يتعب الشعر مايلحق مدى متعب=فيصلي ٍ سنود المجد متعبها
مير اباشيل طاروقي واقوم العب=لين اهيض فيافي نجد واطربها
ودي اتكي على جال الفخر وارقب=هدة الحر من عالي مراقبها
ودي اقرا مطاليع السعد واكتب=شاعر وقفته يا امير حاسبها
كل شمس ٍ بشعري دنقت تشرب=لبد الصبح الابلج فوق غاربها
ياهلا وابرك الساعات يامرحب=من هجوس ٍ تزاحم لك مناكبها
ياعريب السلايل طيب المجذب=يازبون المكارم يامعزبها
المعالي على شرواك ماتصعب=نوخت لك على الطاري ركايبها
كل مال السحاب .. لهامتك يقرب=وانت عينك على نايد كواكبها
انت ياسيدي يرقى لك المنصب=والهلايم تحدر في مناصبها
قبل ماتنفذ الرتبه على المنكب=بندق العز ياشيخ امتنكبها
وقفتك للوطن يوم السماء حثرب=وارجفت شرق والله متغاربها
يشرق الطيب وفلول الردي تغرب=وارض الابطال ماتصفي مزاهبها
من ثنى عن سما مكه وعن يثرب=ماتقصر يدينه عن مواجبها
عشت يراس مال الدار والمكسب=يافريق الحرس قدوة كتايبها
كل جندي لمرسوم الفهد شرهب=زينها لا لفت من راس شايبها
عمك اللي مدح طيبك وجيت اطيب=هقوته طال عمرك ماتخيبها
ياولد راعي الطولات ابو متعب=هيبتك من وريد البرق شاربها
حدث الشعر جاب .. بسيرتك واسهب=كنه اللي على صدره مغيبها
امدحك والقصيد القرم مايكذب=كلمة الحق تاقف عند واجبها
لو نهج الحقايق مالها .. مجنب=من يبي الشمس بالغربال يحجبها
يتعب الشعر .. ليه الشعر مايتعب=وانت شيخ ٍ سنود المجد متعبها