[المقبل]

اعزائي القرااااء .. اقدم لكم الفصل الأول من رواية ((ليالي القبيبة )) محاولا ان الفتكم ان هذة القصة هي من نسج خيالي ولاتمت للواقع بأي صلة أوأشخاص مقصودين وانما كتبتها بطابع كوميدي لاأكثر للتسلية فقط واتمنى ان تنال اعجابكم .. واذا وجدتم أي ملاحظة او نقد على الرواية الرجاء اعلامي وتعديلي وانا اثق برأيكم وسأسير علية بكل ود واخاء .. ارجو من الله ان يديم بيننا الاخوة والمحبة المتفانية ....
(( الفصل الأول ))
((ماوراء المركز ))

في تلة من تلال بلاد ماوراء المركز .. فية بنت تسرح بالغنم وتلعب مع عنزتها التي تحبها (( السوح )) من سنتين وهي معها حتى في النوم ترقد بجمبها وعلى ريحتها .. نوير بطلة القصة بنت الشيخ معيبد طولها 169 سم ووزنها 50 كيلو تتميز بفم واسع واسنان كركمية ويدان خشبيتان .. وتضع الصبغة ( الشيقور ) في رأسها وهي احدى مميزاتها الجمالية .. ترتدي برقع مرصع باللؤلؤ الاحمر ليظهر عيناها الواسعتان .. فستانها الاحمر ( برنسيس ) وطبعا كلة تراب ...... فجأة راغت من جمبها ددسن غمارة مغبرة وصوت بواري ( الروسي ) يسمعها اهل المدينة .. وقفت السيارة وطبح منها ولد في العشرينات متلطم وبيدة بندق وعيونة كلها شر .. خافت نوير وقالت : اخووووي فزااع ....

صوب البندقية لراسها وقال : لعنلاهابو اللي انتي لة .. انا وش انا قايلك وش يتركز فيك في الوديــــــان تدورين ...... ؟ حنا جايبين سوادني يسرح بالغنم وش مطلعك ..؟؟ والله لادفنك في محلك يالهاملة ...؟؟ ردت نوير : يااخوك فزااع لاتذبحني انا ماتجوزت ولاتهنيت بشبابي .... طارت برقبتة وهي تصيح : ياخوك فزااع والله مااعودها ... جرها من شعرها وركبها في الغمارة .... فزاع : انا اوديك لابوي هناك في البيت اخلية يحس رجلة في فمك لاركبتة .. ياويلك من ابوي .... نوير: ياخوك اجل اذبحني البندق ارحم من ابوي ... وطار بسرعة بالسيارة للبيت وهي تصيح ... ووصل للبيت ونادى على الصبي السوداني عثمان : رح للغنم ارها في الشعيب يالزول ..روح السوداني ودخل نوير في حوش البيت وطشها على وجهها .. وكانت امة عويضة تخض السعن في الحوش وباين القسوة والبشاعة في وجهها تحت المنعر القذر .. اخذ البندقية وصوبها لراس امة وهي لم تلتفت لة ولم تخاف ... وقال : يمة انا كم مرة قلتلك البنت هذي لاتطلع برا البيت .. والله لاخلى روسكن طشاش في الحوش .. الحين تبيني احتريكن لين تجيب بنتك الفيهة ... الام اعطتة نظرة فولاذية وقالت بصوت يشبة صوت الديناصور: روح وراك يالغضيب لاتهوز بندقك على راسي .. لعنلاهابو البطن اللي جابك ... فزاع : اسمعي انا احذر كن شفت بنتك الهاملة طالعة من البيت .. لاخلى دخان البندق يطلع مع خشومكن ... طلع فزاع بسرعة من البيت ... طالعت الام في بنتها وقالت : وش انتي مسوية كبرت فيهتك ... نوير وهي تبكي : ماسويت شي ..؟؟ كنت اسرح بالغنم وجاني هالجني بسيارتة عساني قد شفتة تحت كفرهاالمقرود .... اخذت امها قشطة تراب وحذفتها وقالت : مير في راسك ان شفتي تشوفين سراب وان خميتي تخمين تراب يالهاملة تدعين على اخوووك ..... سحبت نوير قناعها من التراب واتجهت لغرفتها وهي تبكي وتقول : والله لأذبح نفسي ..... ردت امها : مدت ابوي الاول عساك لحيقتــــــــــــة ....

