[آلنجم]

الشاعر الاول نواف منور العازمي من الكويت
ياسلام الله سلامٍ مثل نور الشمس بادي ***** في محل العــزوه اللي نارهم بالحيل حيه
الوعــد يالمورقي بكره اليا نادى المنادي ***** كان مانته في عفيف القاك عند اهل الحويه
الشاعر ملفي المورقي العتيبي من السعودية
مرحبا ترحيبةٍ مسكانها داخــل فؤادي ***** مار أهندســها واترجمها واقدمها هديه
الوعد يا صاحبي وان سـيّل الله كل وادي ***** غير هـــذي لا تقول ولا تلد العين فيّه
(لاحظ الترحيبة انها داخل فواد صاحبها ولم تخرج للشاعر المنافس ) وهذه احد اللقطات الخفيه
نواف
ياعسى فيك البقا يالشاعر اللي مانت عادي ***** مرجعـك من راس تنوره على نجد العذيه
انت مدري مع فريق النصر والا الاتحادي **** ودي اعرف قبل ندخل في تفاصيل القضيه
(وهنا لاحظوا رد نواف مرجعك من راس تنوره ) راس تنوره يرمز الى النار الملتهبه وهذه لقطه خفيه ايضا وفي البيت الثاني يتسال نواف انت مع أي الفريقين سواء الشعراء اة القادة كما هو موضح سابقا
ملفي
السوالف كل ابوها طيبه والجـو هادي ***** قض وقتك بارك الله فيك في روحه وجيه
الخبر يابن الحلال اكبر من اخبار النوادي ***** صارت الدعوى على خيطان مدر السالميه

وهنا لاحظوا استقلال المورقي في نقض البيت (النصر مدر الاتحداي) ان الدعوى اكبر من النوادي سواء موضوع الشاعر اياه او الموضوع الاخر ولا حظوا ان المورقي لم يحدد نادي خيطان او نادي السالميه وانما ذكر خيطان والسالميه ومن الممكن ان تكون نوادي او تكون مناطق او دول
نواف
المطيه فوقها راع المطيه والشــادادي ***** وإنشــد الراعي عن شداد المطيه والمطيه
نسمع أخبار الروادي كل ابوها غير رادي *** ذاك لو إنــه يجيـب اخبار زودها شويه
ملفي
من غزاه الذيب الاشهب لايصيح ولا ينادي **** يحتزم بالسيف ابو حدين من دون الرعيه
تدري ان الداب ما يهتم من سرب الجرادي *** ايتحـرف وايتخيّر راس ذيك وراس ذيه
نواف
يا حليل اللي يحسب انه يصيد ولا يصادي **** لين بكـره تنكبــه ليام نكبـه عالميه
كان رحت إتّابع الغلطات والعلم الوكادي **** يمكن الايام تغــدر فيـك وتصير الضحيه
ملفي
ان نفضنا بيرقٍ منشور وأعلنا الجهـادي ***** دون علم نقصــــده ما نخلف النيه بنيه
الحرايب لاتحسـبها خرا بيـط ودوادي ****** ما يضـد القوم غير سـلاح وعزومٍ قويه

الموضوع الأصلي: الشاعرنواف العازمي والشاعر ملفي العتيبي | | الكاتب: آلنجم | | المصدر: شبكة بني عبس

[بيطار الشعر]

الله يرحم نواف العازمي وصح اللسان ملفي المورقي ولاهنت يالنجم على النقل

[إحسـآس شـآعـر]

. . . الله يرحمك يآنوآف العازمي ,, وصح ألسنتهم ,, نواف أسطوره وملفي شاعر كبير وآسطوره ,, لآهنت طال عمرك ,,

[آلنجم]

شاعرعلم رحمه الله

[آلنجم]

راح علم من اعلام الشعر؟؟لاهنت ياراس مشعاب

[آلفهد]

يا حليل اللي يحسب انه يصيد ولا يصادي **** لين بكـره تنكبــه ليام نكبـه عالميه

رحمك الله يابوعبدالعزيزوالساحه بعده مالها؟؟اي حماس ونظر

لاهنت يانجم