[ابو محمد العريض]

افتح شبابيك الهوى جيتك اليوم
باحساس من زود الوله وده ايطير
جيتك مثل طفلن له أيام محروم
عن حضن أمه أبعدته المقادير
جيتك مثل عودن له أيام مهموم
وده يلاقي بآخر الوقت تقدير
جيتك حضن عاشق وهايم ومغروم
وده يضمك لين تصبح على خير
متى تحس ان الهوى شي مقسوم
من قسمة الخالق على خلقه يصير
ومتى تحس اني لك اطيح واقوم
واتعب على شانك واقدرك وآغير
لي في هواك احلام وامال وعلوم
واحزاب واصحاب وقصيد وجماهير
وهموم وأفكار وهواجيس وحلوم
وادروب وأخطار وعذاب ومشاوير
وحب وغلا وإخلاص ومعاند ولوم
وإحساس والهام وشعور وتفاكير
وصحبة سهر ومقاطعة لذة النوم
وأشواق جياشه وعشق وتعابير
في ذمتك مابان لك شي مكتوم
من بعد ماصورت الاوضاع تصوير
لاتحسب انك شي عابر ومعدوم
وتاريخ حبك فاق كل الاساطير
كني لقيتك بأغنيه لأم كلثوم
وكني قريتك في رواية شكسبير
في كل شي اتخيلك واسمعك دوم
واتأملك في الوقت الأول ولآخير
من ماضي الأيام لايومك اليوم
وغلاك عندي ماحصل فيه تغيير
وانا لك الله مأقبل البيع والسوم
ولا ارضى علي ولاعليك المخاسير
لاْني الوحيد اللي على بحرك يعوم
واللي عرف مرساه في رحلة السير

الموضوع الأصلي: كنى قريتك فى رواية شكسبير | | الكاتب: ابو محمد العريض | | المصدر: شبكة بني عبس

[صقر المشعلي]

الأخ ابو محمد العريض صح السانك قصيدة رائعه

ويفهم معناها من قراءه اكثر من مره و اعتبرها مد ا من بحر
تقبل مروري مع الطيب تحيه

[سعد المظيبري]

من ماضي الأيام لايومك اليوم
وغلاك عندي ماحصل فيه تغيير

صح لسان قايلها وبيض الله وجهك علي الاختيار

[بنت النور]

ابو محمد العريض قصيدة اكثر من رائعة صح السانك شاعرها

[بقايــا إنســان]

شكرا على نقل هذه الرائعة

[ادري طيبتي غلطه]

الله يعطيكــــ الف عافيه على نقل القصيده كما عودتنا مبدع في اختياراتكـــ متى تحس ان الهوى شي مقسوم من قسمة الخالق على خلقه يصير ومتى تحس اني لك اطيح واقوم واتعب على شانك واقدرك وآغير تقبل مروري

[ابو محمد العريض]

مشكور صقر المشعلى



على مرورك الكريم

[ابو محمد العريض]

مشكور اخوى سعد المضيبرى



على مرورك