إلى كل من يتصفح هذا الموضوع؟
السلام عليكم ورحمة الله وبركاته
أسعد الله أيامكم بالمسرات...
معذرةً...لم أجد من الكلمات ما يليق بالتقديم لهذا الإعتراف!
[poem="font="Arial,5,black,normal,normal" bkcolor="transparent" bkimage="" border="none,4,gray" type=0 line=1 align=center use=ex num="0,black""]
الطيب ميراثي من العم والخال=واللي كتبه الله على بنادم يصيب
ومن ما لقاء بين أهل العز منزال؟=يصير لأهل العز حامل مكاتيب
يا متعبٍ نفسك ورى طول الآمال=لا تحسب الهقوات بالنفس ما تخيب
خذ مني العبرة قبل ترثي الحال=قدام لا تشره عليك الأصاحيب
نقيت هقواتي وأنا أشوفها جزال=وهزلت من الطيب وخفت إني أخيب
ضاقت وساندني من الناس رجال=وأقفى قبل رد الثناء وطاري الطيب
أقبل قبل يدعى...وقفى عقب نال=تاجٍ على رأسه يحشمه عن العيب
وزليت من جالٍ تحت رجلي إنهال=ولقيته لكفي يمد المقاضيب
في حزةٍ مأحدٍ خطر لي على البال=ألا كسير البأس...واليأس...والريب
لو صد ما لحقه من اللوم مثقال=لكن على ما قيل:راعي مواجيب
يحجم عن الهين ويقدم للأهوال=وقبل الطلب ترهي يديه المطاليب
بالطيب يحييني وأنا بالردى أغتال!=مأخذت من شخصه دروس وتجاريب
أنساني الشيطان يوم المدى طال=نعم العضيد بمعسرات الشلاهيب
بان الردى مني على ذرب الأفعال=وطعنت بكفوفي عطيب المضاريب
يوم إن حظي طاح والمعتدل مال=بانت لي الخلة وشفت الذواريب
يحطني عقب الردى الواضح عقال!=وأنا من الكبوة لأودي ولا اجيب!
يا ماكر النوماس...يا طيب الفأل=عليك شمس الطيب تشرق ولا تغيب
ليتك لبست عقال وألبستني شال=عز الله إني شايفٍ شقت الجيب
عز الله إنك للمهمات شيال=وإني ما شلت ألا الردى والعذاريب
العذر زل وكلمة الحق تنقال=حسبت نفسي من حساب الخراعيب
أقولها ولا يحجب الشمس غربال=ذبحتني بالطيب...يا كاسب الطيب.
[/poem]
بصمة/كهل الصباء