[PILOT]

صارلي زمان عضو بالشبكه افتر وافرفر بجميع الاقسام لكن فيه اقسام يمكن مامريتها بالمره امس شفت القسم هذا ويمكن انى دشيته قبل المره لكن ماانتبهت الى الهدف والغايه من القسم

امس انتبهت شفت الاعضاء كل واحد مختلي بنفسه بركنه الخاص وكنت برد على بعض المواضيع لكن قريت قوانين القسم بان الهدف من القسم ان العضو يختلى بنفسه ومن غير ردود

لهذا انشئت ركني بعنوان علامه استفهام وماراح يكون خاص ركني مفتوح لجميع الاعضاء يشرفونى بمرورهم ولهم منطلق الحريه بالردود بركني .

الوقت عندي 11:05 مساء يوم 24/11/2010

مثل هذا الوقت وقبل 12 سنه صار حدث غير حياتى 180 درجه

بتاريخ 24/11/1998 الساعه 4:00 مساء كنت طاير انا ومعاى اثنين من الطيارين كويتى وامريكي كل واحد طاير بطيارته كنا 3 طيارات

وكانت الرحله Air to ground rader bombing يعنى قصف جوي- ارضي عن طريق الرادار

وهذي طيارتي اللى طرتها F/A-18

وكنا راجعين من الرحله وكانت الدنيا مطر وعقبها وقف المطر والجو كان من احلي الاجواء والهواء ساكن والارض من فوق اشوفها رويانه ومناقيع الماي بكل مكان تحتي على الارض وكنت ابى اخلص الرحله حتى اطلع واتمتع بالجو

ردينا القاعده كنت انا بالتشكيل رقم 2 نزل اول واحد ولما طلع من المدرج انا نزلت وكلمت البرج وقالى الريح ساكنه وسمحلى بالنزول نزلت تواير الطياره وكل شئ تمام سويت كل الامور اللى قبل النزول وتاكدت كل شئ زين ولما قربت من المدرج واول مالمست تواير الطياره حصل خلل بطياره ولفت على جانبها اليسار وكان الجناح راح يحوش المدرج لكن الحمدالله عدلتها ولما بغيت اقلع فيها بالسماء وعطيتها كل الباور لفت مره ثانيه وعدلتها ولما تعدلت الطياره وصارت الامور زينه تحت السيطره كان وجه الطياره تغير 45 درجه من اتجاه المدرج وصار خشم الطياره باتجاه برا المدرج على اليسار وكان فيه علامه اللى تعلم الطيار كم باقي مسافه من المدرج والعلامه كبيره واذا صدمتها الطياره احتمال تنفجر واذا ماانفجرت احتمال تنفجر برا المدرج لان بين المدرج وبين التاكسي اللى الطياره تمشي عليه بينهم منهول ماى وكنت املك فقط 2 ثانيتين لان الطياره على سرعتها باتجاه العلامه والمسافه قصيره ففي هذي الثانيتين للطيار ثانيه يقرر شنو بيسوي فيها والثانيه المتبقيه ياخذ الاكشن اللى قرر اذا قرر يقعد بالطياره ياخذ وضع الجلوس وينتظر رحمه الله واذا قرر يطلع ياخذ وضع الخروج ويسحب الكرسي ويطلب رحمه الله

انا قررت اطلع من الطياره سحبت صمام امان الكرسي بنفس اللحظه قذفنى الكرسي بسرعه 30الف كيلو متر بالساعه خارج الطياره انا كنت واعي طول الفتره لكن عقلي مااستوعب السرعه ولاادري شنو صار لحظه الخروج كل اللى اذكره سحبت صمام الامان وشفت دخان تحتى وبعدين بلحظه انا بالسماء من غير الكرسي والبراشوت مفتوح ورجولي تلعب بالهواء قذفنى الكرسي مسافه 150 متر تقريبا والبراشوت لما فتح مالحق يعبي هواء لقصر المسافه حاولت اسحب البراشوت لتحت من خيوطه حتى اعبيه هواء لكن المسافه قريبه ماامدانى على طول بعدها اخذت وضع السقوط على الارض من البراشوت وكنت محتار المس الارض باطراف اصابعي والا بكعب رجلي لان خلال التمارن علومنا السقطه الصحيحه اللى نلمس فيها الارض وتمتص الصدمه ومانعور نفسنا

