[الشبح]

السلام عليكم ورحمة الله وبركاتة

أقيمت هذه الثلاث محاورات في وقت واحد


الشبح

يا سلام الله على الحر النداوي والجماعه...من هجوس الشاعر الي كلبوكم تعرفونه
الله الله والشعر ياهل الشعر ماهو بضاعه...موهبه والموهبه وهبه من الي تعبدونه

الحر النداوي

مرحبا ياللي تسلم والرجل عزه ذراعـه...غن واسر الليل يارجال بالقاف ولحونه

الشعر مايشبه ألا سوق أبه شريه وباعه...الردي تلقى ردي والطيب يحصل زبونه

الشبح

البقى بلي يرحب في محل أهل الشجاعه ... شاعرن ما نعرفه والبشت يلقاله زبونه
انته أتقول الكلام الي تقوله عن قناعه... او تقوله عن جهل والجهل مطموسه عيونه

الحر النداوي

أبك أنا شاعر ليا خاض المعارك باستطاعه...يحشر الشاعر يالين أنه ينطق له جنونـه

الشبح هذا عرفنـا رؤيتـه ولاأنطباعـه..يجمع الابيات ويصرف على اللي يقابلونه

الشبح

الشعر مثل السفينه والهوا يدفدف شراعه...علم المرضاان لامنه صحى ايسدد ديونه
الشبح شاعر وناقد ما دخل قلبه طماعه ...ما دخل قلبه حسد ياهل الحسد لا تحسدونه


الحر النداوي

أنشدو ناصر خنيفر عن رياجيل الشجاعه...يخبرك بالحر والعمـده أكيـد تصدقونـه

ياشبح لو نركبك قطعتنـا دار القطاعـه...تقطع الفرجه وسواقـي يكلـم تيلفونـه

الشبح

هرجتك هذي ترا فيها شوي امن اللكاعه ...ناصر العمده خصيمك بالمعارك تبغضونه
يارجاجيل ألمعرفه والوفا ياهل الجزاعه...ما رضينا بالخطا وراع الخطا لا تشجعونه


الحر النداوي

هرجنا هرج الرجال وهرجكـم هـرج البتاعـه..الوعل لويدحـم الضلعـان تكسرلـه قرونـه

كيف أباأغشك وأنا حاسبك أخوي من الرضاعه..أنتبـه للاولـه والثانيـه دونــك ودونــه

ابو موسى

الله يجيب النداوي والنداوي بعيد ** في تالي الليل مالي حيله احصله
القل ما زادكم ياهل ترى من مزيد ** الكل منكم يحاول فك قيد اجمله

الشبح

جاك الشبح والشبح شاعر جزيل وجديد.......ماني من الي بوسط السله المهمله
العلم والمعرفه ماهي دروس البليد ...الي يبا يزرع الزرعه بلا سنبله

ابو موسى

مافيه عيدن لكم لا اقفا عن العيد عيد ** واللي بوسط الكويت القلب ما ينقله
الما تحتكم ولا خش البلل فالوريد ** لو تزرعون العنب يطلع لكم حنضله

الشبح

أحسبك راعي معرفه تستفيد وتفيد... وأثرك كما الانتحاري مدعس القنبله
بالله من خطة التفجير من مستفيد ...راح أقتصاد البدو في هرج ما تنقله


ابو موسى

بستانكم مرته سلمى وجاله حصيد ** مدري هو الحسدولا اللعنه المنزله
لو بيت واحد يكفي عن بيوت القصيد ** اقول مريتكم والبيت منحلله

الشبح

الصيد له من يصيده وانت مصيود صيد .. وبستاننا عن وجيهه الغشم أبا قفله
كفيت وفيت لو ما جبت علمن وكيد...أنشد هل العرف وأهل العرف ما تجهله


القنبله

حياك ربي بعد ماجيت بثياب عيد.......والعيدماهو بعيدك عيد للقنبله
الظاهر انك بديت الطرق بسمن فريد.......ومدري يجي باخر اسمك اويجي باوله


الشبح

أحبيب العازمي ماهو الزلامي رشيد .. وانا الشبح نسخته ولي تقوله قله
القنبله قنبله والظاهر انه شديد ... لكن وقت الحرايب يضرب القنبله


القنبله

خلك قريب من المعني وخلك بعيد...والعلم ماهو بعلم النسخه المزله
ياكيف اعلمك بنك من اعيال العبيد...والعلم عندي وعلمك ياولد نجهله

الشبح

يا بنك يلي على ما قيل مابك رصيد...يالحر دامه كذى وشلون أبا عامله
على علابيك كسرنا جميع الجريد...ملقوف والعاقل موكد ترا منزله


اتمنى ان تعجبكم هذه المحاورات الشيقه

الموضوع الأصلي: الشبح .. النداوي .. القنبله .. ابو موسى .. محاوره | | الكاتب: الشبح | | المصدر: شبكة بني عبس

[كاتب الرشيدي]

صح لسانك والجميع


ماقصرتم استمتعا

تحياتي

[(ابوعواض)]

صح الله لسانهم

لاهنت ع التنسيق

[ابو موسى]

مشكور يا الشبح بيض الله وجهك

[الحر النداوي]

مشكور ياشبح على التنسيق

[الشبح]

مشكورين على المرور

[ناصر الخياري]

رباعيه رائعه ..