[رشيد]

ما قلت بدي شي ولا ما بديش
==============
عبدالله مرزوق المرشدي




رد الثنا بالشكر ماهوب تطنيش

* كلمة وفا لا قلتها تبرد الجاش

ما قلت بدي شي والا ما بديش

* كلمه بدت من خاطري قلتها كاش

يا صاحبي لا صار بالفكر تشويش

* يحس من كيفه ويضرب على ماش

ماكل قول تسمعه تفتهم ويش

* من هرجة الشعار تنصاب برباش

محدٍ بسامع لك ليا قلته له ليش

* ولانته بفاهم لين تتعب وتنداش

اقر السطور وخل عنك الخرابيش

* ناظر بعينك زين لا ترمش رماش

لا تحرك الاشجان يا ناعم الريش

* ريح ضميرك من متاهات ونقاش

ماني بيمك يا عشيق المرابيش

* اشوم بعيوني وفكري ليا طاش

اقلط على الواجب واكب العراميش

* ولا صدت صيد اترك على دربي عراش

نفسي لها عن ماكر العز تنبيش

* وعيني سما لو كنت جالس على فراش

طبعي وفا مافيه كذب وتغشيش

* قرم شجيع وقلبي ابيض من الشاش

يشدني برق المزون المراهيش

* اطرب ليا من شفت جاي له.. رعاش

ماتهت مع راع الكفوف المناقيش

* حب البني ما حط في قلبي عشاش

الا التي ما عرضت للطواريش

* ريم هواها صار في مهجتي داش

بدر ملكته في طرف نوره اعيش

* وانسى النجوم اللي لها لمعة فلاش

ما ودي اذكر حسنها الحين واطيش

* ادري بقيفاني على وصفها عطاش

ماني مهمش مطلع القاف تهميش

* اخاف مما قلت يجيك هشاش

القصد واضح ما خدش القيل تخديش

* قول سليم ولا بدا فيه وشواش

اترك زمان اللعب والحب والطيش

* لا تصير خبل من ورا الناس تعتاش

مافيه باللفات نقطة وتفتيش

* دربك خضر ليتك مع الدرب تنحاش

الموضوع الأصلي: ما قلت بدي شي ولا ما بديـش....! | | الكاتب: رشيد | | المصدر: شبكة بني عبس

[القزم]

:p:p:p:p

[عبيد الله دعيع]

قصيدة جزلة يارشيد بيض الله وجهك سجل أعجابي بها :p :p :p :p :p :p

[سعــدعبدالعزيز]

جزلة يارشيد بيض الله وجهك سجل أعجابي بذوقك

[رشيد]

يالله انك تسلمهم من كل شر

اسعدني حضوركم وتواجدكم أحبتي