قلت لنفسي اكيد على الكعب لان الاصابع يمكن تتكسر ولما لمست الارض بكعبي حسيت بنار شبت بجسمي وعرفت لحظتها انى غلطان ولازم المس الارض باصابعي موبكعبي ولما حشت الارض سحبنى البراشوت على الارض ومن الصدمه والدوخه والتعب من الطيحه ضيعت مكان المفتاح اللى يفتح خيوط البراشوت عن جسمي وسحبنى البراشوت مسافه والقشع والشوك قطع صدري ورجولي من التسحب وبعدين فتحت جهه من البراشوت والجهه الثانيه لفت على لمبه من لمبات المدرج وخيط البراشوت لف على رقبتى والهواء ترس البراشوت والبراشوت يبي ينطلق بالارض وانا اسحبه والخيط لاف على رقبتى خانقنى ماقدرت اسحب البراشوت حتى افتح المفتاح واتخلص من البراشوات
وبعد جهد جهيد وخرت الحبل عن رقبتى وفتحت الجهه وتخلصت من البراشوت ولما وقفت لقيت الطياره الحمدالله ماانفجرت الله ستر عليها ماطاحت بالمنهول من القشع وزبر الرمل لفت وكملت تباري المدرج وعقب دشت المدرج ووقفت وانا واقف حسيت بحراره برجولي قطيت وانتم بكرامه الجوتي والا رجولي منتفحه وماقدرت اوقف من الالم وشفت ربعي الطيارين جاييني يركضون عقبها طحت على ظهري من الدوخه

واول واحد وصل عندي رفع رجله وانا على بالى يبي يدوس على وجهي ونزل بكل قوته جنب راس وخرت عنه وانا اقول اشبلاه الخبل هذا وبعدين قالى عند راسك عقرب ذبحتها قبل لاتلدغك قلت لحول طايح من طياره والبراشوت بغي يخنقنى ولما اطيح مااطيح الا جنب عقرب (لك الحمد والمنه يارب على حفظي )

هذا مقطع لطيار كندي طلع بالكرسي وهو يتمرن حق عرض جوي اللى صار انه حاشته دوامات هواء وهذي الدوامات تقطع الهواء عن المحرك ولما قطعت الهواء سرعه الطياره خفت والمحرك ياخذ وقت على مايسوي ريكفر لكن لان مافيه مسافه والطياره قريبه فالطيار ذكي على طول طلع وشوفوا من طلعته وطيحه الطياره جم مر وقت يمكن ثانيه بس

الحمد لله والفضل والمنه لله وحده اللى كتبلى النجاه ونجانى من غير اى كسور او اثار جانبيه

سبحان الله 12 سنه مرت على الحادثه كانها امس والرقم اللى بتوقيعي 5523 هذا الرقم يمثل الطيارين اللي استخدموا الكرسي المصمم من شركه مارتين بيكر
Martin-Baker
ونجوا طبعا بعد فضل الله

انا رقمي هو 5523 يعنى الطيار اللى استخدم الكرسي ونجا طبعا بفضل من الله ثم بفضل كرسي مارتن بيكر يعنى كل طيار يطيح والله يكتبله نجاه يشوفون الرقم وين واصل وياخذ الرقم اللى بعده
وانا الحين عضو مدي الحياه بنادي مارتن الموجود بلندن وهو مقتصر فقط على الطيارين اللى طلعوا بالكرسي وهم يعتبرون قله وفيه اجتماع سنوي ولقاءات وايميلات بينا

الهي لك الحمد والشكر والمنه والثناء الحسن كماتحب وترضي

؟

الموضوع الأصلي: علامه استفهام ؟؟؟ | | الكاتب: PILOT | | المصدر: شبكة بني عبس

[PILOT]

