[عيسى العرعري]

السلام عليكم .. وفي لغة أخرى ( سين واحد )

عمر الانسان عبارة عن سلسله من مواقف وتجارب يعيشها

بعض من هالمواقف تبقى بالذاكرة مايمسحها

ومواقف غيرها تمر مرور عابر .. ولايبقى منها الا ملامح ابتسامه

من المواقف اللي نمر فيها كلنا ..

( الخطا غير المتعمــــد )

نتعرض لاساءات .. لانعلم ماذا خلفها.. ولانعلم حقيقتها
او تصادف مشهد حياتي .. نعجز اننا نحدد معالمه شخصياته.. وبيان حقيقته ..ومن وراء فصول هذه المسرحيه

حصل موقف من النوع المحرج الخفيف

كنت ابي ارسل مسج لواحد من الاصدقاء .. وكنت مخزن اسمه ب ( ابو عبدالله) ..
وكنت ابي منه غرض ضروري وكان متأخر علي ..ولانه صديق مقرب جدا ..
كتبت له رسالة عتب قويه ( ياللي ماتستحي ..الشرهة مهيب عليك..
الشرهة على اللي يعتمد عليك .. لكن يجيبك الموز ياقرد و و و و .. الخ
وكلام مايتحمله الا الرفيق الموالي وتفاصيل الطلب اللي وربي تخلي
كوفي عنان يطق البرمودا في اجتماع هيئة الامم

) ..

وبدل ماارسل هالرساله لابو عبدالله ارسلتها لعمي الكبير اللي مخزن اسمه ب ( ابو عبدالاله) ..
انا شفت تسليم الرساله لابو عبدالاله.. حفرت حفره تحتي .. وكتبت على بلوكه فوقها ( عيســى راح غلطه)

قفلت الجوال على طول .. وانحست شوي من الفشله ..
شغلت الجوال بعد فتره الا خدمة موجود شوي وتقول لي( وينك يالهيس عمك يدورك)

..

الا عمي يتصل ..
وارد عليه وانا ساكت الا عمي يضحك ويقول
( وش رايك تجيني تصكني كم مخمس لاني طولت عليك بالغرض يالهيس...طالع لابوك ماتخلي هالخنبقه عنك) .. والله ياعم جد خالي اني احم احم

..

مدري وش اقول .. لكن من جد انا اسف وماكنت اقصد ..

حكيت لي احدى المواقف والاخطاء الغير متعمده واللي تسببت بمشاكل عائليه اكل عليها الزمن وهضم ببيبسي
وتوارثتها اجيال وراء اجيال

من هالمواقف .. اتصال من فتاة لقريبتها تطلب منها رقم جوال الكوافيره اللي تتعامل معها
القريبه وبخطأ غير مقصود ..اعطتها جوال قريبه ثالثه لهم تحمل نفس اسم الكوافيره ( يعني كلهم اسمهم رجاء بنت شيبه) <<

وه يالمغرب

الطرف الاول والطرف الثالث بالسالفه .. بينهم بنزين ونار ينتظر اشعال بس .. دقت عليها ذيك .. واول ماسمعت صوتها انها سعوديه عرفت انها غلطانه من غير ماتعرف صاحبة الرقم .. لكن ذيك عرفت من هي .. قامت وولعت الارض حرائق انها تزعجها وتتصل عليها وعلى زوجها وتبي تخرب بينهم ..
والنهاية ... للاسف كانت قطيعة رحم من الفئة الذهبية

مواقف بسيطة وعابرة .. كان الخطا فيه غير متعمد ..
لكن هناك كثير من المواقف اللي ممكن تزلزل حياتك كلها .. بسبب اخطاء غير متعمده..
وكثير نسمع عن خراب بيوت بسبب مثل هالاخطاء .. وكثير نسمع عن انتقامات بسبب مثل هالاخطاء ..

المواقف كثيره .. والذاكره تنشط عند مثل هالمواقف ..

-نبي نسمع من بعض مثل هالمواقف ..
وكيف تعاملنا معها سواء كنت انت الجاني الغير متعمد .. او الضحية الغير مقصودة..
وهل كنت تملك الشجاعة في مواجهتها؟؟
- هل تفرض حسن النية اولا في بدايات هالمواقف لحين التحقق من حقيقة الموقف؟؟
- هل تسامح سريعا بعد وضوح الحقيقه والا تشيل الزعل فوق راسك .. وتقول جت من الله ولقيت زلة عليه؟؟

ننتظر حلاوة مشاركاتكم

الموضوع الأصلي: أنـــــــــــــا آســـــــــــف .. والله ماكــنــت أقــصــد | | الكاتب: عيسى العرعري | | المصدر: شبكة بني عبس

[صلاح المهيمزي]

وبدل ماارسل هالرساله لابو عبدالله ارسلتها لعمي الكبير اللي مخزن اسمه ب ( ابو عبدالاله) .. انا شفت تسليم الرساله لابو عبدالاله.. حفرت حفره تحتي .. وكتبت على بلوكه فوقها ( عيســى راح غلطه)

ههههههههههههههههههههههههههههه

اجمل مافي القصه


القصه رائعه بس هذا الاروع


تحياتي لك



لي عودهـ

[عيسى العرعري]

اقتباس من مشاركة اسير الشوق ههههههههههههههههههههههههههههه اجمل مافي القصه القصه رائعه بس هذا الاروع تحياتي لك لي عودهـ

اخوي اسير//:::> يرفع يده ويقوول :::> يارب يصيرله زي ما صارلي

دووم الزززحك يا رب
// مشكور اخوي على مروورك
تقبل تحياتي