[سلطان العايضي]

قصة عشق من قبل المسفع والشال بدأت لتشعل النيران بين ضلوع العاشق (مرضي الخمعلي)..والذي بهر دلال الغلا بشاعرية رائعة وقدم فنجانها لعشقه..مرضي شاعر شاب يتكئ دائماً على الأصالة والجزالة.. وينسج منها خيوط قصيدته..إليكم هذا النص الجديد لشاعرنا الأنيق..

سما هذا الغلا بين الضلوع وستّـل الجنحـان=يحلّق في مـدارات الخفـوق الحالـك لحالـه
شدا بأعذب حروفٍ للهوى، ويبـادل الألحـان=على كـل المقامـات يعـزف ويجـر موالـه
تباها بأنه لحاله ملك قلـب وشعـور إنسـان=بعد جره على سلك الغـرام وسـاق مرسالـه
بعد شاله على كف السعادة وأشعـل النيـران=وحمس بنّه على جمر الضلوع وبهّـر دلالـه
وأنا اللي للغلا ودلال عشقه جيت له عمسـان=تقهوى العشق من دمّي بعدهـا مـد فنجالـه
هلابه من بدا ذكر الغلا من سالـف الأزمـان=هلابه من سرى حتى وصلنـا وحـط برحالـه
هلابه من خفوقٍ له تحرّا الوصل من ما كـان=طفل ما حط فوق الراس لا مسفـع ولا شالـه
لبس ثوب الغلا وأمطر على صدر الشقا الهتّان=وغسل كل الجروح اللي ربت من قبل ما جا له
سقا حدب العروق اللي روت من قبلها الحرمان=وحضن للقلب واستوطن وحط ضلوعي ظلالـه
سرج خيل الهوى وأصبح وحيدٍ داخل الميـدان=يسابق طيفـه لقلبـي ويرسـم فيـه تمثالـه
يسافر في ربوع الذاكـرة ويحـارب النسيـان=يقول إن ما لفانـي بالخيـال أجيـه وأعنالـه
نشل روحٍ من صروف الزمان تعاني الأحـزان=ونثر كاس الهموم اللـي مـن الأيـام تعبالـه
ورحل بالفكر وحروف القصيد لعالي الأوطـان=ونزل في منزلٍ قبله ما أحد وصلـه ولا طالـه
يقول الدار ملكي ما ينافسنـي عليهـا إنسـان=وأقول الدار دارك يـا حـلاة الـدار وأطلالـه
وشدا بأعذب حروفٍ للهوى ويبـادل الألحـان=وحمس بنّه على جمر الضلوع وبهّـر دلالـه

قصيدة: مرضي الخمعلي

الموضوع الأصلي: الغلا للشاعر / مرضي الخمعلي | | الكاتب: سلطان العايضي | | المصدر: شبكة بني عبس