اغلب الناس على بالهم ان عيد الشكر هو عيد يحتفل فيه المسيح لكن عيد الشكر فقط خاص بامريكا

في عام 1620 وصل بعض الإنكليز إلى مدينة بليموث في ولاية ماساتشوستس، وبعد رحلة طويلة وبسبب قلة خبرة المهاجرين في الزراعة والطقس البارد توفي البعض منهم.
وبعد شهور تدخّل أحد الهنود وكان رئيس قبيلة مسيطرة في المدينة فتقرّب من المهاجرين الإنكليز لانقاذهم من المعاناة والخسائر التي تواجههم، فعلمهم الصيد والزراعة.و للاحتفال باول موسم حصاد اقام الإنكليز احتفالا لثلاثة ايام دعوا الهنود اليه ليشكرونهم على المساعدة و...للصلاة.

و منذ ذلك التاريخ بات الاحتفال بعيد الشكر من التراث الاميركي مناسبة للسفر والاجتماع واللقاء.وفي عام 1941 اقر الكونغرس الاميركي الاحتفال بهذا العيد الخميس الذي ياتي قبل السبت الأخير من شهر نوفمبر من كل عام.

يتم طبخ الألاف من الديوك الرومية ولا يترك إلا ديك رومي واحد حى يقدم هدية إلى رئيس الجمهورية الأمريكية فيعفو عنه من أن يأكل.

واليوم هو اخر خميس بشهر نوفمبر وانا اليوم معزوم عند واحد من الزملاء ناكل الديج الرومي اليوم معاه

الموقف الطريف انى سنه 1992 كنت اول ايامي بامريكا عزمني دكتور امريكي على عيد الشكر وكنت انا مع ربعي الله يذكرهم بالخير شرينا ديك رومي حي وعلى بالنا مثل عيد الاضحي لما نذبح الخروف على بالنا نذبح الديك عندهم ولما جبنا الديك قالنا ليش جايبين ديك؟؟ قلنا اليوم يارجال عيدكم ونبي نقدم الواجب جبنالك ذبيحه ديك رومي!! :) قال مشكورين وحط الديك بالحديقه الخلفيه ورحت انا المطبخ واخذت سكين وطلعت للحديقه عشان أذبح الديك

الرجال شافنى انهبل وزوجته وورعانه تروعوا وضيوفه يصيحون وهو يقولي وين انت رايح بالسكين اشتبي اتسوي فيها؟؟؟ قلت ابى اذبح الديك قالى لاياحبيبي شنو تذبح الديك ماعندنا الخرابيط هذي روعت وريعاتنا وخبست قلوب الحريم عطنى السكين!! عطيته السكين اخذها وقالى ياحبيبي الديك نشتريه مثلج مانذبحه؟؟ وبعدين شلون تذبحه جدام الوريعات تبيهم مايرقدون بالليل من الحلوم

قالى الامور هذى ممنوعه ولانك جديد على المجتمع بطوفها لك وقالى ديربالك اتسويها ترا تروح بخرايطها لما تبي تذبح اى شئ تروح المزرعه تذبحه وتجيبه

قلت له خلاص التوبه ومن يومها كل ماجيته تنحاش وراعينه تنخش ماتبينى اشوفها يقولي ارعبت الورعان وعقدتهم
:)

عاد اليوم صاحبي يقول دير بالك تجيب ديك حي تعال بروحك ماحنا ناقصين تخرع




مايدري منو طقاقه
:)

؟

[PILOT]

السنه 1996 توني شاري سوبربان الشكل الجديد واخترت لون رهيب زيتى بذهبي اللون جديد توه نازل والسوبربان كان حده رهيب محبوب البدو وعلى قوله وحده من خالاتى البيت ودك فيه سوبربان موتر وسيع ياخذ العائله كلها بدال لاتقسم العائله لسيارتين
المهم شريت السوبربان وكل مازرت عماتى والا خالاتى قالولي ياعساه مبارك والله يهنيك فيه ماتبينا ياخالتك نهمزه لمكه ( نهمزه يعنى ندزه نسافر عليه ) قلت والله هذي الساعه المباركه المهم شفت اغلب حريمي الكبار متفقات يبون مكه
علمتهم قلت اللى يبي يروح مكه ترا الموتر جاهز والسواق جاهز دارت اتصالات بينهم وكل وحده تتفق مع خويتها
الحصيله كانت امي وعمتى وخالاتي ثنتين واكبر خواتى وولد عمي

