[المكلماني]

المكلماني

من هجوس ٍ تشعم النار من قدح الزنود=تحطب القيفان وتوقده جمر القضا
كان ابو شرق المسمى ليا زدنا يزود=يا هجوسي هجرسي وطلعي به للفضا

ابو شرق

يا هجوس المكلماني نبا المسرى سنود=فوق باخرة المعاني ما هي عوص النضا
اعرف انا نحفظ الشعر ونعرف الحدود=وكان تبغى تبدع بغصب نبدع بالرضا

المكلماني

صاحبك لو جيت ضاوي مع عرق النفود=ما يهيضه لايح ٍ دوب براقه نضا
يا عميلي واردف العلم تاتيك الشهود=ان شهدنا معك الزور القضيه للقضا

ابو شرق

بعد شفت البرق يا صاح واوحيت الرعود=كان نمت ابمدرج السيل فانت اجلك قضا
ننصحك عند هرجة الزور واحذر لا تعود=وكان عدت بهرجة الزور يلزمك القضا

المكلماني

النظام اليا نهجته تقيد بالبنود=جعل حظك لا نهجته يفز وينهضا
كيف ابا علمك فرق النمور امن الفهود=يدغفون امن اللحم دوم ني ولانجضا

ابو شرق

بكره الشهر الفضيل وعسى عيدك يعود=مير تب لله عن كل ذنب كذ مضا
فرصة ٍ يا صاحبي ما تعوض بالنقود=عزتي للي على مثلها ما كذ حضا

الموضوع الأصلي: فـن الـقـلطـه | | الكاتب: المكلماني | | المصدر: شبكة بني عبس