[بدر الحشية]

السلام عليكم
هذي قصيده للشاعر بندر بن سرور
والتي بسببها سجن في السجن السياسي
وبعدها خرج وهو مختل عقليا

القصيده:ماني وانا بندر

يالله ياجال الامور المهمه = تجلا وهج قلب برا حال راعيه
البر دجته والبحر رحت يمه = يقطعك ياحظ على الله مساعيه
يوم ان ولد اللاش رزقه على امه = رزقي على اللي ميت القشع يحييه
يامل قلب كل مامات همه = دارت دواليب الدهر لين تحييه
فراق شمل الناس عيا يلمه=وقت يشيب الراس من شاية فيه
احد ينام وحاط راسه بكمه = واحد تخم النوم عينه وتخطيه
واحد يحاول بالردى بنت عمه =واحد يحاول ستر عذرى عوانيه
ماني وانا بندر ببياع دمه = يقطعك يابياع دمه ومهفيه
اللي يبيع لابسات الازمه =ثور يبابيض الرعابيب تغنيه
يزعل ليا جت ليلة الدور يمه = يرضى بسوق المال فخوه وفابيه
خطو البخيل اللي يكبر معمه = يقرا الكتاب وواجب الله يخليه
إمر هرج لك في رفيقه بنمه = والا عطا وامه تضيع هقاويه
أنشدك ياللي كل فرض تتمه = تقرا الكتاب وكل فرض تصليه
ويش القليب اللي غميق مجمه = مافاد غرسه ماه وعطشى سوانيه
تخالف الانظار شرق ويمه = وكل هدف رآيه من الناس مرضيه
سم السبب ياعارف عنه سمعه= سم السبب ياعارفه قبل اسميه

:
:

وبعد هذي القصيده سجن بندر وخرج من السجن مختل العقل او كما يقال له بين ابناء عمومته مرجوج
وذهب في يوم عندي شيخ قبيلتهم وطرق الباب وردة ابنت الشيخ وسئلها عن اباها
فذهبت تنادي ابها بصوت عالي وتقول : يبه المرجوج عند الباب يبيك
فقال هذي القصيده فيها

ياسهيف الذرعان مانيب مرجوج =رجتني الدنيا بغدر وحيله
يابنت لولا اللي على تاسع الفوج = تركت نجد وعزوه بالقبيله
لا شك حاديني على نجد هيدوج = مسقى الفيافي لين يدرج مسيله
تركي لي من البلاوي غدن عوج = حمله عتيبه كلها ماتشيله
يرسى كما مينا البواخر على الموج = ومنين ماصك البحر ترتكيله
مادام تركي حي ماودي ادوج = وان غاب غبت من الرجوم الطويله

بعد هذي القصيده يقال ان عقله زاد في اختلاله وبدا ينشد الشعر في اوقات مختلفه وطويله فيما بينها وكانت حكيمه على انها كانت تخرج من فم مجنون
وقد حير الشعراء قوة شعره والحكم اللتي بها خاصة بعد جنونه
وقد توفي في منتصف الثمانينيات ميلاديه

الموضوع الأصلي: من روائع بندر بن سرور | | الكاتب: بدر الحشية | | المصدر: شبكة بني عبس

[الاجهر]

قصيدة رائعة من روائع بندر بن سرور رحمه الله

[صقر عبس]

مشا الله عليك يابدر كما عهدنا ذوووقك رفيع لاهنت وصح لسان الشاعر المرحوم بندر

[صادق الوعد]

مشكور اخوي بدر على نقل قصائد الشاعر بندر بن سرور

الله يعطيك العافيه

[فيصل الرشيدي]

شاعر قال عنه الامير محمد الاحمد السديري : عندما اقرأ قصائد بندر بن سرور لا احس بأني شاعر


قيل عنه باحد اللقاءات : بندر بن سرور يجزل بيوته من صخر واغلب قصيده يذكر فيه الصقر والوانيت
بينما الشعراء الاخرين يجزلوا قصائدهم من بحر


اخوي بدر ربي يوفقك ويعطيك العافية وما قصرت

صح لسان الشاعر بندر ورحمة الله عليه


وتسلم عسى تسلم من الشر يمنى الناقل بدر

[بدر الحشية]

الاجهر
صقر عبس
صادق الوعد
سيف عنتر

مشكورين على المرور الرائعولاهنتم