ربطنا قشنا وتوكلنا على الله والله انى ماحسيت بالطريق وصلنا سبحان الله بسرعه حركنا تقريبا الساعه 12 ووصلنا مكه الساعه 2 ونص يمكن الفجر طول الطريق سوالف وشرب شاى وقهوه وقدوع تمر طيب
وكل شوي تحشيلى ( يعنى اتسويلى :)) امي صمونه تحطلي فيها جبينه طميطه وسالفه وقصيده وهرج الحريم مايخلص وصلنا مكه وهن للحين يهرجن

لما اعتمرنا خلصنا تقريبا الساعه 3 وشوي المهم قالت خالتى وعمتى ياميتك ( يعنى وانا امك)يابايلوت نبي نحب الحجر الاسود قلت ابشرن وكانت الزحمه موواجد عند الحجر!! كان معاى امي وخالتى وعمتى حجزت الرجال عنهن وخليت امي تحب وبعدين عمتى ولما جاء دور خالتى تاخرت خافت تحب والزحمه ترصها على الحجر وتنكسر سنونها خصوصا انها توها مركبه سنون جديده هاهاهاهاهاهاهاه وانا اقول ياخاله حبي ياخاله ظهري عورني مااقدر احجز الرجال اخلصي وهي متردده وعقبن انحاشت وصكت على الزحمه واحاول اطلع من صوب الحريم الجهه الثانيه ولما طلعت انحاشن الحريم اتذكرهم كانوا باكستانيات كبار انحاشوا ويقولون استغفر الله استغفر الله
وحسيت بعد الحروره حسيت في بروده والا اثاري احرامي اللى رابطه حوالين جسمي اثاريه من الزحمه وانا طالع طاح وطلعت جسمي عريان من تحت وانا استر عمري بيدي وادخل الزحمه مره ثانيه ولفيت الحرام اللى حوالين رقبتى على وانحشت من الحرم
كل مااتذكر شكل الحريم لما طلعت من الزحمه شلون كانوا متجمعات وفجاه انحاشن اضحك

عسي الله يتقبل منى ومن المسلمين صالح الاعمال

قالت البنت للرجال حجي حجي
؟؟؟
التفت الرجال لها قالها انا ماعمري حجيت انا رحت مرتين للعمره قوليلي عمري :)

؟

[PILOT]

مرض التصلب العصبي له معاه قصه الله يكافينا ويكافي المسلمين شره وشر الامراض

السنه 2009 استعدادات على قدم وساق لاحتفالات العيد الوطني وكطيارين كنا مشغولين طول الوقت بالعرض الجوي

تشكيلنا كان 12 طياره وكنت انا وامر السرب نطير مع الطيارين اللى برتبه نقيب وملازم اول كل واحد يطير مع طيار يدربه على الحركات للعرض

المهم مجتمعين بقاعه الاجتماعات بعد رحله التدريب وطيار يشرح الحركات وفجأه والا احس بحراره براسي وشي يمغرصنى وحكه جنها نمل يدبي براسي وقام راسي يفتر

طلعت رحت الدكتور قالى يمكن نقص فيتامينات عطانى فيتامينات لكن ماكو فايده الهرج هذا يوم الخميس واليوم السبت ماهي لحيه فيتامينات الظاهر فيه شئ ليش للحين ماراحت الاعراض ياويلي ويلاه قعدت اوسوس في الامور هذاي مالى الا ابوحجاج دقيت على ابوحجاج بمستشفي ابن سينا

