ياراكب اللي لامشى يطوي القار** وليا وقف كنه يقول انظروبي
تصميم ملعون الثوى عابد النار** طاغي ولافكر بزود الذنوبي
ليا تـقـفـيته تقــــل ذيب لا غار** وجه مثل وجه الغزال اللعوبي
بالطول والا العرض ملفت للانظار** وليا ركبته ماتمل الركوبي
موديل عشره فوق الالفين فكسار** جيب تحدى واردات الجيوبي
شد الوكاله مالمس فيه مسمار** لونه يقارب للشفق والغروبي
هو منوة اللي عن هله منحي الدار** عليه يقرب مبعدات الدروبي
مبطي ولا عنهم سمع رد الاخبار** بدو ورى المرعى تسوق الذهوبي
شراه عقب ايس من القرب واحتار** وضاقت به الافكار من كل صوبي
يومن كـــلن نـــام نومه عنـه طار** وسراه مع مسرى نسيم الهبوبي
يبغى يمر دياره اللي بها سار** ايــــام يومنــه بوقـــته طــــــــروبـي
مع صاحبن بينه مواثيق واسرار** كلن للاخر به غلاء ومحسوبي
مشتاق له عقب انتحت فيه الاقدار** لعل في ماقال ماهـــو كذوبي
هو باقين له عقب ماغاب مقدار** والا نساه وبـدلـه بمحبــــوبـــي
اوصار حبه عند شرواه تذكار** والا تزوج عـقب ماهـو عزوبــــي
اليا حصل شوفه يهونن الاخطار** مير البلا كانه عليه محجـــوبـي