره طويل=اللي على شعبه ما يذخر له جهد
وولي عهده صاحب الوجه الندي=يا جعل عينٍ ما تحبه للرّمد
لهُم من الشعب المحبة والولا=على الوفا والله ما نخون العهد
وأرواحنا ما ترخص إلا في ثلاث=دون العقيدة والحكومة والبلد

الموضوع الأصلي: سحابة الشعر | | الكاتب: ضيف الله المتعاني العبسي | | المصدر: شبكة بني عبس

[يعقوب العبسي]

صح الله لسانك يالبناخى

[مرزوق العجوني]

صح لسانك اخوي

[@كحيلان@]

صح لسانك على القصيدة الرائعه والجزله
وحنا في أنتظا ر جديدك
والله لايهينك

[ضيف الله المتعاني العبسي]

اقتباس من مشاركة يعقوب العبسي صح الله لسانك يالبناخى

صح الله بدنك



اخوي يعقوب


لاهنت

[العالمي]

صح لسان الشاعر