الو تكفي يابوحجاج ياهلا بايلوت ابشر لاتقول تكفي امر اشتبي قلت يااخوك راسي فيه حمه وحروره ونمل يدبي بفروه الراس ابى دكتور يفحص راسي قالى اذا تبي دكتور استشاري مضبوط تعال يوم الاحد الصبح ودق على المويزري رئيس العلاقات يدخلك عليه من غير موعد

قلت اوكيه وانا ادق على المويزري تكفي يااحمد قال اطلب عزك قلت انا مانى بصاحي راسي يحكنى وفيه حروره وانا متروع الوساس ذبحنى قالى ماعليك الا العافيه تعالى الاحد الساعه 8 الصبح ادخلك على دكتور استشاري درجه اولي قلت اوكيه
متى تجي ياالاحد ومن الوساس نزلت كيلو بيومين لوانى اخرت موعد الدكتور شوي عشان انزل 4 كيلو من الوساس وبعدين اشوف الدكتور يكون خوش رجييم

المهم الاحد دشيت على المويزري بمكتبه صباح الخير ياهلا وغلا في بايلوت قلت هلا فيك
قالى المويزري والله يابايلوت عندي خبر موشئ قلت بقلبي هذا للحين ماحد فحصنى يبي يعطينى النتيجه قلت عسي ماشر قالى والله البارحه الاستشاري طاحت دعامات قلبه ودش المستشفي الصدري قلت لاحول ولاقوه الا بالله والحين شلونه قالى والله انه زين لكن شكلك يابايلوت قبست عليه قلت والله هذا اللى الله كاتبه له

المهم شفت دكتور ثاني وفحصنى ودخلونى بالتابوت الرنين المغناطيسي وقالى الدكتور اشتباه مرض التعصب العصبي وهذا المرض
يؤثّر على الأنسجة المتعدّد على الخلايا العصبية، وهي خلايا الدماغوالحبل الشوكي التي تحمل المعلومات، وتخلق الفكر والإدراك، وتسمح للدماغ بالسيطرة على الجسم. يحيط ويحمي البعض من هذه الخلايا العصبية طبقة سميكة تساعد الخلايا العصبية على حمل الإشارات الكهربائية. ويتسبّب تصلّب الأنسجة المتعدّد بدمار تدريجي لهذه الطبقة في كافة أنحاء الدماغ والحبل الشوكي الله يكافينا ويكافي المسلمين شره.

المهم لما قالى انه مشتبه بالمرض هذا انا لحظتها رحت بخرايطها انا اول اوسوس الحين قالى شاك صرت خرجه في مهب الروح
قلت دكتور تاكد قالى عشان اتاكد لازم اخذ من ظهرك عينه من النخاع الشوكي سبحان الله اول شئ طرا على محمود عبدالعزيز في فلم لوتجري جري الوحوش غير رزقك ماتحوش لما يتبرع حق نور الشريف بجزء من نخاعه الشوكي مقابل فلوس وبعدين محمود عبدالعزيز صار مجنون يمشي بالشارع ويقول انا يادكتور مش انا انا مش انا يادكتور انا مش راجل

اهنيه لما تذكرت كلمته اللى يقول فيها رجعولى نخاعي قلت لايابا انحش والله يفرجلك

اذكر لما قال الدكتور ماتبي نفحص النخاع لازم اتسوي اشعه ثانيه قلت اسوي مومشكله ولازم انطر 6 شهور لان بين كل اشعه رنين لازم فتره 6 شهور

مادري شلون مرت 6 شهور لكن الحمدالله نسيتها السالفه بذكر الله

المهم كلمت المويزري تطمنت على الاستشاري قالى زين ويسلم عليك وبعد ماسويت الاشعه الثانيه قلت للمويزري تكفي خل الاستشاري يشوفها ماابى اروح لهذاك الدكتور ياخوك روعنى بكلامه قالى اوكيه

قالى المويزري تعال يوم الثلاثاء الصبح قلت اوكيه

يوم الثلااء تجهزت وظبطت اموري واخذت كل فحوصاتى ورحت للمويزري دخلت عليه المكتب تقهويت وانا ادعي ربي يارب ان كل شئ بالفحوصات يطلع سليم