البيت كان عبارة عن اربع غرف وحوش كبير في زاوية الحوش كفرات سيارة ملحفة بالشراع .. ومجموعة من الحطب وسطل مطشوش .. ومطبخ فية تلاجة على غاز ومركب ابو عينين ..وساطور مكسر لتقطيع الدجاج ..وعلب حليب فيها سكر وشاهي .. وحمام فية شامبو الاحمر ابو خمسة ريال .. ومجلس كبير للرجال في الجدار مثبت رف وعلية دلتين بغدادية وبرادي صيني .. يتوسط الغرفة وجار كبير وحولة نجر ومحماس ومنفااخ ..ويوجد بالجدار الايمن كتابات وذكريات فزاع واصدقائة مكتوبة بالفحم اثناء السهر بالمجلس مع رائحة الفانوس المنتشرة بالمكان كلة وتعطي طابع الحياة البدائية الهادئة ..وفي الجانب الايسر من المجلس راس غزال مثبت بالجدار وكذلك معلاق البندقية ( ام خمس ) اما غرفة نوير وامها فيها دولاب قديم ابو مرايا وطاقة تفتح على زربة الغنم وفية طراحتين بالارض ..ويوجد على الطرف منضد علية فراش ومخاد وجودري ..وفية شنطة حديدية قديمة مزخرفة بالورد فيها مكحلة نوير وظل ابو ريالين وحمرة سحرية وعطر من ابوخمسة اللي ريحتة مثل ريحة الشيشة ..اما فزاع وابوة يرقدون بالمجلس وكان الابو يعطي ولدة كل ليلة دروس كيف يروض اختة ... وفي اليوم الثاني قامت نوير الساعة 6 على صوت النجر ..لبست قناعها وراحت للمجلس ولقت امها وابوها جالسين على جمب وريثة النار ... قالت الام : نوير سوي قرص بالسمن ... قالت نوير وهي تطالع في ابوها اللي يدق النجر : صباح الخير قال الابو : مير مالله يصبحك غير بالشر والقشر وش موديك للشعابة يالهاملة ردت نوير : يابوي سامحني والله ماعودها ...... قال الابو بصوت مخيف : طسي عن وجهي سويلي الفطور ... سوت نوير القرص بالسمن المخلوط باللبن والثوم واكل ابوها وطس عند الرجال .. اما اخوها فزااع رايح مع اصحابة يقنصون ..راحت امها عند جارتهم المنافقية ام العلوم عبيدة وقالت لنوير : كنسي البيت لين اجي وخليك تطلعين ياملعونة الرقبة ..طست الام ايضا وجلست نوير لحالها وتجمعت الدموع في عيونها من الظلم والقهر .. راحت لزربة الغنم وحضنت عنزتها السوح الاليفة وهي دموعها مالية وجهها وتحس بوسط الحيوانات ان قلوبهم ارحم من قلوب اهلها المتوحشين .. في الاثناء هذا دخلت عليها ماطرة خويتها المخلصة ويوم شافتها نوير حضنتها وهي تبكي وتقول : اااة ياماطرة انا كرهت الحياة بسبب اهلي ... ماطرة : عساهم مايربحون .. حتى اخوي عايض يفح من حرك والله ا ن اهلي ابتلشو فية كل ماطريتي عليةغدا مثل القرن ينصرع ويعطبونة ..وامي تاخذ من شعرها وتقطع من حرة والله انة ميت عليك ويقول : واحري على نوير لاجبنا اسمك يتيــــر بينا ..ولاهو بخير ولابعافية ...ثم قام وراح انثبر في خربوشة (غرفتة) وشغل عيسى على اغنية ( هذا منهو دق الباب يمكن يجونا الاحباب )وعيونة تهمل مع الاغنية ولاامسى الليل ركب سيارتة وقام يهيم في الاودية ويجلس على تلة في الليل ويعزف الربابة لين يصبح الصبح ثم رجع للبيت على اخس حالة هذي حياة عايض ...قالت نوير : ياويلي واحري عليك ياعايض انا اشو ف اني ماني جايبة خير واويلي واحري ياللي يشوفة ويشبع عينة بشوفتة .. ماطرة : عزالله انة بحالة مايعلم فيها غير الله .. قالت نوير : طيب انا وش اسوي ؟؟ ابك انتي مانتي خابرتن اهلي ماقدر اطلع حاكريني في البيت ابوي من طرف واخوي ملعون التريس من طرف عساهم مايربحون ....وش اسوي انا لازم اشوف عايض ؟؟ مدام انة مخطر .. قالت ماطرة : اسمعي يانوير شوي المغرب اخلية يجي ورا بيتكم يحتريك وانتي اطلعي يعنك رايحة لزربة الغنم .. وروحي قابلية تحت الشرة الدوحة خلية يشوفك اظنة يطيب ويرتاح .. بللي كبدك منة شوي ..هاة خلاص وافقتي ...؟؟؟؟؟؟؟؟؟؟؟؟؟؟؟؟ قالت نوير باستسلام : خلاص مع انها فيها مخاطرة بس عشان عايض لو اطيح في حفرة ماعلي خلاص قوليلة نتقابل بعد المغرب عند الدوحة ابي اشوووووووفة واشبع من شوفة عيووووضي .... ماطرة : يلة اقعدي بالعافية ... نوير: ياهلا تعافيك ....

