[احمد فالح الخياري]

قصيده لشاعر الكبير رزقان بن معيض بن روضان الخياري موجهه لشيخ / حمود بن نافع بن عياده الخياري أمير الكرشافه رحمه الله

ياحمود قالوا ماأنت ياحمود بالحيل = يالله عسى ماباس ياطيب الفال
ينجيك من نجا الحرم من هل الفيل= اللي شفاء لأيوب ورجع له الحال
اللي شفاء لأيوب عقب البهاذيل= عطف عليه ورد له سرع الأحوال
إنه يفكك من بلا الشر والويل = عساك تبرأ ياولد ماض الأفعال
حيات ربٍ يولج الصبح بالليل= إنك علينا غالين ياأبن الأبطال
فيك البقاء يامقلط البن والهيل = ياللي محله للرجاجيل مدهال
بيته كبير ومدهلٍ للرجاجيل= في ربعته تلقى كريمين الأسبال
في ربعته تلقى الرجال المشاكيل = البن يطرب والسوالف على البال
والنجر يقنب خلف هدف المعاميل= قنيب ذيب وللعشاء يهذل أهذال
اشهب قراء ضار ٍلفرس المخاليل= ضلا يجر الصوت في روس الأجيال
قعد يهجرس بالعوي بالشمهليل= أخطأ العشاء قعد يهوبل تهوبال
النجر حسه حس ذيب الغماليل = ورى بغاديدٍ بها الهيل ينكال
مقعد ولد ماهي علوم الطهابيل = معرب الجدين والأبو والخال
أمير من عرض الرجال الزلازيل= كم حايلٍ للضيف معلوقها مال
جلس بماكر شايبٍ يذبح الحيل= أبن عياده كلمة الحق تنقال
ينزل على الطريق وافي التخاصيل= يفرح به الجيعان وضعيّف الحال
ياريف أهل هجن ٍ ليا جوا فعاليل= تباشروا به بالعشاء عقب مقيال
من لابةٍ يوم اللقاءتنطح الميل= لصار عند قفيهن هوش وقتال
لحقوا ورى البل فوق قبٍ مشاويل= وتحاولو في ماقع ٍ بشهب اللال
تحاولو عند العشاير تقاويل= بأيمن شعيب خريط والدم شلال
من عقب ماهوللعشاير تقاويل= تناكسن لعيالهن شهب الأذيال
راح العقيد ولاحصل له محاصيل = والأبل ردوها فواريس وعيال
وراع الجبل جاهم على الجيش والخيل= باللقاع خلو جثته راسها مال
بقاع السباق اللي عليه التماثيل= يضرب بها التاريخ في ماض الأفعال
ودعب اللعليبي ماثر ٍ به دواليل= سموه ماثر عند سمحات الأقبال
وروضة رماحه رشها الدم ويسيل = من العقيد اللي من الضلع صوال
بس الأضافر فيه إلها جلاجيل= يا ماذبحنا فيه فارس وخيال
ورحبت جهيله يوم جونا جلاجيل= راحوا عشاء في ليلة ٍ سيلها سال
والقاع قاع مبارك اللي بعد قيل= بقاء لنا ميثار والفعل دلال
القوم لحقوهم على ظمر ٍ حيل = وتحاولو بنحورهم عقب موهال
الشيخ عند الشيخ ماهي تهاويل= من كف قرم ٍ للمناعير قتال
مبارك بن عياده ثنى بشهب الكيل= ذب العقيد وطوحه ضد من عال
وشليان فعل يوم لحقوا عزازيل = لما غدوا مابين ميت وزمال
خمسة مواثر عندنا بالتفاصيل= ولاخير باللي هرجته مالها عقال
ضد السباع اللي غزتهم مصاويل= لقصرن روس الشفايا ولأبلال
عقب الجهل عوّد لها بالتساهيل= بعبدالعزيز اللي عدلها تعدال
أرسل عليها بالهدى بالمراسيل= في كل صوب ٍ كلفهم بمرسال
واللي عصاء يحط فيه الولاويل= خلى الصعب يبرك بلا قيد وعقال
حرٍطلع على العرب طلعت سهيل= ونجد تبدل شرها خير الأعمال
صقر الجزيره فضل الحق تفضيل= بالشرع والقرآن خلى لها ظلال
أمطر مطرها راح يدعج بها السيل = طلع مشاريع ٍ بها الناس تهتال
وخلى لها مع العواصم مداخيل= ورسالها مع البواخر على الجال
وخلى لها مع كل فج مواصيل= ودع علاقتها على روس الأقذال
ورحل لعله للجنان التنافيل= في ماكره خلى زحازيح وشبال
حكامنا بالخير لهم مفاعيل= وفهد فهدنا كان ضيم الدهر مال
وسبحان رب ٍنزل الحق تنزيل= وعلى النبي عداد ماهل همال

لكم تحياتي

اخوكم / أحمد فالح الرشيدي

الموضوع الأصلي: فعول الخيــارات | | الكاتب: احمد فالح الخياري | | المصدر: شبكة بني عبس

[سعد بن عادي]

بيض الله وجهك يا بو فالح على النقل
وقصيده مدح من شاعر كبير ومعروف

وصاحب المدح يستاهل



دمتم كما تحبون

[مفلح الخضيري]

لاهنت اخوي احمد على هذا النقل المميز من نوعه وهذي القصيده قاله رزقان ابن روضان الخياري بالشيخ حمود بن عياده

وهو امير الكرشافه رحمة الله عليه وحمود يستاهل ما يقال به من مديح وهو غني عن التعريف شيخ ولد شيخ

والشي هذا معروف عند بني رشيد عامه وعند الخيارات خاصه 0 وهو يعتبر من اكابر الخيارات حسب مايذكر عنه

والشاعر رزقان شاعر له باعآ طويل في مجال الشعر ومعروف ويعتبر من فطاحلة شعراء بني رشيد منذو زمن

قديم تحياتي لك وتقديري اخي احمد

[بشيرالشويلعي]

قصيدة جزلة من شاعر متمكن 0

والشيخ حمود بن نافع رحمه الله غني عن التعريف 0

[مسندالعويمري]

قصيدة جزلة من شاعر متمكن 0

والشيخ حمود بن نافع رحمه الله غني عن التعريف 0

[مساعد]

لاهنت اخوي احمد على هذا النقل المميز

[احمد فالح الخياري]

بن حمد لاهنت اشكر مرورك

احمد

[احمد فالح الخياري]

الشاعر مفلح اشكر مرورك لاهنت

الك تقديري

احمد