رحنا لمكتب الدكتور ماحصلناه سئلنا عن الاستشاري جان يقولون الدكاتره سافر الدكتور امس الفجر للهند قلنا ليش قالوا اتصلوا اهله يقولون له ان بنته تطلقت ولازم يجي

لووووووووووووووووووووووووول

طالعنى المويزري وقالى لاتقول ماجبته اكتاف ضيعت حياة المسكين

هاهاهاهاهاهاها

الدكتور بعدين لما رد بعد فتره قال للمويزري تكفي ماابى اشوف ولد عمك كل ماجيت اشوفه اطيح بمصيبه

الحمدالله رحت لدكتور خاص استشاري فحصنى ساعتين كسرنى تكسر وعقبها قالى يابايلوت مافيك الا العافيه من غير شعور حبيت راسه وانا اقوله صج والله دكتور قالى اشفيك وهو يضحك قلت والله مادري من الفرحه لاشعور يادكتور
وقتها توقفت عن الطيران 9 شهور كله فحوصات والحمدالله ان كل شئ سلبي

اللهم اشفنى واشف والدينى واشفي جميع مرضي المسلمين

؟

[PILOT]

ااااااااااااااااه ياعوار الظرس

ألم لايحتمل

؟

[PILOT]

ماجانى نوم من عوار الظرس

قلت اكتب عن الجمعه السوداء في امريكا يمكن انسي عوار الظرس

الجمعه السوداء بامريكا تكون اخر جمعه من شهر نوفمبر وسموها السوداء لانها تكون يوم اسود على الشركات وفرحه للشعب لان التخفيضات لبعض الاجهزه توصل لاكثر من 70%

معاى بالدوره مقدم يمنى محترم وبدوره اقل رتبه فيه اثنين نقباء يمنيين
وعقيد ورائد عراقي

قالوا تكفي يالرشيدي نبيك تودينا للسوق يوم الجمعه قلت ابشروا

ورقدت ليله الجمعه عند اليمني وقعدنا الفجر صلينا الفجر وبعدين طلعنا مبجر لان المحلات بهذا اليوم تفتح الساعه 3 الفجر وتسكر اخر الليل

المهم رحنا وتسوقنا وحصلنا اللى نبيه

هذي بعض الصور ليوم الجمعه الاسود الناس تنام عند المحلات ماسكه دور حتى تدش اول الناس وتاخذ اللى تبي قبل لايخلص

انا والله شريتلى تقريبا 36 ساعه منوعه مابين رجالى ونسائي ولادي وبناتى وشريتلى غريضات وحويجات خفيفه

هذي بعض صور يوم الجمعه

أحد أسباب التسمية بـ الأسود بسبب الانتظار ليلة كاملة في درجة حرارة منخفضة خارج المحلات

؟

[PILOT]

وصلنى ايميل يقول اذا البنغالى قالك مدير فمعناته انك حمار

لان كلمه مدير بالبنغالى معناتها حمار

دشيت العم غوغل وحطيت الموضوع ولقيت الموضوع منتشر والى كاتب الموضوع يقول سأل دكتور هندي وقاله معناها حمار

وانا من الناس اللى احب ابحث عن اى موضوع حتى اعرف حقيقته من زيفه

دخلت موقع تعليم اللغه البنغاليه وانا على فكره اعرف اتكلم لغه الاوردو
وهي اللغه الباكستانيه والهنديه

لقيت كلمه حمار بالبنغالى معناها

قادا=حمار

فرق كبير بين قادا ومدير :)

علامه استفهام
تم حذف يوتيوب من الموضوع بسبب الموسيقي الهادئه

ونفس القسم فيه يوتيوب جره ربابه بقصيده هل جره الربابه

هل الموسيقي محرمه والربابه محلله

؟

[PILOT]

آه لو تدري بعد هذا العمر
إسمك إذا مرني .. يعطرني عطر
آه يا كل العمر
؟