[رشيد]

قصيدة رائعة للشاعر محمد الجارالله السهلي


*


الفكر ضد المـوت فـي كـل الاوقـات

واللـي بليّـا فكـر عايـش بتابـوت


الصـح منـه يـدوم ويخلـد أمـوات

والاّ الغلـط مجـرد سنيـن ويـمـوت


والشعر لوما صار (ساعي قناعـات )

يصبح حكي .. لكن على هيئة بيوت !!


والصـدق مفتـاح الكرامـة ومنجـاة

يكسيك من لبس الثناء مشلـح وكـوت


والكذب نقص عقول وفعـول واثبـات:

بان أغلـب الياقـوت ماهـو بياقـوت


والحب (أحلى شي) .. إلاّ مـع الـذات

والدار (أغلى شـي) .. إلاّ بـلا قـوت


والدين .. عز .. وهيمنة .. وانتصارات

لاصار فعـل وقـول وإجهـاد وقنـوت


يوم المشايخ .. قبل عصـر الدويـلات

تنقل كفن وسـلاح ماتنقـل بشـوت !!


في وقتها ياهـل الخطـب والشعـارات

سالت دموع العز من (عين جالـوت)!!


وفـي وقتنـا .. ياصانعيـن القـرارات

نضحّي بغزة علـى شـان بيـروت !!


والفرق شاسع .. ياصراع الحضـارات

والقول أكيـد .. وبالأدلـة .. ومثبـوت


الماضي: أمجـاد وشمـوخ وفتوحـات

والحاضر: مهايط ومقهـى وبيلـوت !!


وأمـرّ وآدهـى .. ماهـو قـادم وآت

لاصـار واقعنـا مبهـذل وممـقـوت


يمثـل الأمـة فـي الامـة عصابـات

وعلى خراب بيـوت تتعمـر بيـوت !!


جلسات سريّة علـى شـان جلسـات

تفوّت اللـي مستحيـل انـه يفـوت !!


واللعب واضح فـي جميـع المجـالات

بتشوت ؟! صلح لي أصلح لك اتشوت !!


والخيـر بيّـن فـي وجيـه البشـوات

والشعب مستهلـك ومتعـب ومكبـوت


حرية الراي : اختصـاص القيـادات !!

وحنا تخصص ذل وانصـات وسكـوت!


ياصاحبي .. خل القصـص والحكايـات

وش ميزة التوت ؟ ان فقد لذة التوت ؟!


إن مت ! من قول الحقايق .. سهـالات

على الأقل تدري على ويش بتمـوت !!


والمشكله ماهيب في كثـر الاصـوات

المشكله لاصار ما للعقـل صـوت !!

الموضوع الأصلي: بتشوت ؟! صلح لي أصلح لك اتشوت !! | | الكاتب: رشيد | | المصدر: شبكة بني عبس

[الـرونـق]

صح لسانه


تسلم على النقل الجميل

[ابو ريتاج]

صح السانه وشكور ع النقل وتقبل مروري

[المشعل]

يعطيك العافيه رشيد

ابياات راائعه صح السان شاعرها

ولاهنت على النقل الرائع والاختيار الموفق

تحياتي لك

[رشيد]

سلمتم احبتي ولا ندمتم

صح لسان شاعرها ولاهنتم

[عبدالعزيزعلي]

تسلم رشيد ع النقل الرائع

[رسام]

مشكور اخوي على القصيده الذووق وصح لسان شاعرهــا