حبيبي كافي من البعد ومن اللعب بالأعصاب=ترى ماعادلي قدره ترى مافي يكفيني
علامك كل ماحاولت أجيك تقفل الأبواب؟=وأنا اللي كنت أقول انك مثل ماأغليك تغليني
أنالأجل أكسبك ياصاحبي ضحيت بالأصحاب=وبعت اللي وراي ودوني وجيتلك بيديني
أناديلك متى ترجع ونفتح للمحبه باب؟=متى قلبك يحن ومثل أنا ماأعطيك تعطيني؟
ترى مليت من طرد السراب وغيبة الأحباب=ومن كل الدروب اللي على الفرقا توديني
أنا من كثر ماشلت الحزن والهم راسي شاب=وصار الحزن صاحب درب وأصدق من يواسيني
حبيبي خاف ربك عاد واحسب للغرام حساب=أنامازلت أناديلك وتارك من يناديني
مدام انك كسبت الـحب والتقدير والإعـجاب=وصرت أنت الوحيد اللي من الجنسـيـن يعنيني
دخيلك عاد لاتقعد تدور للغياب أسباب=ولاتحاول بسيف الهجر تقتل فرحة سنيني
طلبتك مدلي كف الوصل كافي جفا وغياب=جد بوصلك ولاتبخل علي ولاتخليني
تعال ووضح الصوره ولاتخشى ولاترتاب=تعال إصدق معي بالحب وأذكرني ياناسيني
وبلاش من التغلي والجفا واللعب بالأعصاب=<حرام> البعد ينهيك و<حرام> البعد ينهيني