[بدر الحشية]

اثناء تصفحي لاحد المواقع القبلية وجدت هذه القصيدة لكن للاسف لا اعرف اسم الشاعر ارجوا ممن يعرف قائل القصيدة ان يمدنا به

[راكبلى وصفها معروف من عوص النجايب=وصفها مثل الجنيه اليا صفا وزنه ولونه
من سلايل جيش عيال الزول زينات الركايب=وسمها الكفه ياحي الوسم واللي ياسمونه
ربعت بالوادى اللى علته غر السحايب=الشعيب اللى مفرقة الولايف ينزلونه
دللوها بالرسن وشداد زينات الجنايب=الرسن فى راسها كن الصحافه يرسمونه
روحت تلفح سفايفها مثل شقر الذوايب=فوق من كد الجدايل لين مال (ن) مع متونه
كن بين عيونها لادرهمت نار ولهايب=تشبه لذيب عدى وعيونها تشبه عيونه
اشهب السرحان وان جاء بين وديان وجذايب=مع تخاتيخ الخلا والقيض يابسة(ن) شنونه
روحت مع خايع (ن) تذريه صلفات الهبايب=تقل تاخذ من صحارى نجد بيديها نمونه
فوقها المندوب فى عزالشباب وتقل شايب=شايب(ن) على الشجاعه والكرامه والخشونه
قال انا راعى الذلول وبالرسايل عنك نايب=وبن عابس ياذلولى لاتغيب الشمس دونه
وبن عابس شاعر (ن) من عبس عطبين الضرايب=شاعركن الذهب والول يصرف من لحونه
من هل النخوه مقابيس العدى يوم الحرايب=من يصيبونه بصابه مات مابريت طعونه
بالحميه يرفعون الراس من حاضر وغايب=الصديق يفرحونه والعدوا يكرهونه
وللخوى والجار مافيها جدال ولاطلايب=لويعيش العمر كله مالقى حي يخونه
المقابيس النواحيش الذوابيح العطايب=الرصاص اليا رموا بين الاحجه ينقفونه
مايهابون الخطر و الموت لوالدم رايب=لو يباع الموت فى نهار الحرابه يشترونه
دون ابانات العذيه والشعيبين الخصايب=القهد والوادى اللىيبست الارياق دونه
ومن شمال من المدينه شمخ السود الرقايب=وضلع(ن) ابيض مثل غر المزن فوق الغيم لونه
والرجوم السود وفياض الضحايا والزرايب=منوتى ومناى شوف الدار واللى يدهلونه
احتموها يوم دورات المغازى والكسايب=كل عد(ن) فوق زينات الركايب ياردونه
وردوهن صافي الماء والقمر بالقيض غابي=والبلا فرقى الوليف من الوليف يفرقونه
ولايصح الا الصحيح ومن يقول الكذب خايب =والرجال اهل الوفاء وعلم الوفاء مايجحدونه

الموضوع الأصلي: من القائل؟؟؟ | | الكاتب: بدر الحشية | | المصدر: شبكة بني عبس

[مهاجر بلا زاد]

لا اعلم وانصحك بالبحث في الياهوو قد تجد من قائلها ؟

[ناصر خنيفر]

اخي الكريم القصيده ماره علي وعرفها ولكن راحت عن بالي الان واعتقد اذا كان ماني غلطان انها لعبد الله ابن عون العتيبي

[أنكسارحلم]

الاخ بدر الحشيه اسعدالله اوقاتك في كل خير
اليك ماطلبت الا ستفسار عنه وهي مساجله بين الشاعرين الشاعر ذويب رجاء
الخياري والشاعر سعدان عابس ( شاعر عبس )

يقول الشاعر ذويب بن رجا ..

