اخواني واخواتي اعضاء شبكة عبس يطيب ان اضع بين ايديكم هذه المتواضعه ورجو ان تحوز على شيء من رضاكم
الناس وش فيهم يسبون هالجيل=جيل التقدم والسعد والحضاره
كلن يقول الجيل مابه رياجيل=كلن يقول الجيل هذا خساره
مارضى على جيلي دعايه واقاويل=واليا رضيت ابها تراها عياره
شيابنا ياناس قاسين بالحيل=ماكن في شبان الامه نماره
وفي كل وقت ودار نلقى حلاحيل=والوقت مانقدر نغير مساره
الوقت لابده على العدل والميل=ولابد في تال الزمان استداره
والنعم تشمل طيبين المفاعيل=شيابنا اهل الطيب واهل والوقاره
نعمٍ بهم ركابة الهجن والخيل=يوم ان كلٍ دون ربعه وداره
دلالهم تلقى بها بنٍ وهيل=والضيف ماجوبه كبير الفقاره
وحنا شباب اليوم غيث المقاليل=بالعلم صرنا فوق عرش الصداره
بالعلم سدنا وانتهى مظلم الليل=زاح الجهل والعلم شعشع نهاره
حنا عرفنا مطلع الجدي وسهيل=ومافيه كوكب ماعرفنا مداره
منا شبابٍ رتل الحق ترتيل=اصواتهم تصدع بعال المناره
منا دكاترة الدواء والتحاليل=ومنا دروع الدار عن كل غاره
وزوداً على هذا حفظنا المعاميل=الكيف مانسوقه قليلٍ بهاره
ولانكر وجود مضيقين البناطيل=اللي يحسبون التغنج حضاره
ولانكر وجود التايهين المهابيل=اللي يحسبون الرجوله زقاره
الله يهديم عن الزيف والميل=والله يجنبنا شلاهيب ناره
وتقبلوا تحياتي اخوكم :
محمد ربيعان الجريشي