انتهى الفصل الاول ...
وانتظروا الفصل الثاني (( عايض المجروح )) واوصاف سيارتة ..والعبارات الرومنسية والبواري الروسي وفنانة المفضل انتظرووووووووووووووا ..
اخوااني ان اخطأت فذلك مني فاعذروني وان اصبت فذلك من الله ولكم تحياتي

بقلم المقبل ....

الموضوع الأصلي: الــــــــــفصل الاول من رواية لندن لبـــــــــــدوووووو | | الكاتب: المقبل | | المصدر: شبكة بني عبس

[ولـد الـقـصـيـم]

هههههههههههه واعذابك يانوير ماهي معينه خير
واللحقتها بعايض ومقابلته هههههههه لا والله راح راسها طشاش ماهو كلام

روايه بلهجه رشيديه بحته ههههههههه ننتظر وش ورى عايض وعلومه

ماقصرت يالمقبل وحبلك رهاوي ماشاءاالله عليك

[نــ قباني ــزار]

اعجبني بك حبك للكتابه وايضاً تقدمك خطوه وهي النشر
كنت اتمنى ان لاتكون الروايه حكراً على أحد وهذا مافعلته انت بإستخدامك
للهجه مخصصه لفئة من الناس وكذلك لوكان هناك تعريف للزمان والمكان والشخصيات
في البدايه ك مدخل للروايه والاهم من هذا كله ان يتقمص الكاتب دور القارئ لا دور البطل
وجملة ملاحظاتي لاتعادل اعجابي بشجاعتك للنشر .

[سحايب]

ههههههههه قلم رئع يعطيك العافيه
في انتظارمغامرت نويرومصيرها ،،،هههههههه

[رواية]

نوير تستحق معاملة أخوها ^_^
بانتظار الجزء الثاني
أمتعنا

[المقبل]

اخووووووي العزيز ولد القصيم ...

امتعني ردك وتواجدك وحضورك الخفيف والممتع .. سلمت اخوي على كلماتك

واتمنى اكون عند حسن ظنك وتعجبك القصة باللهجة الرشيدية البحتة..

لاعدمتك واتمنى ان ارى ردودك المستقبليــــــــــــــة ..

[المقبل]

الاخ العزيز نزااار قبااااني

نورت وشرفت ولنا الشرف بتواجد ردك الانيق في صفحتي المتواضعة

وكلامك على راسي واعجبني وشجعني اكثر لامل مستقبل كنت اراة بعيد

واعجبتني ملاحظتك التي تدل على فهمك ووعيك وانك تقرأ بمنظور شخصي يدل على ادراكك

الله عليك .. وعلى دقة تعبيرك .. تسلم وانا يشرفني وجود توقيعك في صفحتي ..

واتمنى ان اخطو بكتاباتي نحو حلمي البعيد ....الف الف الف شكر لك

[المقبل]

اختي دمعة

وانتي اروووووع ... واشكرك على دعمك وردك اللائق بك يامنبع الذوق

سلمتي ومانعدم هالطلة ... تحياتي