[سعد المظيبري]

قصيده مؤثره من شاعره رائعه في كل حالاتها حتى لحظة احتضارها كانت تنزف شعرا ..
تقول لزوجها واولادها ..

ترى الذبايح وأهلها ماتسليني
أنا أدري إن المرض لايمكن علاجه
أنا أدري إنك تبي راحتي يابعد عيني
حرام ماقصرت بيدونيك بحاجه
إخذ وصاتي أمانة لا تبكيني
لوكان خاطري ماودي ازعاجه
أبيك بيدينك تشهدني وتسقيني
أمانتك لايجي جسمى بثلاجه
لف الكفن بيدينك ولف رجليني
ماغيرك كشف حسنا هو افراجه
أبيك بالخير تذكرني وتطريني
يجيرني خالقي من نار وهاجه
سامح على اللي جرى مابينك وبيني
أيام أمشي عدل وأيام منعاجه
عيالي همى وأنا الي فيني مكفيني
علمهم الدين تفسيره ومنهاجه
.....................................

رد زوجها علي القصيدة ...


حاولت أنام وحاربت عيني النوم
وجريت صوت مثل صوت الذيابه
والجفن كنه صاير وسطه هزوم
ودموع عيني مثل رش السحابه
على وليفٍ قالوا اليوم مرحوم
راح وتوفى ماتهنى في شبابه
زرت القبور اللى على بعضها رسوم
حطيت رسمٍ فوق ذيك النصابه
قلبي من الدنيا عليل ومرسوم
الوسم توه عقب خط الكتابه
أحبها مير القدر صار مقسوم
ويحبها كل الأهل والقرابة
الموت أخذها وأودع القلب مسلوم
جرح عميقٍ مايداوي صوابه
الموت أخذ شجعان ورخوم وأقروم
وأخذ رسول الله وباقي الصحابه.

اللهم تغمد روحها الجميله فسيح جناتك والهم اهلها وذويها الصبر والسلون

الموضوع الأصلي: وصية الشاعره عابرة سبيل ورد زوجها عليها | | الكاتب: سعد المظيبري | | المصدر: شبكة بني عبس