[جراح مسلم]

بسم الله الرحمن الرحيم
السلام عليكم ورحمة الله وبركاتة
هذي قصيدة من قصايدي اهديها لمنتدى قبيلة بني عبس واتمنى تحوز على رضاكم

يالله يامحيي هشيم القشع من عقب المسيل=من مدلهمن وسط جوفه ترتعش مخايله
الواحد الفرد الصمد منجي ابراهيم الخليل=يومن رموه بحفرتن فيها اللهايب هايله
الله ومرها في سلام وبرد مع ظلن ظليل=سبحان من هذي تدابيره معا فعايله
اسايلك يالمعتلي في عزلة الليل الطويل=من هاجسن بقصى الضماير ماقدرت احايله
اسامر الجوزا مع السبع وانا حملي ثقيل=واسير ودروب الرجاوي في عيوني مايله
ياكم خدمت ومن خدمني قلتله شكرا جزيل=اجازي الطيب بطيبن جزل من فعايله
يشوقني راع الكرم ياجعل يفداه البخيل=الي طموحاته بكسب المرجله والطايله
ويشوقني حلو الكلام الي معه خلقن جميل=لاقام يقطف مفردات الشعر من مثايله
ويشوقني نور القمر لابان مامثله مثيل=ترتاح به نفسن عناها بالضلوع تشايله
ويشوقني حلو النسيم الياطرق جرد النخيل=في وسط بستانن غصون الورد به متمايله
العمر فرصه واغتنمها واحسب حساب الرحيل=لودامت الدنيا لك ايامن تراها زايله
امر والدنيا اعديها وانا عابر سبيل=مثل الذي زهب زهابن فوق متنه شايله
احيان في غيبوبة الاوهام واجر العويل=وافيق منها من عقب ماشفت نجم القايله
يمكنها غلطة عمر لاشك ضيعت الدليل=وكم واحدن قد ضاع ونجوم الفلك دلايله
حللتلي شيَن مضى واليوم ماشوفه حليل=ابغا آصله لاشك هذا الوقت ماني طايله
ماجور ياقلبي وانا بنصحك بالصبر الجميل=الصبر يازينه على بعض الامور الهايله

وسـلامتكم
الـشاعر جراح مسلم الرشيدي

الموضوع الأصلي: عـطونـا رايـكم بالقصيدة | | الكاتب: جراح مسلم | | المصدر: شبكة بني عبس

[العاقل]

صح السانك قصيده رائعه
وحياك الله ياجراح
تقبل مرور العاقل

[جراح مسلم]

الله يحييك يالعاقل وشكرا على الرد

[برق الوسم]

وعليكم السلام ورحمة الله وبركاته
جراح مسلم الرشيدي
حياك الله وابرك الساعات تواجدك بيننا
وصح لسااانك ... واعتلا شانك ..
قصيده جزله من شاعر جزل
هديتك مقبوله ...وننتظر جديدك ... لاهنت ..
وتقبل خالص الود والتقدير

[مزيون1]

صح لسانك

قصيدة روعه

من شاعر جميل ومعروف

لا هنت

[جراح مسلم]

انا ودي اراسلكم على الخاص لكن ما ادري ليه ماهي عندي صلاحية المشاركة معكم بالخاص يالربع سنعوني

[شاعر وصادق مشاعر]

صح السانك قصيدة جميلة

[هـآوي]

صح السانك قصيده جززله ويعطيك الف الف عافيه