راكب اللى وصفها معروف من عوص النجايب=وصفها مثل الجنيه اليا صفا وزنه ولونه
من سلايل جيش عيال الزول زينات الركايب=وسمها الكفه ياحي الوسم واللي ياسمونه
ربعت بالوادى اللى علته غر السحايب=الشعيب اللى مفرقة الولايف ينزلونه
دللوها بالرسن وشداد زينات الجنايب=الرسن فى راسها كن الصحافه يرسمونه
روحت تلفح سفايفها مثل شقر الذوايب=فوق من كد الجدايل لين مال (ن) مع متونه
كن بين عيونها لادرهمت نار ولهايب=تشبه لذيبٍ عدى وعيونها تشبه عيونه
اشهب السرحان وان جاء بين وديان وجذايب=مع تخاتيخ الخلا والقيض يابسة(ن) شنونه
روحت مع خايع (ن) تذريه صلفات الهبايب=تقل تاخذ من صحارى نجد بيديها نمونه
فوقها المندوب فى عزالشباب وتقل شايب=شايب(ن) على الشجاعه والكرامه والخشونه
قال انا راعى الذلول وبالرسايل عنك نايب=وبن عابس ياذلولى لاتغيب الشمس دونه
وبن عابس شاعر (ن) من عبس عطبين الضرايب=شاعر كن الذهب والـلول يصرف من لحونه
من هل النخوه مقابيس العدى يوم الحرايب=من يصيبونه بأصابه مات مابريت طعونه
بالحميه يرفعون الراس من حاضر وغايب=الصديق يفرحونه والعدوا يكرهونه
وللخوى والجار مافيها جدال ولاطلايب=لويعيش العمر كله مالقى حي يخونه
المقابيس النواحيش الذوابيح العطايب=الرصاص اليا رموا بين الاحجه ينقفونه
مايهابون الخطر و الموت لوالدم رايب=لو يباع الموت ف نهار الحرابه يشترونه
دون ابانات العذيه والشعيبين الخصايب=القهد والوادى اللى يبست الارياق دونه
ومن شمال من المدينه شمخ السود الرقايب=وضلع(ن) ابيض مثل غر المزن فوق الغيم لونه
والرجوم السود وفياض الضحايا والزرايب=منوتى ومناى شوف الدار واللى يدهلونه
احتموها يوم دورات المغازى والكسايب=كل عد(ن) فوق زينات الركايب ياردونه
وردوهن صافي الماء والقمر بالقيض غابي=والبلا فرقى الوليف من الوليف يفرقونه
ولايصح الا الصحيح ومن يقول الكذب خايب=والرجال اهل الوفاء وعلم الوفاء مايجحدونه

.................................................. ...........................

وهذا مرد شاعر عبس ..سعدان بن عابس ..

مرحبا ماهلّ همال الحيا والجو طايب = من صدوق النو ..وسميا ً مجاهيمم ٍ مزونه
ساقه الرحمن ..خلاق البشر .. جزل الوهايب = بارقه يفرا ظلام الليل ..ويبدد سكونه
مرحبا ما هلّ وبله وارتوت منه الرغايب= وماتبين باذره بأوراق عشبه في حتونه
بالرسالة والذلول ومن عليها يا اخو ذايب= والقصيد .. ومن تذكّر طيب ربعه يذكرونه
والشعور الحي يحيي ..والعرب مخطي وصايب = شانهم شيء ٍ يعرفونه وشيء ٍ يجهلونه
والتجاهل من سمات ابليس ملعون الصلايب = الله انه يلعن الشيطان واللي يتبعونه
الشجاع يقول قول الحق مايخشى السبايب = مايموت ابه الضمير ولا يغرنه ظنونه
انت يا الي بالوفاء والطيب ..طيّـبت الطرايب =مفردات الشعر ..وهجوس ٍ بخافيك مخزونه
صافحتني منك غيداً ماشناها منك عايب = شرفتني وانت مفهوم الشرف ..تدرك فنونه
ياشريف الذات والمبدأ فدوك من الزلايب= ناقصين العرف والمعروف ..عشاق المهونه
ياذويب ..كل راعي عز مايرضى الغلايب=والجبان يعيش عيشة ذل ..والنفس مغبونه
ماثبت غير الجبال ولاتطيح الا الزرايب = الجبل ما هزت الأرياح ركن ٍ من ركونه
وانت مرسالك وصلني فوق طاويت الخرايب = الأصيل اللي لزيم اشدادها تبري شطونه
قلت يالله حي راعيها وياحي الشبايب= مفردات ٍ ما بهن شكوى ولاطلبة معونه
مير انا ياابن رجا .. عيناك في وقت النوايب = خذ كلام ٍ قاصرين المعرفة ما يدركونه
ماعرف حق البعايد ..من جهل حق القرايب= والليالي مسرجات ٍ بالشدايد ومعنونه
جارنا وياك رب البيت من سو المصايب= الأوادم يجهلون المر .. حتى يطعمونه
والصعايب ما تطيح الأ لجـّلاد الصعايب = واثق ٍ ناس ٍ يحبونه وناس ٍ يكرهونه
استعين بخالق الأنسان من صلب وترايب = الله اللي موجبات الأمر في كافه ونونه
القريب المستجيب لمن طلب رحماه تايب = مالك امر الكون كله والبشر ما يملكونه
ياوريث امجاد مرذين الكتايب بالكتايب = عزوة ٍ ..حب الأعادي في رحاهم يطحنونه
صدق ..مجد ٍ من رشيد وعبس .. ماشابه شوايب =تنثني هجانة التاريخ عن هيبة حصونه
صرح عز ٍ قبل وقت ام المعارك والغرايب = والكلام ومن يقولونه وهم ما يفهمونه
يانزيه الفكر والتفكير .. وافكارك ذرايب = خذ نقا عهد ٍ ..وميثاق ٍ نقا مثلك يصونه

تحياتي

[بدر الحشية]

الف شكر لك اخوي ناصر على تقديمك للمساجلة
تحياتي لك